AKAM 25

Roman A-Recho Aphan Pol Kechoningri Alam

1Festas halabangso alongri nangledet pen nithom aphi alangli Sijeria pen Jerusalem damlo. 2Hadak kurusar kethe atum lapen Jihudi atum angbong keja atum alangli ingno Pol aphan kebok alam paklang-lo. 3Ansi Pol aphan Jerusalem kepavanjisi halatum Felix aphan choningrilo. Pima Pol vang-lote tovar ebeng alangliphan kepathijisi hala-tum pathik-lo. 4Festas thakdunsi pulo, “Pol ke Sijeria arongsopi phatek arlosi do, lapen hadak neli chedamthu dapprangji. 5Nanglitum angbong keja atum neli long Sijeria arongsopi nangpadunra alangli phuthak kopine alam dolote hadak-le alangliphan padin-nang.”

6Festas halatum along ni nerkep, kalite ni kep anbak dodet aphi Sijeria arongsopi chevoilo. Puthot arni alangli kangsai anghoi ingnisi Pol aphan kepavanji ahukum pilo. 7Pol nanglesi, Jerusalem pen kevang a-Jihudi atum alangliphan chekompetsi alangliphan kehingnopik alam hei hei bok-lo, bonta la kebok alam-heihei ahok pu aporman pithekthedet-lo. 8Pol chethakdunsi pulo, “Jihudi atum Aron aphuthak tame, kalite Kardomhemthepi aphu-thak tame, kalite Rom a-Recho aphuthak tame neli thang akechokche akamta klemkle.”

9Bonta Festas Jihudi atum aning kepadokjisi aning hang-lo. Lasi alangli Pol aphan pulo, “Nangli Jerusalem damsi hadak neli ingno nangliphan kebok alam hei hei apot nangliphan kangsaiji aphan nangli ning hangma?”

10Pol thakdunsi pulo, “Neli Rom a-Recho akangsai anghoi angnosi arjap-lo. Neliphan kangsai nangji adim ladak helo. Neli Jihudi atum aphan thang akechokcheta klemkle, lake nangli methangta chinipamelo. 11Neli jongsi aron ingdidet-lo, lapen kethi nangji, lapen lason adai kedo akam klemdet-lo, tangte, neli kethiji mome. Bonta jongsi latum neliphan kebok alam hei hei ahok kali, tangte, neliphan baduta halatum arideng kehodaiji ajakong ave. Neliphan kepangsaiji aphan neli Rom a-Recho aphansi choningrilo.”

12Ansi Festas kangsai amei amonit atum pen chingvaisi pulo, “Nangli Rom a-Recho aphansi choningrilo apotsi nangli Rom a-Recho along dam nangji.”

Agripa Lapen Barnis Angno Pol Kechethan Alam

13Penang arni aphi Agripa recho lapen Barnis atum Festas aphan kedengjisi alangli pen kardom kechepiji aphan Sijeria arongsopi vang-lo. 14Alanglitum hadak penang arni dolo. Lasi Festas, Agripa recho aphan Pol alamjir thansi pulo, “Felix phatek arlo ke-o-tekang amonit inut do. 15Neli Jerusalem kedam ahut Jihudi atum akurusar kethe atum lapen akesar atum alangli phuthak lam bok-lo; lapen alangliphan ingsaisi aduk inghoitu pusi neliphan choningrilo. 16Bonta nelitum Roman amonit atum ke, lam kedin atum lapen lam kepho atum angbong lam pachetokphroksi alam pachethakdun longletik ke, badu aphan tame, hala kedin atum arideng kehodaiji aron ave pusi neli halatum aphan thakdunlo. 17Lasi halatum ladak kevang pen mamat neli apor padamdedetsi puthot arni kangsai anghoi ingnilo, lapen halabangso amonit aphan neli ingno kevanji ahukum pilo. 18Alangliphan lam kedin atum thursi alangliphan kebok alam paklang-lo. Halatum alangliphan kopine kehingno alam hei hei bokji pusi neli mathalo. Bonta lason akehingno alam ke alangliphan thangta bokbedet-lo. 19Halatum amethang adhorom alamjir, lapen Jisu pu inut kethitang amonit alamjirsi halatum chedansailo. Pima labangso amonit ke reng-et pusi Pol pulo. 20Neli labangso alam ingsaisi alam keparaiji abidi chininedet-lo. Lasi Alangli Jerusalem damsi, alangliphan lahei hei kebok alam apot hadak alangliphan kangsaiji aphan ning hangma pusi neli Pol aphan arjulo. 21Bonta alangliphan chedanbang patonbom nangji, lapen alangliphan kebok alam apot Rechosi alangliphan ingsai nangli pusi alangli choningrilo. Lasi neli alangliphan Rom a-Recho along toithekthetik-ke alangliphan phatek kebengbomji ahukum pilo.”

22Ansi Agripa, Festas aphan pulo, “Neli methangta labangso amonit kechethakdun alam arju ingtungduk.”

Ansi Festas pulo, “Nangli alangliphan penap arjulongpo.”

23Puthot arni Agripa lapen Barnis ahir asang pen vangsi kangsai ahem angdeng lutdamlo. Chedanbang ahemphu atum lapen rongsopi angbong keja atumta halatum along nangdunlo. Festas hukum pisi Pol aphan pavanlo. 24Festas pulo, “Agripa recho akehai, lapen kechetong amonit atum! Nanglitum labangso amonit aphan thek-longhurlo! Alangliphan ingsai nangji pusi ladak lapen Jerusalem kedo a-Jihudi atum an neliphan choningrilo. Labangso amonit non pen apara reng longledet nangji pusi halatum hangjo josi pulo. 25Bonta alangli kethi nangji lason ado kedo akam keklem neli thek-longledet-lo. Lapen alangliphan Rom a-Recho angnosi ingsai nangji pusi alangli methang choningrilo apotsi neli alangliphan Rom a-Recho along ketoijisi pathik-lo. 26Bonta neli alangli lamjir Recho aphan ketokdunji alam thangta longthekthedet-lo. Lasi alangliphan karju patinidet aphi ketokdunji alam kelongji aphansi alangliphan nanglitum angno, lapen jasemet ke nangli Agripa recho angno vanlo. 27Pima kedin alam ketok pachinidundakde pen phatek kejang aphan ketoi ke mesen kali pusi neli mathalo.”

Currently Selected:

AKAM 25: KARBIBSI

Highlight

Copy