JON 17

Jisu Amethang Asangho Atum Aphan Arnam Kardompi

1Jisu lahei hei alam pudet aphi sining anat langdingsi pulo, “Ahut nangletang-lo Po! Nang Sopo nangdak nangtur kepaklangthekji aphan nang nang Sopo adak atur paklangnon. 2Pima Sopo arideng nang kepitang atum an aphan alangli kejut un-e achethe kepithekji aphan nang alangliphan kadokave amonit aphuthak ajakong pitang-lo. 3Kejut un-e achethe ke nangphan, atheke Arnam binong, la nang inutpet aphan kechini lapen nang nangketoi a-Jisu Khristo aphan kechini helo. 4Pirthe athak ne nangdak nangtur paklangtang-lo, pima nang nephan nekepaklemtoi akam ne klem patangtang-lo. 5Pirthe pinchongche ako nang nenong kepathe asonthot-le nonta nang nangmethang angno nenong pathenon Po!

6“Pirthe athak nang nephan nekepi-tang amonit atum aphan ne nangdak nangtur paklang-lo. Halatum ke nangmethang amonit-lo. Nang halatum aphan nerideng nepilo, lapen halatum ke nanglam kroilo. 7Nang nephan nekepitang ason anke nang pensi vang-lo pu nonke halatum chinilo. 8Nang nephan nekethan alam ne halatum aphan thanlo, lapen halatum la deng-lo. Neke nang long pensi kevang, lake ahok pu halatum chinilo, lapen nangsi nephan netoilo pu halatum kroilo.

9“Ne halatum aphan nang ingno nangchoningripilo. Pirthe amonit atum aphan ke ne choningripipe, bonta nang nephan nekepitang amonit atum aphansi ne choningripilo. Pima latum ke nangmethang amonit atumlo. 10Ne long kedo amonit anke nangmethang amonit-lo, lapen halatum pen ajok nedak netur klangtang-lo. 11Non ne nanglong chevangpo. Non malomso aphi lote ne pirthe athak dodedetpo. Bonta halatum ke pirthe athak dobom-jilang. Po, Kangthir a-Bang! Etum isipet asonthot, halatumta isipet keplangji aphan nang nephan nekepi amen pen, atheke nang men ajakong pen nang halatum aphan raitha. 12Ne halatum along kedo ahut nang nephan nekepi amen pen, atheke nangmen ajakong pen ne halatum aphan railo. Lapen hastro alam kepachekokji aphan hala kevirdet nangji abang apar ke halatum angbong inutnatta virvedet-lo.#Lun 41.9; Jon 13.18 13Nonke ne nang long chevangpo. Ne ning ke-arong asonthot halatumta aning arong keplengsetji aphan ne pirthe athak lahei hei alam thanlo. 14Nang nephan nekepathantoi alam ne halatum aphan thantang-lo, lapen pirthe halatum aphan lang-remtang-lo. Pima neke pirthe aso kali asonthotsi halatumta pirthe aso kalilo. 15Nang halatum aphan pirthe athak pen pondet nangji pule ne nangphan nangkechoningri kali, bonta nang halatum aphan Kehingno a-Bang arideng pen keraiji aphansi ne nangphan nangchoningrilo. 16Ne pirthe aso kalidet asonthotsi latumta pirthe aso kalilo. 17Ahok alam penle nang halatum aphan chepanongtha. Nang lam ke ahok alamlo. 18Nang nephan pirthe athak neketoi asonthotsi neta halatum aphan pirthe athak toitang-lo. 19Halatumta ahokpet pen nangphan nangkechehodai thekji aphan, ne halatum aphan ajok nemethangsi nangphan nangchehodailo.

20“Ne halatum aphansi choningri-pichot-lo, lapu kali, bonta halatum kethan alam pen ajok nephan kekroi atum aphanta ne choningripilo. 21Halatum aning isipet keplangthekji aphansi ne choningrilo Po! Nang ke ne pen ning isipet, lapen neta nang pen ning isipet asonthot-le halatumta etum pen ning isipet paplangnang. 22Etum inutpet asonthot halatumta inutpet keplangji aphan nang nephan nekepi adak atur ne halatum aphan pilo. 23Nangsi nephan netoilo, lapen nang nephan nekanghon asonthotsi nang halatum aphanta inghonlo pu pirthe amonit atum kechiniji aphan, atheke halatum ning isipet keplang pamethekji aphan ne halatum pen ning isipet lapen nang ne pen ning isipet-lo.

24“Oh, Po! Nang halatum aphan nerideng nepitang-lo. Nang nephan nekepi adak atur halatum kethek longji aphan halatum ne kedoji adim nelong nangkedodunjisi ne ning hang-lo, pima pirthe pinchongche ako penta nangke nephan ne inghonlo. 25Po, dhoromi abang! Pirthe nangphan chinine, bonta neke nangphan chinilo, lapen nangsi nephan netoilo pu la sangho atum chinilo. 26Nang nephan akanghon halatumta kedoji lapen neta halatum along kedoji aphan nang komatma, lake ne halatum aphan pachinidak-lo, lapen ne la pachinibomjilang.”

Currently Selected:

JON 17: KARBIBSI

Highlight

Copy