JON 16

1“Nangtum kekroi keche-o-edetji aphansi ne nangtum aphan labangso alam nangpulo. 2Sinagog hei hei pen nangtum amen thanji, lapen nangtum aphan kepathi ke Arnam akamsi keklemlo pusi nangtum aphan kepathi abang mathaji, lason ahut vangji. 3Monit atum nangtum aphan lahei hei klemji, pima halatum Po aphan lapen nephanta chinine. 4Mo halatum lahei hei keklemji ahut nangle lote, ne nangtum aphan lahei hei alam nangthantang-lo pu nangtum kechemathathekji aphansi ne labangso alam nangpulo.

Karjong Kangthir Akam

“Kecheng ahut ke ne nangtum aphan lahei hei alam nangthanthedet-lo, pima halabangso ahut ke ne nangtum along dolang. 5Bonta nonke ne nephan neketoi abang along dampo. Tebonta ne konatsi kedamjima, lake nangtum baduta nephan ne arjuje. 6Non ne lahei hei alam nangkepu apot nangtum aning aduk plengset-lo. 7Ne nangtum aphan ahokpetsi nangpulang, ne ladak pen kedam ke nangtum aphan akemelo, pima ne ladak pen damdete Kerap abang nangtum along vangvedetji. Bonta ne ladak pen damlote ne alangliphan nangtum along nangtoiji. 8Mo alangli vang lote, pirthe amonit atum pap alamjir, dhoromi alamjir lapen Arnam akangsai alamjir kemathadam pachok-damde pu alangli halatum aphan pachinidakji. 9Halatum pap alamjir kemathadam pachokdamde, pima halatum nephan kroikrelo. 10Halatum dhoromi alamjir kemathadam pachokdamde, pima neke Po along dampo, lapen nangtum hala pen apara nephan thek-longledetji. 11Lapen kangsai alamjir halatum kemathadam pachokdamde, pima labangso apirthe kechari abang aphan ingsaitang-lo.

12“Ne nangtum aphan kethanji alam penang dolang, bonta non amat ke nangtum la an chinipet un-e. 13Mo Arnam alamjir ahok alam kepaklang abang, Karjong vang-lote, alangli nangtum aphan ahok alam an nangpachiniji. Alangli amethang aning kehang penle la keningjeji kali, bonta alangli karjulongtang alamsi ningjeji, lapen mo aphi keplangji alam hei heisi nangtum aphan nangthanji. 14Alangli ke ne nong patheji, pima ne kepu alam pensi alangli nangtum aphan thanji. 15Po amar anke nemarlo. Lasi neli pulo, neli kepi ason ensi Karjong nangtum aphan nangpachiniji.

Ningduk Lapen Ning Arong Alam

16“Non malomso aphi lote nangtum nephan nethek-longledetji, lapen hala pen malomso aphi nangtum nephan nethekthulongji.”

17Lasi sangho atum angbong manene atum lahin lahin chepulo, “La alangli kepu alam athe kopima? Non malomso aphi lote ilitum alangliphan thek-longledetji, lapen hala pen malomso aphi ilitum alangliphan thekthu longji pusi alangli pulo. Lapen alangli pulo, ‘Pima ne Po along dampo.’ 18La, ‘Malomso aphi,’ pu alam athe kopima? Alangli kopisi kepudamma, lake ilitum chinine.”

19Halatum alangliphan karjuji aning hang-lo pu chinisi Jisu halatum aphan pulo, “ ‘Non malomso aphi lote nangtum nephan nethek longledetji lapen hala pen malomso aphi nangtum nephan nethekthu longji,’ pusi ne pulo. Nangtum labangso alam athe kechinijisi lahin lahin charjuloma? 20Ne nangtum aphan ahokpetsi nangpulang, nangtum chiru chernapji, bonta pirthe ke aning arongji. Nangtum aning aduk doji, bonta nangtum aningduk ning arong plangji. 21Inut arloso oso amahang kepathekji dok dok ahut ke aning aduk do, pima alangli keduk kechechak nangji apor nangletang-lo. Bonta oso amahang thekdet lote alangli halabangso akeduk tengnedetji, pima pirthe athak inut a-oso amahang kethek apot alangli aning arong. 22Nangtumta lapuson thakthak-lo. Nonke nangtum aning aduk dolo. Bonta ne nangtum pen chetongthusi nangtum aning arong plengsetji, lapen baduta nangtum along pen labangso aning arong nangthipon un-edetji.

23“Mo halabangso arni ke nangtum nephan thangta ne arjujedetji. Ne nangtum aphan ahokpetsi nangpulang, nangtum ne men pen Po aphan kehang aling alangli nangtum aphan la nangpiji. 24Nangtum non anta ne men pen thangta chohanghelang. Nangtum aning arong keplengsetji aphan nangtum chohangnon, lapen nangtum la longji.

Pirthe Aphan Kehai

25“Lamlir pensi ne nangtum aphan lahei hei alam nangthanlo. Bonta lamlir pen kalipin pen ne nangtum aphan Po alamjir nangthandakji, lason ahut vangji. 26Mo halabangso arni nangtum ne men pen alangli long chohangji, lapen Po along ne nangtum aphan nangchoningripiji puke ne pupe. 27Pima Po amethangsi nangtum aphan nangchinghonlo. Atheke nangtum nephan ne inghonlo lapen neke Po along pensi vang-lo pu nangtum kroilo. 28Neke Po along pen vangsi pirthe athak nangdolo. Nonke ne pirthe otekangsi Po along chedampo.”

29Ansi asangho atum alangliphan pulo, “Nonke nangli lamlir pen kalipinsi ningjedak-lo. 30Nonke netum chinilo, nanglike kadokave alamta chinipet-lo, mane abang nangliphan karjuji akenang avelo.”

31Jisu thakdunsi pulo, “Nonke nangtum kroiloma? 32Bonta nangtum kadokaveta prat-etsi nangmethang methang ahem chedamji, lapen nephan inutpetsi ne-otekangbupji, lason ahut vangji; lapen nonta la vangtang-lo. Bonta neke inutpet kali, pima Po nelong do. 33Nangtum ne pen chelangpetsi ning kangsam kelongji aphan ne nangtum aphan labangso alam nangputang-lo. Pirthe nangtum aphan pasungji. Bonta ning thirklong penle donon! Ne pirthe aphan haitang-lo.”

Currently Selected:

JON 16: KARBIBSI

Highlight

Copy