LUK 10

Jisu Bang Throksikep Atum Aphan Pachethangji Ketoi

1Labangso aphi Hemphu akaprek amonit bang throksi kep atum aphan ingvailo, lapen alangli kedamji arongsopi tin lapen adim an aphrang halatum aphan bang hini-hini pajalangsi toilo. 2Alangli halatum aphan pulo, “Sok kemen do-olo bonta kepangrumji atum ong-e. Tangte, alangli sok kepangrum akam keklem atum aphan nangketoijile ahemphu aphan cho-ardom hurtha.#Mat 9.37-38 3Da! Damnon da! Mahar atum angbongle biresak aso atum kedam asonsi ne nangtum aphan nangtoilo.#Mat 10.16 4Tangka athia, kalite kechorek ajamborong, kalite keng-op ponri; tovar kedambom ahut badu aphanta sangkokra kardom chepiri.#Mat 10.7-14; Mar 6.8-11 5Nangtum kelut damji ahem aling aphrangke, ‘Bangso ahem ning kangsam padonang’! pule punon. 6Hadak jongsi ning kangsam aning kedok abang dolote nangtum aning kangsam alangli phuthak doji; ave tangte ningkangsam nangtum along chiruiji. 7Lapen edonpet-le dora halatum nangkepi alingle chorap rap, jun rap rapnon. Pima kam keklem abang anam kelong nangji a-ot do. Edon pen adon kaprek damri.#1 Kor 9.14; 1 Tim 5.18 8Lapen nangtum kelut damji arong alingle, halatum nangtum aphan chak lote, nangtum aphan kepi alingle chonon. 9Hadak keso atum aphan pamenon, lapen halatum aphan, ‘Arnam Arat nangtum adung an vangtang-lo,’ pule punon. 10Nangtum kelut damji arongsopi aling, halatum jongsi nangtum aphan chakche tangte,#Akam 15.31 11ha tovar damra punon, ‘Nangtum arongsopi alongle aduk netum akeng kebon akengtak anta nangtum abe pathurjisi netum chehotekang-lo. Bonta chematha non, Arnam Arat nangtum adung vangtang-lo!’#Akam 15.31 12Ne chenamsi nangtum aphan nangpulang, halabangso a-Kangsai Arni labangso arongsopi aphan apar Sodom aphan Arnam akangjinso paklang muchotji!#Kech 19.24-28; Mat 11.24

Kekroikre Arongsopi Hei Hei

(Mat 11.20-24)

13“Chorazin, nang ko-an kephere meme akesung phonangpo! Bethsaida, nang ko-an kephere meme akesung pho nangpo! Pima nangtum angbong keklemtang akemathadam un-edet akam kethe hei hei jongsi Tair lapen Sidon angbong plang asonte, halatum hako ahut penta aning chiruisi pe-thoila che-umsi thek-lo ajo ingniji apot-lo!#Isa 23.1-18; Eze 26.1—28.26; Jol 3.4-8; Amo 1.9-10; Zeka 9.2-4 14Mo Kangsai Arni ahut Arnam nangtum aphan apar Tair lapen Sidon aphan akangjinso paklang muchotji. 15Lapen nang, Kapernaum; nangke sining athak anta kerungkokji aphan nang ning hanglangma? Nangphan kethitang atum adim an nang pahirtukji!”#Isa 14.13-15

16Jisu alangli sangho atum aphan pulo, “Nangtum alam karju abang ke nephansi arjulo; nangtum aphan kechakche abang ke nephansi kechakchelo; lapen nephan kechakche abang aling ke nephan neketoi abang aphanta chakchelo.”#Mat 10.40; Mar 9.37; Luk 9.48; Jon 13.20

Bang Throksikep Atum Nang Kechevoi

17Bang throksi kep atum aning arong pen nang chevoisi pulo, “Hemphu, nang men pen hi-i atumta netum alam kroilo!” 18Jisu halatum aphan thak-lo, “Cheter keklo ason Soitan sining pen nang keklo ne thek long-lo. 19Arjutha! Pherui lapen chehe langbong apivo athak kedongji lapen hotur an aphan kehaiji ajakong ne nangtum aphan nangpitang-lo, lapen thangta nangtum aphan phangno un-e.#Lun 91.13 20Bonta hi-i atum nangtum alam kekroi apot-le chehok-ri, bonta sining athak nangtum amen toktang-lo apot-le chehoknon.”

Jisu Kechehok

(Mat 11.26-27; 13.16-17)

21Halabangso ahut Jisu Karjong Kangthir pen plengsetsi chehok-olo, lapen pulo, “Ne nangphan chorolo, Po, Sining lapen pirthe ahemphu! Pima nang lahei hei ke giani lapen thekser atum angno pen patutang-lo, lapen kethek kere kave atum aphan paklangtang-lo. Chenamlo Po, lake nang ning kehang akamlo.

22“Ne Po nephan kadokave amar nepitang-lo. Baduta, Po apar ke Sopo komatma, lake chinine, lapen Po komatma, lake Sopo lapen Alangli kepaklangji aning kehang atum apar ke baduta chinine.”#Jon 3.35; 10.15

23Lapen sangho atum anat chepangnosi bang kaprek atum kave ahut Jisu pulo, “Nangtum kethek dunlong ason kethek dunlong amek hei hei rengme! 24Pima ne nangtum aphan nangpulang, penang amontri lapen recho atum nangtum kethek long ason kethek longji aning hang-lo, bonta halatum thek longledet-lo, lapen nangtum karjulong alam karjuji aning hang-lo, bonta arju longledet-lo.”

Kejut Un-e Achethe Kelongji Abidi

25Inut aron thekser abang Jisu aphan asat kelangjisi vang-lo. Alangli thursi pulo, “Thanbang! Kejut un-e achethe kelongji aphan ne kopi klem nangjima?”#Mat 22.35-40; Mar 12.28-34; Levi 18.4; 19; Keth 6.5 26Ansi Jisu alangliphan pulo, “Aron kopusonsi tok tang-lo? Nangli kopusonsi porhe long loma?”#2 Phur 28.15

27Halabangso amonit thaksi pulo, “‘Nang ning ajakong an penle, nang pran ajakong an penle, nang jakong do-an penle lapen nang kematha ajakong an penle Hemphu, nang Arnam aphan chinghon non; lapen nang methang aphan kechinghon asonthotsi tebok abang aphanta chinghon nangji.’ ”#Mat 22.35-40; Mar 12.28-34; Levi 18.5,19; Keth 6.5

28Jisu alangliphan pulo, “Nang athikpetsi pulo, lasonle klemnon, lapen nang rengpo.”#Mat 22.35-40; Mar 12.28-34; Levi 18.5,19; Keth 6.5

29Bonta aron thekser abang dhoromi pu kecheklangjisi Jisu aphan arjulo, “Tangte ne aketebok abang komat-lo.?”

Jerusalem Pen Jeriko Kedam Abang

30Jisu thak-lo, “Inut amonit Jeru-salem pen Jeriko nanghirlo, lapen alangli dokait atum pen chetong-lo. Latum alangli pe lumsi alangliphan chokpiksi damrup-lo. 31Ansi kopai keme asonsi mane akurusar halabangso atovar mamat vang-lo, lapen alangliphan thek longsi tovar suiphaksi damjuilo. 32Lason thak-thaksi Levi inutta hadak vang-lo; bonta tovar suiphaksi damjuilo. 33Bonta inut tovar kedam, Samaria amonit alangli dung vang-lo, lapen thek longsi aning arlo alangliphan kangjinso pen plengset-lo.#2 Phur 28.15 34Alangli dung an vangsi areng amek along jangthu lapen drakha ahorlang dungsi perhet-lo. Anke amethang kardon api athak pardon ponsi alohi ahem along ponlo, lapen hadak alangliphan lanalo.#2 Phur 28.15 35Puthot arni alangli sika isi thiya pen ensi alohi ahem ahemphu aphan pitekangsi pulo, ‘Alangliphan lananon, lapen la apar akhorot an mo neli kechevoiji ahut nanglipi tekangpo.’”

36Lapen Jisu pulo, “La bang kethom angbong pen kolo abangsi dokait arideng kepho abang aphan tebok abang cheplang loma? Nang pisi mathalo?” 37Aron thekser abang thak-lo, “Alangliphan kangjinso abang helo.” Jisu alangliphan thakthulo, “Ante, damra lapusonle klemnon.”

Meri Lapen Martha Along Jisu Kedam

38Jisu lapen asangho atum tovar kedambom ahut alangli elong arong lut damlo. Hadak Martha pu inut arloso dolo. Alangli amethang ahem Jisu aphan chak-lo.#Jon 11.1 39Alangli korte Meri pu do lapen Meri Hemphu akeng-ri ingnilunsi alangli lam kethan arjudunlo.#Jon 11.1 40Bonta Martha keru kethai akam ong-osi aning chepasiksak-lo lapen vangsi Jisu aphan pulo, “Ne korte ke neliphan inutpetsi keru kethai akam nang-o tekang-lo, nangli lahei mathathema? Kam nangkepacherap dunji aphan Meri aphan putha!”

41Hemphu alangliphan thak-lo, “Martha, Martha! Nang penang alam pen apot matha chepasiksak-lo, lapen arki dohang-lo, 42bonta akenang ke esonnat. Meri akangvai ke kechok pamelo, lapen lake alangli rideng pen ponpedetji.”

Currently Selected:

LUK 10: KARBIBSI

Highlight

Copy