LUK 11

Jisu Kardom Alam Kethan

(Mat 6.9-13; 7.7-11)

1Arni isi Jisu elong adim Arnam kardom dam ahut, alangli kardom pajut det aphi sangho angbong inut abang alangliphan pulo, “Hemphu, Jonle asangho atum aphan kardom kechethan ason thakthak netum aphanta kardom nethantha.” 2Jisu halatum aphan pulo, “Nangtum kardom ahut lasonle punon:

‘O Po, nangmen pangthir nang;

Nang rat pavangnang.

3Netum arnivang kenangji a-an,

netum aphan nepitha.

4Netum apap hei hei nediyatha,

pima netumta netum aphan kehingno keklem atum aphan diyalo.

Lapen sat kelangjile netum aphan neponri non.’”

5Lapen Jisu amethang asangho atum aphan pulo, “Bisar alam, nangtum angbong inut abang ajirpo dolo, lapen jirlo apor alangli ajirpo along damsi pulo, ‘Oh ko! nephan him plangthom ne paramtha. 6Pima nejirpo nelong vang-lo, lapen alangliphan keru kethaiji aphan nelong thangnatta ave!’ 7Lapen bisar alam, halabangso abang hem arlo pen thaksi pulo, ‘Nephan nepasungri! Nonke inghap ingkir tang-lo lapen nesomar nelong amek jangtang-lo. Ne thursi nangphan thangta nangpi thekthe.’ 8Ne nangtum aphan nangpulang, ajirpo aphan langledetsi thurthedetji apot-lo setta alangli hang varet apotsi alangli thursi kenangji an ason pidunji.

9“Lasi ne nangtum aphan nangpu-lang, hang bom non lapen nangtum aphan nangpidetji; ri bom non lapen nangtum longji; pacheng bom non lapen nangtum aphan nang ingpudetji. 10Pima kehang abangphutin longrep, lapen keri abang aling long, lapen kepacheng abang aphan inghap ingpudetji. 11Nangtum angbong mane abang po plangsi asopo lang a-ok hang-lote pherui pirongji, 12kalite voti hang-lote chehe langbong apivo pithu-rongji, lason abang dojima? 13Lahelo nangtum hingno setta nangtum asomar aphan akeme amar kepiji chinilo, tangte, la apar sining athak kedo a-Po ke Alangli long kehang atum aphan Karjong Kangthir piji!”

Jisu Lapen Beelzebul

(Mat 12.22-30; Mar 3.20-27)

14Jisu alam kave abang along pen hi-i phlung-lo; lapen hi-i bardet aphi alam kave abang ningjelo. Armu atum manghuphrong-lo, 15bonta manene atum pulo, “Lake hi-i atum ahemphu, Beelzebul pen ajoksi hi-i kephlungji ajakong long-lo.”#Mat 9.34; 10.25

16Akaprek atum ke asat langsi sining pen angthek hang bomlo.#Mat 12.38; 16.1; Mar 8.1 17Bonta Jisu halatum aning kematha alam chinisi halatum aphan pulo, “Badu adet tame, amethang kechethak-et arat ke kedo ajir dingde; lapen kechethakdak ahem ke kedo chepaprekjampo. 18Lasi Soitanta amethang jongsi chethakdak lote arat kopusonsi dothekjima? Nangtum nephan pulo, neke Beelzebul ajakong pensi hi-i atum aphan phlung-lo. 19Ne jongsi Beelzebul pen ajoksi hi-i atum aphan phlung-lo tangte, nangtum aphi phi kedun atum ke komat ajakong pensi halatum aphan phlung-loma? Nangtum aphi phi kedun atumsi nangtum akechokche aporman paklangdak-lo! 20Bonta neke Arnam ajakong pensi hi-i atum aphan phlungbom, lapen lake Arnam Arat nangtum angbong vangtang-lo pu angthek-lo.

21“Kangtangrak abang chir, nok pen ahem kechehon ahut ke amar thangta virve. 22Bonta alangli par ingtang muchot abang vang-ra alangliphan haidet lote alangli aning kechethe anokjir ponpo lapen kethi pon amar an thak-etpo.

23“Ne be kalidet abang ke ne bethurlo; nelong nang kepangrum dunde abang ke hijikverlo.#Mar 9.40

Hi-i Akarjong Kechevangthu

(Mat 12.43-45)

24“Kangthirthe ahi-i monit pen nangkebar aling, la lang kavedet adim kesangji adim ribom. Jongsi long athai avete la pupo, ‘Chu ne nangkebartang ahem along ne chelut damthupo.’ 25Lapen hi-i chevangsi ahem arkok-et lapen sai-et thek-longpo. 26Ansi hi-i chedamsi amethang apar kehingno muchot bang throksi ahi-i chevansi lutdampo lapen hadaksi dopo. Lapen kejutsi halabangso abang aphrang apar hingnomuchotpo.”

Ahok Akerengme Alam

27Jisu la kepubom ahut armu angbong pen inut arloso ase pathesi alangliphan pulo, “Nangliphan pirthe kepahache, lapen mok nangkepachu abang ko-an rengme!”

28Bonta Jisu thak-lo, “La putame, tebonta Arnam alam karju lapen kekroi atumsi rengme!”

Angthek Ri Nangne

(Mat 12.38-42)

29Armu atum kechingprompik ahut Jisu lam ningjebomsi pulo, “Labangso a-ove atum ko-an adur kave! Latum angthek ribom, bonta Jonah angthek apar ke isinat angthekta pipedetji.#Mat 16.4; Mar 8.12 30Nineveh asor aphanle Jonah angthek kecheplang asonthot, lason thak-thaksi labangso a-ove aphan ke Monit a-Sopo helo angthek kecheplangji.#Jona 3.4 31Mo Kangsai Arni Sheba arechopi labangso a-ove amonit atum aphan adai nepji, pima alangli Solomon agian pen kethan alam karjujisi ha amethang adet pen vang-lo; lapen chini iktha, Solomon apar kopine kethe muchot ladak do.#1 Rec 10.1-10; 2 Phur 9.1-12 32Mo Kangsai Arni Nineveh asor thursi labangso a-ove amonit atum aphan adai nepji, pima halatum Jonah kepachethang pen ajok aning chiruilo; lapen chini iktha, Jonah apar kopine kethe muchot ladak do!#Jona 3.5

Melur Pen Kecharli Alam

(Mat 5.15; 6.22-23)

33“Baduta melur keira patute, mate phule arlo bibe; bonta hem nangkelut atum akekhelan kethek longji aphan melur ke archok athaksi batpo.#Mat 5.15; Mar 4.21; Luk 8.16 34Nangbang arpum amelur ke nang mek helo. Nang mek mesen ahut nang bang arpumta the-angdangpo; bonta nangmek jongsi hingno lote nangbangta ingtingkukpo. 35Tangte chelang pametha, nang ning arlo akethe-ang ingtingkuk mene. 36Nang bang arpum jongsi the-ang dang tangte, lapen thang akangting ave lepute, melur atur pen nangphan kepathe-ang dang ason thakthak, lake the-ang dang saidepo.”

Jisu Pharisi Lapen Aron Thekser Atum Aphan Adai Kenep

(Mat 23.1-36; Mar 12.38-40)

37Jisu lam keningje jutdetsi, inut a-Pharisi alangli long an kecho rap-rapji aphan phalo; lasi alangli ahem lut dunsi an kechoji aphan ingnilo. 38Pharisi abang langdingsi manghuhak-lo, pima Jisu an choche ako ari chersamsedet-lo. 39Lasi Hemphu alangliphan pulo, “Toh nonke, nanglitum Pharisi atum ke harlung lapen kasuta angtan anatsi ingthichot, bonta nangtum arlo ke kar-i lapen kehingno pen plengset-lo. 40Kelu atum! Angtan anat kethip abang, Arnam arlo ke thipthedetma? 41Bonta nangtum aharlung lapen akasu arlo kedo amar an keduk atum aphan pinon, lapen kadokave asonta nangtum aphan ingthirpo.

42“Pharisi atum! Nangtum ko-an akepherememe phonangpo! Pima nangtum Podina, arud lapen han aphan ke-en abap an phan kep pen ephan Arnam aphan pilo, bonta nanglitum ahok akangsai lapen Arnam aphan akanghon matha pamemedet-lo. Ason kaprek hei heita varvera lahei heita klempon masi.#Levi 27.30 43Pharisi atum! Nangtum ko-an akepherememe phonangpo! Pima Sinagog along anghoi kethe lapen hithi borwa angbong aman pen akardom kepi kelongji aphan nanglitum aning dokpik-lo. 44Nangtum ko-an akepherememe pho nangpo! Pima nanglitum ke angthek kebibe atipit ason thakthak-lo. Monit atum chininedetsi la athak dongponsi damlo.”

45Halatum angbong pen inut aron thekser abang Jisu aphan pulo, “Thanbang! Lahei hei alam kepuke nelitum aphan kepatherak-lo.”

46Alangli thak-lo, “Aron thekser atum! Nangtum ko-an akepherememe pho nangpo! Pima nanglitum kepon kesungkrung anghor nangtum monit aphan panghorlo, bonta nanglitum methang ke ri chimun ehong pen anta labangso anghor rap dundelo. 47Nanglitum ko-an akepherememe pho nangpo! Pima nanglitum montri atum atipit hei hei selamlo, latum aphan nanglitum aphusar atumsi pathilo. 48Tangte nanglitum chekrong non, atheke nanglitum aphusar atum keklem akam nanglitumta nang ning dok-lo; halatum Arnam amontri atum aphan pathilo, lapen nanglitum ke halatum atipit selampilo. 49Lasi Arnam agian pulo, ‘Ne halatum angbong Montri lapen Pherangke nangtoiji. Halatum manene atum aphan pathiji, lapen manene atum aphan chenekji.’ 50Lasi pirthe kepinchong ahut pen Arnam amontri atum aphan avi kepabutang an pen apot, atheke 51Abel avi kepabu a-arni pen hala dovan lapen Kardomhemthepi kangthir angdeng angbong Jekariah aphan avi kepabu a-arni an kepabutang avi an pen apot labangso a-ove aphan aduk piji. Ne athikpetsi nanglitum aphan nangpulang, la kadokave pen apot labangso a-ove atum aduk pho nang-po.#Kech 4.8; 2 Phur 24.20-21

52“Aron thekser atum! Nanglitum ko-an akepherememe akesung pho nangpo! Nanglitum kechini-i aphlok chebikok-lo. Nanglitum methangta lut damde, lapen kelutdamji aning kehang atum aphanta palutdam longlelo!”

53Jisu hadak pen nangbardet aphi aron thekser atum lapen Pharisi atum jasemet aning thi-lo. 54Alangliphan kopine akechokche alam pen adai kenepjisi halatum alangliphan ajat jat alam karjuji pangcheng-lo.

Currently Selected:

LUK 11: KARBIBSI

Highlight

Copy