AKAM 26

Pol Agripa Angno Kechethakdun Alam

1Ansi Agripa, Pol aphan pulo, “Non nangli kechethakdunji aphan apor nanglipilo.” Anke Pol ari chejarsi chethakdunlo: 2“Akehai, Agripa recho! Pini neli nangli ingno Jihudi atum neliphan kedin alam an kechethakdunlong apot, neli baha mepik-lo pusi neli mathalo. 3Pima jasemet ke Jihudi atum aron-atang lapen halatum kechehilisei alam an nangli chinipamelo. Lasi neli nangliphan choningrilo, nangli ning chepadingra neli kechethakdun alam arju iktha.

4“Neli bihek ako penta kopusonsi do-thak-loma, lapen neli kai arjon, atheke aphrangke neli nelimethang adet, lapen labangso aphi Jerusalem arongsopi kedo ahut neli kopusonsi dothak-loma, lake kadokave a-Jihudi atumta chinipet-lo. 5Neli ke aphrang ahut penta Pharisilo, atheke nelitum adhorom angbong aron kepasonei abe amonit-lo, lapen Pharisi amonit asonthotsi do-thak-lo pu halatum aphrang penta chinilo. Halatum jongsi aning hangte labangso alam ahaki nangcho dun un. 6Lapen nonke nelitum aphusar atum aphan Arnam kechaktang alam neli ning kethe kedo apotsi pini ladak neliphan kangsaiji aphansi neli arjap-lo. 7Nelitum akhei kur-krehini atum Arnam aphan ajo-anerlota ingduk ardombomsi la kechaktang ason kelongji aphan aning chethelo. Nelita labangso aning kethe kedo apotsi Jihudi atum neliphan lam nelidinlo, Recho Akehai! 8Arnam kethitang atum aphan pathurji pu alam ke kekroimeme alam kali pu nanglitum kopusi kemathama?

9“Ahok-lo, Najareth a-Jisu amen aphan kekhamkhe dunji aphan un an klem nangji pusi neli methangta aphrangke mathalo.#Akam 8.3; 22.4-5 10Lasi neli kematha asonthotsi neli Jerusalem arongsopi along klemlo. Neli kurusar kethe atum pen hukum longsi kangthir ake-ongpi atum aphan phatek beng-lo; lapen neli methangta halatum aphan kepathi ahut alam chedondunlo.#Akam 8.3; 22.4-5 11Neli along along asinagog damsi halatum aphan aduk panghoilo, lapen Arnam aphan papinremtoilo. Neli halatum aphan neli ning sopik-lo. Lasi halatum aphan kechenekji aphansi neli along kaprek kaprek arongsopi anta damlo.#Akam 8.3; 22.4-5

Pol Aning Kecherui Alam Kechethan

(Akam 9.1-19; 22.6-16)

12“Kurusar kethe atum pen hukum longsi, lapen halatum neketoi atengsi neli labangso akam aphan Damaskas arongsopi damlo. 13Ansi Recho Akehai, neli kedam un ahut nerlo chitim apor malom arni apar kethe-angmu atur sining pen vangsi neli lapen neli ri asangho atum aphan turphlak-lo. 14Nelitum kadokaveta longle athak kliruilo, lapen Ibri alam pen neliphan kepu ase neli arjulong-lo, ‘Sol, Sol! Nang kopisi nephan chenek-loma? Kechut-i achin aphan chainong atum kardak asonthak thaksi lake nangmethangsi soji.’ 15Ansi ne thakdunsi pulo, ‘Nang komatma, Hemphu?’ Lapen Hemphu nangthakdunsi pulo, ‘Neke nang kechenek a-Jisulo. 16Bonta thurra, arjapnon. Nangphan neban akam kepaklemjisi ne nangphan cheklang-lo. Pini nang nephan kethek-long lapen mo aphi ne nangphan kepaklangji alam an nang anut kaprek atum aphan than nangji. 17Ne nangphan Jihudi lapen Jihudi kalidet atum angbong nangtoipo, lapen ne halatum arideng pen nangphan pajokpo. 18Nang halatum amek ingpusi halatum aphan kangting angbong pen kethe-ang anatthu, lapen Soitan ajakong aber pen pajoksi Arnam anatthu van nangji. Anke halatum nephan kekroi pen ajok halatum apap hei hei diya longji, lapen Arnam kangvaitang amonit atum angbong halatum adim longji.’

Pol Amethang Keklem Akam Kechethan

19“Lasi Agripa Recho, neli kethek-long, sining pen kevang aning arjan neli kroikre-unedet-lo. 20Aphrangke neli Damaskas arongsopi along, labangso aphi Jerusalem arongsopi along lapen Judia adet adang an lapen Jihudi kalidet atum angbong than pachethangsi halatum amethang methang apap pen aning chiruisi Arnam anat kepangno nangji, lapen aning kecherui a-ot kedo akam hei hei keklem nangji alam neli thanlo.#Akam 9.20,28-29 21Labangso alam apotsi Jihudi atum neliphan Kardomhemthepi arlo nelinep-lo, lapen neliphan kepathiji bor-ilo. 22Bonta pini arni anta neli Arnam akerap longbomlo, lapen lasi neli ladak thedung lapen bihek atum an angno arjapsi haki chepilo. Arnam amontri atum lapen Moses kepu alam, 23atheke Khristo ke keduk kesung chechak nangji, lapen kethi pen kerengthucheng abang cheplangsi Jihudi lapen Jihudi kalidet atum angbong kethe-ang alamjir than-pachethangji pu alam apar ke neli thangta thanthedet-lo.”#Isa 42.6; 49.6; 1 Kor 15.20

24Pol lapuson lam kechethak dun ahut Festas alangliphan ase kethe pen pulo, “Pol, nanglike ingchamjam cheplangtang-lo! Nangli kethekthu-ong amatsi pangchamdet-lo.”

25Pol thakdunsi pulo, “Festas akehai, neli ke kepangcham kali! Neli ahok lapen ning kematha parsik pame pensi ningjelo. 26Agripa Recho! Nanglita lahei hei alam chinilo apotsi neli nangli ingno pherere pin pen la puhailo. Pima lahei hei akam ke konatne atoksi keplangdamjoi kalidet apotsi, lahei hei angbong esonnatta nangli nangkethekdunde ave pusi neli kroipamelo. 27Akehai Agripa Recho, nangli Arnam amonit atum aphan kroi ikma? Nangli kroi, lake neli chinilo!”

28Agripa, Pol aphan pulo, “Non malomsopet tong nangli neliphan Khristian kepadunji puma?”

29Pol thakdunsi pulo, “La malom-sopet angbong tame, kalite mo ajir dingklui aphi settame, nangli anchot kali, pini ladak neli lam nangkarjudun atum anta nelisonthot keplangji aphansi neli Arnam aphan choningrilo. Tebonta la ingchin ani pen kekok alam neli pudamde!”

30Ansi recho, govornor, Barnis lapen akaprek atum anta thurpak-lo, 31lapen hadak pen barsi halatum lahin lahin chepulo, “Labangso amonit ke kethimeme, kalite phatek kejangmeme akam thangta klemkle.” 32Agripa, Festas aphan pulo, “Labangso amonit Rom a-Recho aphan choningrire asonte alangliphan pajokphlot unji apot-lo.”

Currently Selected:

AKAM 26: KARBIBSI

Highlight

Copy