LUK 7
7
Chedanbang Bang Pharo Ahemphu Aban Aphan Jisu Kepame
(Mat 8.5-13)
1Lapen lahei alam an thandetsi Jisu Kapernaum damlo. 2Lapen inut Roman aron-aso ahemphu kechinghonpik aban sodetsi thiji dokdok-lo. 3Lapen Jisu alamjir arju longsi alangli Judia asarmar atum angbong pen manene atum aphan choningrisi alangli dung toisi papulo, “Vang-ra alangli ban pamethutha.” 4Lapen halatum Jisu adung nanglesi jasemet choningrisi pulo, “Bangso amonit nangli akerap kelong nangji a-ot do, 5pima alangli amethang ajat aphan chinghonlo, lapen netum aphan sinagogta nekimpilo.” 6Lapen Jisu halatum along dunlo. Bonta alangli hem leji dokdok ahut chedanbang ahemphu ajirpo atum aphan toisi papulo, “Hemphu, chepasungri, pima neli hem asarnung arum nangli kevangji aphan neli ot ave,
7Lapen la apotsi nangli long kevangji neli ot ave pusi neli ning mathalo, bonta nangli lam ethe ningjera neli ban pamelonang. 8Pima nelita bang aber amonit lapen neli berta chedanbang atum do: neli halaphan, ‘Damnon!’ pulote la dampo lapen neli ban aphan, ‘La klemnon’ pulote, la klempo.”
9Lapen lahei hei arjulongsi Jisu alangliphan manghuhak-lo lapen alangli phi phi kedun armu atum anat chetevarsi alangli pulo, “Ne nangtum aphan nang pulang, Israel adet angbong setta ne lason akekroi thek-longle pinlang.”
10Lapen ketoitang atum Saihemphu ahem chevoisi aban apran mesen thek damlong-lo.
Nain Asor Ahemepi Asopo Aphan Kepame
(Mat 5.21-24,35-43; Jon 11.1-44)
11Malomso aphi Jisu Nain pu arongsopi damlo. Asangho atum lapen armu ake-ongpi atumta Alangli long dunlo. 12Bonta alangli rongsopi anghap an nangkele ahut rat atum kethitang abang arpum vansi nangbarlo. La kethitang abang ke hemepi asopo po epumpet-lo. 13Hemphu la thek-longsi aningmonduk-lo, lapen pulo, “Chiruri!” 14Anke alangli damsi kethitang abang arpum kepon-i araptap paphodamlo, lapen hala kecharchongpon atum chingtonkok-lo. Ansi Jisu pulo, “O riso, ne nangphan nangpulo, nangmek prangnon.” 15Hala kethilot abang thursi lapen ingnilunsi lam keningjeji pangcheng-lo lapen Jisu labangso abang aphan apei arideng hodailo.
16Kadokave atum pherehurlo, lapen Arnam adak-atur pathesi pulo. “Ilitum angbong Arnam amontri kethe inut nangklangtang-lo! Arnam amethang arat aphan kepajokjisi vangtang-lo!”
17Judia adet adang lapen bithe bitha alongrita labangso alam chethangpet-lo.
Jon Baptist Apherangke Atum
(Mat 11.2-19)
18Jon asangho atum alangliphan lahei kadokave alam thandet aphi, 19alangli banghini asangho aphan chehangsi Hemphu along alam parjudamtoilo, “kevangji abang alangli heloma, mate anut kaprek aphan inghong nangjilangma?”
20Halatum Jisu along vangsi pulo, “Nelitum nangliphan eson alam nangkarjujisi vang-lo. Labangso akam aphan Jon Baptistsi nelitum aphan nangli long nangtoilo. Alam ke lahelo, kevangji abang nangli heloma, mate anut kaprek aphan inghong nangjilangma?”
21Halabangso ahut Jisu penang atum aphan keso lapen mavur pen pamelo, hi-i kepho atum aphan pamelo lapen amek kave penang atum aphan pachecharlo. 22Jisu la Jon asangho atum aphan pulo, “Nangtum damra kethek-long lapen karjulong alamle Jon aphan thannon, atheke amek kave atum aphan pachecharlo, kethitang atum aphan pathurlo, lapen keduk kelak atum angno birta keme pachethang-lo.#Isa 35.5-6; 61.1 23Ne pen apot aning kebibe abang aling rengme!”
24Jon apherangke atum chevoidet aphi Jisu armu atum aphan Jon alamjir kethanji pangcheng-lo. Alangli pulo, “Nangtum kejejangtang ajo Jon along kedam ahut kopi thek damloma? Tomon kejap a-arpikma? 25Nangtum kopisi kelangdamma? Phirsoni ape keche-um abang aphanma? Chini tha, ahir kechepiji lapen rengdok rengni pen kedo atum ke recho ahemsi dochot. 26Tangte nanglitum kopisi kelangdamma, nephan nethantha. Arnam amontri inut aphanma? Kalang-lo, bonta nangtum montri apar akethemu abang aphan thek-longtang-lo. 27Pima Jon alamjirsi hastro along tok tang-lo, atheke, Arnam pulo, ‘Ne nepherangke nang phrang toiji, alangli nangphrang nangphan tovar sikpiji.#Mala 3.1 28Ne nangtum aphan nang pulang, “Arlosomar asomar atum angbong Jon theneilo. Bonta Arnam Arat akebinei abang ke alangli par themulo.”
29Lapen kadokave arat lapen midu kerung atumta alangli lam arjulongsi Arnam dhoromi ahukum kroilo lapen halatum Jon arideng pen baptisom enlo.#Mat 21.32; Luk 3.12 30Bonta Pharisi atum lapen aron thekser atum ke Arnam kethikpitang, Arnam aning kehang ason dengdedet-lo, lapen Jon arideng pen baptisom ke-enji molo.#Mat 21.32; Luk 3.12
31Jisu puthulo, “Tangte ne labangso a-ove amonit atum aphan kopi pensi pangbar poma? Latum kopi pen chingbarma? 32Halatum ke hithi kangnira lahin lahin kechehang varet a-osomar atum ason thakthak-lo. Ihi anat atum hangpo, ‘Netum nangtum aphan pongsi but-lo, bonta nangtum kanke! Netum nangtum aphan charhelo, bonta nangtum chirure!’ 33Jon baptist vangsi an-humlo, drakha ahorta junjelo, lapen nangtum pulo, ‘alangli ke inut hi-i kepholok abang-lo!’ 34Monit asopo vangsi cholo, junlo, lapen, ‘langtha, choboho lapen drakha ahor kangri abang, midu kerung lapen papi atum ajirpo!’ pusi nangtum pulo. 35Tebonta giani atum anke Arnam agian aphan ahok pusi puhurlo.”
Jisu Simon Pu A-Pharisi Ahem Kedam
(Mat 26.6-13; Mar 14.3-9; Jon 12.1-8)
36Pharisi inut amethang ahem an kepachojisi Jisu aphan phalo, lapen alangli Pharisi ahem damsi an kechojisi chongnilo. 37Chini iktha, rongsopi angbong papi arloso inut dolo. Lapen Jisu Pharisi ahem an kecho pu chinisi alangli nung anat kenemprujin ajangthu, arlong kelok abong pen vansi akengtir anat arjapsi chiru bomlo.#Mat 26.7; Mar 14.3; Jon 12.3 38Lapen amekkri pen Jisu akeng kepachamvokjisi pangcheng-lo lapen amethang achu pen venbomlo lapen kechinghonpik asonsi akeng ingjup-lo, lapen kenempru ajangthu patip-lo.#Mat 26.7; Mar 14.3; Jon 12.3 39Pharisi la thek longsi aning arlo chepulo, “Labangso amonit jongsi montri tangte, alangli phan ke-ot arloso komatma, lapen kopuson apapi abangpi ma, lake alangli chiniji apot-lo!”
40Jisu thaksi alangli phan pulo, “Simon, ne nangphan kepuji ethe theni alam dolang.” Lapen alangli thak-lo, “Pu iktha, Thanbang.”
41“Inut tangka keparam abang along banghini amonit apreng dolo. Inut apreng ke sika pharo kethom lapen akaprek abang ke sika thomkep. 42Halatum apreng kechetuji thangta avedetsi alangli ingjinsosi banghini aphanta diyadet-lo. Tangte, kolo abangsi alangliphan inghon muchotji?”
43“Kediya kelong ongmuchot abangbo,” pusi Simon thak-lo. Lapen Jisu alangli phan thak-lo, “Nangli athikpetsi thak-lo.” 44Lapen arloso anat chetevarsi alangli Simon aphan pulo, “Nang labangso arloso thek long-loma? Ne nang hem vangsi lutlo, lapen nekeng kechechamji aphan nangke lang nepipedet-lo; bonta labangpi amekkri pen ne keng chamlo lapen achu pen venlo. 45Nang nephan kangjup pen kardom ne pipedet-lo; bonta labangpi vangsi ha hem kelut pen ne keng ingjupbomlang. 46Ne phu athak nang ke jangthu patiptedet-lo bonta labangpi ke kenempru ajangthu pen ne keng patip tang-lo. 47Lahelo ne nang pulang, ‘alangli pap do-o setta diyatang-lo, pima alangli akanghon the-o. “Bonta cherso kediya kelong abang ke cherso nat inghonlo.”
48Lapen Jisu labangpi aphan pulo, “Nang pap hei hei diyatang-lo.”
49Lapen kangni rap-rap atum aning arlo chepuhurlo, “Pap hei hei anta kediya un abang la komatma?”
50Bonta Jisu labangpi aphan pulo, “Nang kekroisi nangphan nangpajoktang-lo; ningkangsam penle damnon.”
Currently Selected:
LUK 7: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
