LUK 8

Jisu Aphan Kerapdun Arlosomar Atum

1Lapen malomso aphi Jisu rongsopi lapen arong arong damsi Arnam arat abirta keme than pachethang ponbomlo. Bang krehini asangho atum alangli long dunlo, 2lapen manene arlosomar atumta dolo. Atheke, keso hei hei keme lapen hi-i langno atum pen kejoktang penang arlosomar atum, Megdala a-Meri, (labangpi pen hi-i bangthroksi nang bartang-lo,)#Mat 27.55-56; Mar 15.40-41; Luk 23.49 3lapen Herod ahemaripi, Chuza apiso, Joanna, lapen Susana lapen akaprek penang atumta dolo. Labangpi atum amethang methang amar pen Jisu lapen asangho atum aphan rap dunlo.#Mat 27.55-56; Mar 15.40-41; Luk 23.49

Chili Kerik Alamlir

(Mat 13.1-9; Mar 4.1-9)

4Armu ake-ongpi chingrumbomsi lapen arongsopitin pen monit atum Jisu along vangbomsi, alangli lamlir pen thanlo.

5“Ahut isi inut chili kerik abang chili rik damlo. Alangli chili kerik ahut penang achili ke tovar akungsi klolo, lapen la aphan dongpon long-lo lapen nampi avo atum vangsi chongthok-et-lo. 6Lapen akaprek achili ke longpak athak klolo, lapen lake kechingjok pen mamat chekedulo, pima hadak longle kecham avedet-lo. 7Akaprek achili ke ingsu kethe arong ajosi klolo, lapen ingsu kethe arong la pen the rap-rapsi la aphan petthip-lo. 8Lapen ajehak achili ke longle keme ajosi klolo, lapen arong thesi athe phan pharo pathelo.” Lapen labangso alam kepu ahut Jisu hangkongsi pulo, “Ano kedo abang parju nang!”

Lamlir Ke-en Athe

(Mat 13.10-17; Mar 4.10-12)

9Labangso alamlir athe kopima pusi asangho atum Jisu aphan arjulo. 10Jisu halatum aphan thak-lo, “Arnam Arat akepatu alam kechiniji, lake nangtum aphan nangpitang-lo, bonta akaprek atum aphan ke lamlir pensi thanlo. Lasi latum thek longbom setta thek longledetji lapen arjubom setta chini nedetji.”#Isa 6.9-10

Chili Kerik Alam Jisu Kethan

(Mat 13.18-23; Mar 4.13-20)

11“Bonta Lamlir athe lahelo: Chili ke Arnam alamlo. 12Tovar akung keklo achili ke karjulong atumlo; latum kroikredetsi kejok kelongledetji aphan Diabol vangsi halatum aning arlo pen alam pondet-lo. 13Longpak athak keklo achili ke lahelo, arjulongsi aning arong pen alam deng-lo, bonta latum angkur avelo; malomso aphan kroipo, bonta asat kevang ahut aphi chiruiphakpo. 14Lapen ingsu kethe arong ajo keklo achili ke la helo: latum ke arjulo, bonta bangso akai aphan akeningbi, akhi lapen pirthe aning arong hei hei latum aphan petthip-lo, lapen latum athe pathe thekthelo. 15Lapen longle keme ajo keklo achili ke la helo: latum ke keme lapen kechingki me-o aning pen arjulo, lapen alam otthip bomsi kechechakthek ajakong pen halatum kaiketa athe patheverlo.

Melur Pen Kecharli Alam

(Mar 4.21-25)

16“Baduta melur keira phule pen parkupke lapen hongplang arumta bibe, bonta kevang atum an akethe-ang kethek longjisi melur archok athaksi la batji.#Mat 5.15; Luk 11.33 17Pima keklangkledetji, lason akepatu amar thangnatta ave, lapen bang atum chininedetji lapen kethe-ang angbong kevangvedetji, lason akepatu amarta ave.#Mat 10.26; Luk 12.2 18Tangte kopusonsi arjuji; lale langpame non; pima amar kedo abang aling aphan ansose pidetji, bonta thangta kavedet abang along penke, la ne mar pu kechepu amar setta pondetji.”#Mat 25.29; Luk 19.26

Jisu Apei Lapen Amumar Atum

(Mat 12.46-50; Mar 3.31-35)

19Apei lapen amumar atum Jisu along vang-lo, bonta armu ke-ong pen apot adung pale thekthe det-lo. 20Mane abang alangli phan alam thanlo, “Nangli pei lapen nangli mumar atum ingtansi arjapphrong-lo. Halatum nangliphan kethek longji aning hang-lo.” 21Jisu thaksi halatum aphan pulo, “Arnam alam karju lapen kekroi atum helo ne pei lapen nemumar atumlo.”

Jisu Tomon Thepi Kepaham

(Mat 8.23-27; Mar 4.35-41)

22Arni isi Jisu amethang asangho atum pen pen telong chethap rap-rapsi halatum aphan pulo, “Talo parai kap lonang.” Lasi halatum telong ari phrisi nang barlo. Halatum kedambom ahut Jisu amek jang-lot-lo. 23Lapen men men amat tomonpi adihu dihu vang-lo lapen telong arlo lang chethapvursi phere memelo. 24Halatum Jisu adung damsi, ingthursi pulo, “Hemphu, Hemphu, etum acham dampo.” Lapen alangli mek prangsi tomon lapen lang adihu aphanta ingchek-lo. Tomon lapen lang adihuta hamsi ingsamrilo. 25Anke Jisu halatum aphan pulo, “Nangtum akekroi konatlo?”

Bonta halatum phere hursi manghu phrong-lo, lapen chepuhurlo, “Bai! labangso abang komatma? Pima alangli tomon lapen lang aphanta hukum pilo, lapen latum alangli lam arjulo!”

Jisu Hi-i Kepho Abang Aphan Kepame

(Mat 8.28-34; Mar 5.1-20)

26Jisu lapen ari asangho atum Gerasene adet, Galili angdenchit, paraisi atelong che-olo. 27Jisu telong pen kehir pen mamat rong asor inut hi-i kepho abang alangli pen chetong-lo. Ajir dingklui pen alangli pe che-um-edet-lo lapen hem dode detsi thiri ajosi dolo. 28Lapen Jisu aphan thek longsi alangli hangchirlo, ansi akeng-ri domkhrupsi hangsersi pulo, “Kangtuinei Arnam a-Sopo, Jisu; neli long nangli kopi akam doma? Neli kechoningri athe lahelo, neli phan pasung-ori.” 29Pima bangso amonit pen nang barnon pusi Jisu hi-i langno aphan hukum pilo.

30Jisu alangliphan pulo, “Nangli men kopilo?” Alangli thak-lo, “Neli men ke ‘Legion’ ” pima hi-i ake-ongpi alangli long lut damlo. 31Hi-i atum Jisu aphan choningrilo, atheke halatum aphan aklong chechar un-epin aherangpi arlo ketoitedetji aphansi halatum mathalo.

32Hadak inglong athak phak ahur akethe kechopan do. Lasi hi-i atum alangliphan choningrisi pulo, “Latum angbongle netum aphan palut longtha.” Lapen alangli hukum tholo. 33Lapen hi-i atum halabangso amonit pen nangbarsi phak ahur angbong lut damlo. Lapen phak ahur ingchengdeng arleng anat ingplong phitsi talo arlo klosi lang jangkoilo.

34Phak kevi atum la keplangtang alam thek longsi katphlung-lo, lapen arongsopi angbong lapen rit ahavar anta labangso abirta pachethang-lo. 35Lapen halatum la keplangtang ason kelangjisi nangbarlo, lapen Jisu along vangsi hi-i atum alangli pen nangkebar, halabangso abang ape kechepindengra aning binong pen Jisu akeng-ri kangnilun thekdam long-lo, lapen halatum pherehurlo. 36Hi-i kepho abang kopusonsi medet-lo, lake kethekdun atumsi halatum aphan thanlo. 37Ansi halatum angbong pen kepadamjisi Gerasa lapen akung arei arat anta alangliphan choningrilo, pima halatum jasemet pherelo. Lasi telong ehum chethapsi Jisu damjuilo. 38Hi-i atum ke-o tekang abang ke Jisu along kedunjisi choningri-olo. Bonta Jisu alangliphan toisi pulo, 39“Nang hem chedamra Arnam nangphan keklemtang akam an chethan damnon.” Bangso amonit damsi arongsopi adang an Jisu alangliphan keklemtang akam alam pachethang ponbomlo.

Jairos Asopi Aphan Keparengthu Lapen Avi Kebu Arloso Aphan Kepame

(Mat 9.18-26; Mar 5.21-43)

40Jisu kechevoi ahut rat atum aning arong pen alangliphan chak-lo, pima halatum do-an alangliphansi inghongphrong-lo. 41Ansi inut amonit Jairos pu abang vang-lo; alangli ke Sinagog ahemphulo. Lapen Jisu akeng-ri domkhrupsi alangli hem kedunji aphan choningrilo. 42Pima alangli inutnat asopi, keso pen thiji dokdok-lo. Alangli arta ningkan krehini anbak dolo.

Jisu tovar kedam ahut rat atum alangliphan pet het-lo. 43Lapen anung anat pen inut arloso vang-lo; ningkan krehini alangli vi buverlo, lapen kedo-an pen se chelang pik-lo, bonta baduta alangliphan pame thekthedet-lo. 44Alangli vangsi Jisu ape ade ot-lo, lapen halabangso ahut mamat avi kebu hamdet-lo. 45Jisu arjulo, “Matsi ne-ot loma?” Kadokave atum chekrongkresi Pitor pulo, “Hemphu, armu atum nangliphan bithe bitha komjailo, lapen chingbei saidelo.” 46Bonta Jisu pulo, “Mane abang nephan otvek-lo, pima nelong pen jakong bar tang-lo pusi ne chinilo.” 47Labangpi chepatu un-elo pu chinisi, a-ok klemhursi vang-lo, lapen alangli ingno domkhrupsi kadokave arat angno alangli ke-ot alam athe kopi, lapen kopusonsi halabangso ahut mamat medet-lo, la chethan-et-lo. 48Jisu alangliphan pulo, “Nang akekroisi nangphan pametang-lo, pei. Ningkangsam penle damnon.”

49Jisu keningje ahut Sinagog ahemphu ahem pen inut abang vangsi pulo, “Nang sopi thitang-lo.” Jairos aphan thanlo; “Thanbang aphan pasungbom nangnelo.” 50Bonta Jisu arjulongsi Jairos aphan pulo, “Nangli phere nangne; kekroile kroinon, lapen nangli sopi mepo.” 51Hem lesi arlo lut damlo lapen Pitor, Jon, Jems lapen a-osopi api apo apar badu aphanta alangli long palutdun longledet-lo. 52Kadokave atum chiru charnap-lo; halabangso a-osopi pen apot aning cheteng bomlo. Bonta Jisu halatum aphan pulo, “Chiruri; bangso a-osopi thithe, amek kejangchot.” 53Halatum kadokave alangliphan ingnek choilo, pima a-osopi thitang-lo pu halatum chinilorlo. 54Bonta Jisu ari otsi, hangsi pulo, “Thurnon, Pei!” 55Ansi achethe dothulo, lapen halabangso ahut mamat alangli thurlo, lapen alangliphan kopine kecho ahormu pitu pusi Jisu hukum pilo. 56Api apo atum abidi jutdet-lo, bonta keplangtang alam an badu aphanta thanri pusi Jisu halatum aphan hukum pilo.

Currently Selected:

LUK 8: KARBIBSI

Highlight

Copy