LUK 5

Aphrangsi Asangho Atum Aphan Jisu Kepha

(Mat 4.18-22; Mar 1.16-20)

1Arnisi armu atum Jisu aphan petklingsi Arnam alam karjudun ahut Jisu ke Gennesaret atalo akung arjap-lo. 2Alangli talo akung telong humni thek-long-lo. Pima ok kebeng atum la otekangsi alan hei hei lang jolo.#Mat 13.1-2; Mar 3.9-10; 4.1 3Lapen telong ehum, atheke Simon atelong chethapsi telong kora pen asap vektu pusi alangli Simon aphan choningrilo. Alangli ingni lunsi armu atum aphan thanlo.#Mat 13.1-2; Mar 3.9-10; 4.1

4Lapen keningje pajutsi alangli Simon aphan pulo, “Lang karnuk krung adimle telong vek-ra ok ahur akethepi kebengji aphan nangtum alan hei hei jengtha.”

5Simon thaksi pulo, “Hemphu, netum jo pangthang jasemet chepaduk-lo setta thangta longledet-lo, bonta nangli hukum kroisi neli lan hei hei jengpo.”#Jon 21.3 6Latum la klemdetsi ok ahur akethepi beng-lo. Lapen halatum alan chingsekji dokdok-lo.#Jon 21.6 7Lasi atelong kaprek along kedo halatum ari asangho atum aphan angphun pakisi nang keparapdunji aphan angthek pilo. Halatum vang-lo, lapen ok thap-o apotsi la telong humnita inglim rang rung-lo. 8Simon Pitor la thek-longsi Jisu akeng-ri domkhrupsi pulo, “Ne dung pen damnon, Hemphu, pima neke papi amonit-lo.”

9Halatum kebengtang a-ok ahur akethepi apotsi Pitor lapen ari atum an thirik-olo. 10Lapen ke Zebedi asopomar, Jems lapen Jonta lapu thakthak-lo. Halatum ke Simon pen kam keklem rap rap atumlo. Lapen Jisu Simon aphan pulo, “Phere nangne, non pen apara nang monit kenep abang cheplangji.”

11Lapen atelong kora vanpetsi halatum kadokave amar che-o tekang-lo lapen alangli phi phi dunlo.

Jisu Si-i Akeso Abang Aphan Kepame

(Mat 8.1-4; Mar 1.40-45)

12Lapen arni isi alangli erong arongsopi along dolo. Hadak abang bithe bitha si-i kecho, pinso amonit inut dolo. Alangli Jisu aphan thek-longsi domkrupsi alangliphan choningrisi pulo, “Hemphu, nang ning hang-lote, nang nepangthir un.”

13Lapen ari chephajengsi lapen abang otsi alangli pulo, “Ne ning hang-lo, ingthirnon.” Lapen hala mamat si-i alangli bang along avedet-lo. 14Lapen badu aphanta thanri, bonta damra kurusar aphan chepaklang-ra nang kepangthirjile Moses kepi aron thot halatum aphan haki kepijile athok thok damnon pusi Jisu alangliphan hukum pilo.#Levi 14.1-32

15Bonta Jisu lamjir chethangmuchot-lo lapen armu ake-ongpi karjuji lapen akeso pen kemedetji aphan chingrumlo. 16Bonta Jisu ke abatai batai kejejangtang ajo damjuisi hadak Arnam ardomlo.

Thi-klak Abang Aphan Jisu Kepame

(Mat 9.1-8; Mar 2.1-12)

17Lapen arni isi alangli kethan ahut Pharisi lapen aron thekser atum hadak ingniphrong-lo. Halatum Galili adet lapen Judia arong an lapen Jerusalem penta vang-lo. Lapen bang atum aphan kepameji aphan Hemphu ajakong Jisu along dolo. 18Lapen chini iktha, monit atum inut kethiklak apinso aphan ahongplang pen nangcharchongsi vanlo lapen Jisu angno kebiji aphan hem kelutji abidi rilo. 19Monit ongpik apotsi lut pon thekthedetsi halatum hem asarnung athak arlu damsi sarnung kedip a-ita tereksi atar pen abang pen monit atum angbong Jisu angno nang pasunlo. 20Halatum akekroi thek longsi alangli pulo, “O monit, nang pap hei hei diya tang-lo.”

21Lapen aron thekser atum lapen Pharisi atum lam kechedan pangchengsi pulo, “Arnam aphan kepinrem alam kepu abang, la komatma? Arnam apar baduta pap diya un-e, kalima?”

22Bonta Jisu halatum kechedansei alam chinilorlo lapen thaksi halatum aphan pulo, “Nangtum aning arlo kechedan-sei alam kopi? 23‘Nangpap hei hei diya tang-lo,’ kalite ‘thurra kengkam chejortha,’ la sonni alam angbong kolo abangsi kepu kejoimuchotma? 24Bonta pirthe athak pap hei hei kediyaji monit asopo ajakong do, nangtum la kechinijisi aporman nangpaklangpo.” Alangli thi-klak abang aphan pulo, “Ne nangphan nangpulang, thurra nangtarthui cheponra nanghem chedamnon.”

25Lapen hala mamat halatum angno thursi alangli ke-i atar cheponsi Arnam anong pathesi ahem chedamlo. 26Lapen halatum manghuphrong-lo, lapen Arnam anong pathelo, lapen thirik-hursi halatum pulo, “Pini etum manghumeme akam thek-long-lo di komarli!”

Levi Aphan Jisu Kepha

(Mat 9.9-13; Mar 2.13-17)

27Lapen labangso aphi Jisu ingtan barlo, lapen Levi pu inut midu kerung abang aphan amaro along keching-nilun thek-longsi langding-lo. Jisu alangliphan pulo, “Ne phi phi nangdun non.” 28Lapen Levi amar atar che-o-etsi, thursi alangli phi phi dunlo.

29Ansi Levi amethang ahemsi Jisu aphan kecho-kejun ameipi pathikpilo. Halatum along midu kerung ake-ongpi atum lapen akaprek atumta ingni-dunlo. 30Pharisi atum lapen halatum abe kedun, aron thekser atum alangli sangho atum aphan pasimuhursi pulo, “Nangtum pi apotsi la midu kerung atum lapen papi atum pen cho rap-rap jun rap-rap ma?”#Luk 15.1-2

31Jisu thaksi halatum aphan pulo, “Apran mesen atum kali, kesodet atumsi daktor nangji. 32Dhoromi atum kali, bonta papi atum aning kecheruiji aphan kephajisi ne vang-lo.”

An Kehum Alam

(Mat 9.14-17; Mar 2.18-22)

33Bonta halatum alangliphan pulo, “Jon asangho atum abatai batai an humlo, lapen choningrisi Arnam ardombomlo lapen Pharisi atum asangho atumta lapu thakthak-lo, bonta nangsangho atum ke chobom lapen junbom.”

34Bonta Jisu halatum aphan thak-lo, “Piso kechepangri apinso abang dotik ke nangtum piso kepangri kedun atum aphan an pahum un-e, kalima? 35Bonta halatum adung pen kechepangri apinso abang aphan pon-detji, lapen halabangso ahut halatum an hum hurji, lason ahut vangji.”

36Lapen halatum aphan Jisu lamlir penta pulo, “Baduta achoi kemi pen achet ingseksi achoiban bangbe, bonta la klem lote alangli akemi ingsekji lapen achet kemita peban pen chingli-tledetji. 37Lapen baduta drakha ahor kemi ok-reng abong ban pen pangpenpe, kalite la klemlote drakha ahor kemi ke ok-reng abong pangbopsi amethang buphakji lapen ok-reng abongta virdetji. 38Bonta drakha ahorlang kemi ke ok-reng abong kemi pensi pangpenvek nangji. 39Lapen baduta drakha ahorban junversi akemi hanghe, pima ‘aban alang memu,’ pusi alangli puji.”

Currently Selected:

LUK 5: KARBIBSI

Highlight

Copy