JON 18
18
Jisu Aphan Kenep
(Mat 26.47-56; Mar 14.43-50; Luk 22.47-53)
1Jisu Arnam ardomdet aphi amethang asangho atum pen pen hadak pen barsi Kidron pu a-arlok parai damlo. Hadak isi apaiberi do. Jisu lapen asangho atum labangso apaiberi arlo damlo. 2Jisu aphan hotur arideng kehodai abang, Judas ke labangso adim chini, pima Jisu lapen asangho atum hadak abatai batai chetongdamlo. 3Lasi Roman aron-aso atum, lapen kurusar kethe atum lapen Pharisi atum nangketoidun Kardomhemthepi keton aron-aso atum aphan cheponsi Judas halabangso apaiberi along damlo. Halatum lemtem, thengtom lapen arisim hei hei cheponkreilo. 4Jisu aphan kopi pi plangjima, lake alangli chechinilo. Lasi alangli nangbarsi halatum aphan pulo, “Nanglitum komat aphansi kerima?”
5Halatum thakdunsi pulo, “Najareth a-Jisu aphan.”
Ansi alangli pulo, “Neli helo.”
Jisu aphan hotur arideng kehodai abang, Judasta halatum pen pen hadaksi arjaptherlo. 6Jisu halatum aphan, “Ne helo,” pu pudet aphi halatum aphi chiruichotsi longle athak kliruilo. 7Ansi Jisu halatum aphan puthulo, “Nanglitum komat aphansi kerima?”
Halatum pulo, “Najareth a-Jisu aphan.”
8Jisu pulo, “Neli helo pu neli nanglitum aphan nangthantang-lo. Nanglitum nephansi keri tangte la akaprek atum aphan ke padam longtha.” 9Alangli keputang alam, atheke “Nang nephan nekepitang atum angbong pen inutnat aphanta pavir longledet-lo Po,” pu alam kepachekokji aphansi alangli labangso alam pulo.
10Ansi Simon Pitorke amethang anokjir chesatsi Kurusar Kethenei aban aphan ano ar-e anat chorphlak-lo. Labangso aban amen ke Malchus pu helo. 11Jisu Pitor aphan pulo, “Nang nokjir ahom along chesekthunon. Po nephan nekepi aharlung ne jun nangnema?”#Mat 26.39; Mar 14.36; Luk 22.42
Jisu Aphan Annas Along Kepon
12Ansi Roman aron-aso atum lapen labangso aron-aso atum aphan hukum kepi abang, lapen Jihudi atum aphan angphun kerai atum Jisu aphan nepsi kok-lo. 13Ansi alangliphan aphrangke Annas along ponlo. Pima halabangso aningkan ke Kaiaphas helo Kurusar kethenei abang-lo, lapen Annas ke Kaiaphas ahupolo. 14Rat atum apharman inut amonit kethisi keme pu Jihudi atum angbong keja atum aphan kethan abang la Kaiaphas helo.#Jon 11.49-50
Pitor Kechekrongkre
(Mat 26.69-70; Mar 14.66-68; Luk 22.55-57)
15Simon Pitor lapen anut kaprek asangho Jisu aphi aphi dunlo. Hala anut kaprek asangho abang aphan ke Kurusar Kethenei abang chinilo. Lasi alangli ke Jisu along Kurusar Kethenei ahem thekup an lutdunlo. 16Bonta Pitorke inghap angtansi dokok-lo. Ansi hala anut kaprek asangho abang ingtan vangsi, lapen inghap kehon arloso pen chingkidamsi Pitor aphan arlo ponlo. 17Hala inghap kehon arloso Pitor aphan pulo, “Nanglita labangso amonit asangho inut-lo, Kalima?”
Pitor thakdunsi pulo, “Kali, neli ke kali.”
18Chungduk apotsi ban atum lapen keton aron-aso atum hokvai ame thorlo, lapen halatum arjapphrongsi me chinghip-lo. Lasi Pitorta dunsi halatum along arjapdunthersi me chinghipdunlo.
Kurusar Kethenei Abang Jisu Aphan Karju
(Mat 26.59-66; Mar 14.55-64; Luk 22.66-71)
19Ansi Kurusar Kethenei abang Jisu asangho atum alamjir lapen Jisu kethan alam alamjir Jisu aphan arjulo. 20Jisu thakdunsi pulo, “Neli ke kaiketa rat angnosi abangphutin aphan thanlo. Monit atum kechingrum adim, atheke Sinagog hei hei along lapen Kardomhemthepi alongsi thanlo. Neli ke thangta than chonghuhe. 21Tangte nangli kopisi nearjulangma? Neli kethan nangkarjudunlong atum aphanle arjunon. Neli kopi alamsi kethanma, la nangli halatum aphanle arjunon. Neli kethan alam halatum chinilo.”
22Jisu la pudet aphi Kardomhem-thepi keton aron-aso inut abang Jisu akecheng ardeptetsi pulo, “Nang kopusi Kurusar Kethenei aphan lason alamle kethakdun hailo!”
23Jisu thakdunsi pulo, “Neli jongsi kopine akechokche alam ningjetang-lo tangte neli akechokche alam ladak kedo abangphutin aphan than-pachininon. Bonta neli keningje alam jongsi chok tangte nangli kopi apotsi neliphan nekardepma?”
24Ansi Annas Jisu aphan paphlok-phledetsi Kaiaphas along, atheke Kurusar Kethenei along toilo.
Pitor Puthot Kechekrongkre
(Mat 26.71-75; Mar 14.69-72; Luk 22.58-62)
25Simon Pitor arjapthersi me chinghipdunlo. Ansi anut kaprek atum alangliphan pulo, “Nanglita labangso amonit asangho inut-lo, kalima?”
Bonta Pitorke chekrongkredetsi pulo, “Kali, neli ke kali.”
26Kurusar Kethenei aban inut abang pulo, “Neli nangliphan alangliphan pen pen paiberi arlo nangthek-long-lo, kalima?” Labangso aban ke hala Pitor ano kechorphlak abang adonlo.
27Pitor chekrong thuthedetsi pulo, “Kali.” Ansi hala mamat vo ejon kulo.
Jisu Aphan Pilat Along Kepon
(Mat 27.1-2,11-14; Mar 15.1-5; Luk 23.1-5)
28Adapprang halatum Jisu aphan Kaiaphas ahem pen ponsi govornor ahemthepi arlo ponlo. Jihudi atum ke hem arlo lutdundedet-lo, Pima halatum Kejok Kechemathadam Achojun a-Meipi along kechodunji aphan ingthirjir pen kedojisi aning hang-lo. 29Lasi Pilat nangbarsi halatum adung damlo lapen pulo, “Nanglitum labangso amonit aphan kopisi kedinma?”
30Halatum thakdunsi pulo, “Alang-lile kopine akehingno akam klemkle asonte nelitum alangliphan ladak nangli long vanvedetji apot-lo.”
31Pilat halatum aphan pulo, “Tangte nanglitum alangliphan ponra nangli-tum methangle nanglitum aron ateng pen ingsainon.”
Halatum thakdunsi pulo, “Nelitumke badu aphanta pathi longle.” 32Jisu keputang alam kepachekokji aphansi la plang-lo; atheke alangli kopusonsi thijima, lake alangli aphrang pen thanlo.#Jon 3.14; 12.32
33Pilat hem arlo chelutdamthulo lapen Jisu aphan hangsi arjulo, “Jihudi atum arecho nangli heloma?”
34Jisu thakdunsi pulo, “La nangli nekarju alam ke nangli methang kemathadam alamma, mate anut kaprek atumsi nangliphan neli lamjir nangthanloma?”
35Pilat thakdunsi pulo, “Nelita Jihudi amonit putong nangli kema-thama? Nangli methang amonit atum lapen kurusar kethe atumsi nangliphan neli rideng nehodailo. Nangli kopi akamsi keklemdet-loma?”
36Jisu thakdunsi pulo, “Neli ratke dak pirthe arat kali. Neli ratke dak pirthe arat-lo asonte neliphan Jihudi atum angbong keja atum arideng nepahodai longledetji aphan nerat aso atum ron chedanji apot-lo. Bonta neli ratke dak pirthe arat kali.”
37Lasi Pilat alangliphan pulo, “Tangte nanglike rechoma?”
Jisu thakdunsi pulo, “Nanglisi la nepulo. Kalang-lo, neli ke recholo. Neli ahok alamjir kethanjisi pirthe athak vangsi mahang nangthek-lo. Ahok abe atum anke neli lam arju.”
38Pilat alangliphan arjulo, “Ahok ke kopilo?”
Jisu Aphan Kepathiji Ahukum Kepi
(Mat 27.15-31; Mar 15.6-20; Luk 23.13-25)
Ansi Pilat ingtan nangbarthusi monit atum along damlo, lapen pulo, “Neli alangliphan thang adaita thek-longle. 39Bonta Kejok Kechemathadam Achojun a-Meipi ahut neli nanglitum aphan inut amonit nang pajokpi nangji, lason aron do. Neli nanglitum aphan Jihudi atum arecho nangpajokpi tamema?”
40Halatum hangjosi pulo, “Kali, alangliphan kali! Hala Barabbas aphanle pajoknon.” Barabbas ke inut akanghupi-lo.
Currently Selected:
JON 18: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
