LUK 6

Sabbath Arni Kekroi Alam

(Mat 12.1-8; Mar 2.23-28)

1Lapen kesang mate Sabbath arni Jisu sok ajo atovar kedong ponput ahut asangho atum sok abu ingthonsi, chohenotsi cho ponbomlo.#Keth 23.25 2Lapen manene a-Pharisi atum pulo, “Nangtum kesang arni aronre akam pi apotsi klemloma?”

3Jisu thaksi halatum aphan pulo, “David lapen ari asangho atum kang-chir ahut alangli keklem akam alam nangtum porhehepin langma?#1 Sam 21.1-6; Levi 24.9 4Atheke, alangli Arnam ahem lut damsi, Arnam aphan kepitang ahim ensi cholo lapen ari asangho atum aphanta ronpet-lo, bonsetta kurusar atum apar ke labangso amar cho kertang-lo.”#1 Sam 21.1-6; Levi 24.9

5Lapen alangli halatum aphan pulo, “Monit a-Sopo ke kesang arni a-Hemphulo.”

Ari Thi-klak Abang Aphan Kepame

(Mat 12.9-14; Mar 3.1-6)

6Akaprek akesang arni alangli ha Sinagog#Sinagog= 4.15 along langnon along damsi thanlo. Lapen ari ar-e anat kethiklak inut amonit hadak dolo. 7Lapen alangliphan adai ketinji abidi risi aron thekser lapen Pharisi atum alangli Sabbath arni keso abang aphan pamejima pusi langphrong-lo. 8Bonta Jisu halatum kematha alam chinilo lapen ari thi-klak amonit aphan pulo, “Thurra mei angbong arjaptha.” Lapen alangli thursi arjaptherlo. 9Lapen Jisu halatum aphan pulo, “Ne nangtum aphan karjuji ethe alam do, atheke, Sabbath arni keme akam tong klem longma, mate kehingno akam tong klem longma? Apran tong rai longjima, mate kepavir tong longjima?” 10Lapen alangli kadokave atum aphan talavir langsi alangliphan pulo, “Nangri chephajengtha.” Lapen alangli la klemlo, lapen ari medet-lo.

11Halatum aning jangjepik-lo, lapen Jisu aphan pisi klem thekjima pusi chethan ponbomlo.

Ketoitang Bangkrehini Atum Aphan Kangvai

(Mat 10.1-4; Mar 3.13-19; Akam 1.3)

12Halabangso arni ahut alangli Arnam kardomji aphan ha inglong arlu damsi jo pangthang Arnam ardomlo. 13Adap the-angsi alangli amethang adung asangho atum aphan chehangkoilo, lapen halatum angbong pen alangli bang krehini ingvailo, lapen ketoitang atum pusi amen irlo. 14Latum helo, Simon, (Jisu alangliphan Pitor pusi amen irthulo), Lapen akorte Andriu lapen Jems lapen Jon, Philip lapen Bartholomeu; 15Mathiu lapen Thomas, Alpheus asopo Jems lapen Zealot pu abang a-Simon; 16Jems asopo Judas lapen Judas Iskariot, Kechobeidet abang.

Jisu Kethan Lapen Keso Kepame

(Mat 4.23-25; Mar 3.7-12)

17Lapen ketoitang atum pen pen nanghirsi Jisu asangho ake-ongpi pen klamchen adim arjap-lo. Lapen Judia adet adang, Jerusalem lapen talopi akung kedo Tair lapen Sidon alongri pen rat atum ake-ongpi 18alangli lam karjujisi lapen akeso kepameji aphan vang-lo. Karjonglang-no kepho atumta vang-lo lapen keso medunlo. 19Lapen armu atum an alangliphan ke-otjisi bor-ilo; pima alangli pen jakong nangbarlo, lapen halatum mepet-lo.

Kerengme Lapen Ningduk Alam

(Mat 5.1-12)

20Jisu aphu chingthursi asangho atum aphan langdingsi pulo,

“Nangtum keduk atum rengme,

pima Arnam Arat ke nangtum arat-lo!

21“Non nangtum an kangchir atum rengme,

pima nangtum ingkrangji!

“Non nangtum kechiru atum rengme,

pima nangtum ingnekji!

22“Monit atum nangtum aphan kehijim lapen nangtum aphan mei angbong pen karphlung, nangtum aphan nang kepinrem, lapen Monit a-Sopo pen apot nangtum anong kejo ahut nangtum rengme!#1 Pit 4.14 23Halabangso arni chehok-ra ning arong pen kannon, pima sining athak nangtum anong-e the-o. Pima halatum aphusar atum lasonthotsi montri atum aphan klemtang-lo.#2 Phur 36.16; Akam 7.52

24“Bonta nangtum, atheke non keplang-o atum ko-an akepherememe akesung pho nangpo!

pima nangtum aning plitang-lo;

25“Non nangtum, atheke kangkrangling atum ko-an akepherememe akesung pho nangpo!

“Non nangtum kangnek atum ko-an akephere meme pho nangpo!

Pima nangtum ningdukji lapen chirujoji.

26“Kadokave atum nangtum aphan mesen pu kepu ahut lake nangtum aphan ko-an akephere meme alamlo! Pima halatum aphusar atum lasonthotsi kechobei amontri atum aphan rojolo.

Hotur Aphan Kanghon

(Mat 5.38-48; 7.12)

27“Bonta non nelam nang karjudun atum, nangtum aphan ne nangpulang: Nang hotur atum aphan chinghon non, nangtum aphan kehijim atum aphan keme le klemnon; 28nangtum aphan ahirjuno kepi atum aphan ahirjume pithunon, lapen nangtum anong kejobom atum aphan Arnam ardom pibomnon. 29Nang kecheng ihi nangkardep abang aphan ahi kaprekta chepinon. Lapen nangchoi keding kepon abang pen nangchoi khangthip-ri. 30Kehang abang aling aphanle pirepnon, lapen nang mar kethi pon abang arideng pen chehangthuri. 31Lapen monit atum nangtum aphan kepaklemji nang ning kehang asonthot-le halatum aphanta klemvernon.#Mat 7.12

32“Jongsi nangtum aphan kanghon atum aphan chinghonchot lote nangtum kopusi ahirjume longjima? Pima papi atum setta alangtum aphan kanghon atum aphan chinghon seroithek. 33Lapen ke nangtum aphan akeme akam keklem atum aphan nangtum akeme akam klemchot lote, nangtum kopusi ahirjume longjima? Papi atum setta lake klembomlo. 34Lapen nangtum halatum pen longjibon pusi halatum aphan paramlote, nangtum kopusi ahirjume longjima? Papi atum setta netum amar chelongthuji pusi parambom. 35Bonta nangtum ahotur atum aphan inghonra akemele klemnon, lapen kelongthuji aphanle ning thethera parambomnon. Anke nangtum anong the-opo, lapen nangtum kangtuinei a-Bang asomar cheplangji. Pima Alangli ke kechingkino lapen kehingno atum aphanta mesen. 36Nangtum a-Po kangjinsothek asonthot-le nangtumta ingjinsonon.

Bang Aphan Kangsai

(Mat 7.1-5)

37“Bang aphan ingsairi, lapen nangtum aphanta Arnam ingsaisedetji. Bang aphan ado padori, lapen nangtum aphanta Arnam ado padodedetji. Diyanon, lapen nangtum diya longji. 38Pinon lapen nangtum aphan nangpidetji, teng pamesi, sitsi, hijuksi, tengchorsi nangtum angnosi nangthokji. Pima nangtum ke-en ateng, labangso atengthot pen nangtum aphan tengthudetji.”

39Lapen Jisu halatum aphan lamlir pen thanlo, “Amek kave abang amek kave abang aphan tovar japonthekjima? Halatum bang hinita hilik jangrup-re-detjima?#Mat 15.14 40Athanbang apar asangho themu, lapu kali. Bonta kecharli tangdetsi asangho abang phutin amethang athanbang ason thakthak cheplangrepji.#Mat 10.24-25; Jon 13.16; 15.20 41Lapen nang kopi apotsi nang korte amekber aphan langding-lo, lapen nangmek along kedo athengpi achet aphan chemathathe-det-loma? 42Mate nangmethang amek arlo kedo athengpi achet alam ke chemathathedetsi, nang kopusonsi nangkorte aphan, ‘O bong, nang mekber nepahek longtha,’ pusi puthekma? Angthin ke-ik abang! Aphrangke nangmethang amek arlo athengpi achet-le chehekjok non, ansi nang korte amekber kehekjokji aphan nang checharpo.

Thengpi Lapen Athe

(Mat 7.16-20; 12.33-35)

43“Pima thengpi keme ke ningjoino athe pathethe, lapen ke ningjoino athengpike athe keme pathethe. 44Pima thengpi arongtin aphan athe pen chinidetji, pima ingsu pen thebo athe lik-le, thesobai arong pen drakha athe lik-le.#Mat 12.33 45Akeme amonit aning keme akhi angbong pen akeme vanbom, lapen kehingno abang ke kehingno aning akhi angbong pen kehingno vanbom. Pima aning arlo keplengset pen ajoksi angho pen ningjelo.#Mat 12.34

Bang Hini Hem Kekim Atum Alamlir

(Mat 7.24-27)

46“Nangtum kopi athesi nephan ‘Hemphu, Hemphu’ pu hangjo setta ne kepu akam klemkledet-loma? 47Nelong kevang lapen nelam karjulongsi keklem abangphutin komat pen chingbar, lake ne nang paklangpo. 48Alang ke hem kekim abang ason thakthak-lo. Bangso abang longle parnukkrungsi tuk-lo lapen arlong athaksi ahemthur pangnilo. Lapen lang thepi vangsi lang ali ingplongdung pen lang adihu hem arvak-lo, bonta la paklem un-elo, pima la kim pamelo. 49Bonta arjutangdetsi klemkledet abang ke inut amonit ason thakthak-lo. Bangso amonit ahem ahemthur avedetsi hem kimlo. Lang ali ingplongsi lang atarthui hem arvak-lo, lapen hala mamat hem krep-railo!”

Currently Selected:

LUK 6: KARBIBSI

Highlight

Copy