AKAM 27

Pol Telongpi Pen Rom Arongsopi Kedam

1Ansi nelitum telongpi pen Itali adet kedamji aphan pathik-lo. Lasi halatum Pol lapen phatek kejang amonit atum aphan Julias pu inut Chedanbang bang pharo ahemphu arideng hodailo. Julias ke, “Recho Kethe Chedanbang Asong,” pu Roman aron-aso asong ahemphulo. 2Nelitum Adramittiam arongsopi along Asia adet alongkam hei hei along kedamji dok dok atelongpi chethapsi barlo. Masedonia adet Thessalonika arong-sopi asor Aristarkhas pu inut amonitta nelitum along nangdunlo. 3Puthot arni nelitum Sidon arongsopi lelo. Julias ke Pol aphan ingjinsosi ajirpo atum alangliphan alangli kenangji ason kepapijisi alangliphan ajirpo atum along padamlong-lo. 4Hadak pen nelitum damthulo, lapen tomon nelitum aphan japsi khang-lo. Lasi nelitum Saipras alanglom, tomon abin anatthu telongpi pen damlo. 5Nelitum Silisia adet lapen Pamphilia adet kedai atalo kapsi Lisia adet Mira arongsopi lelo. 6Hadak Chedanbang bang pharo ahemphu Alekjendria pen kevang atelongpi Itali adet kedamji dok dok phodunsi alangli nelitum aphan halabangso atelongpi along nepachethap-lo.

7Nelitum penang arni dam pajo pajosi Noidas arongsopi le bor-i bor-a-lo. Nelitum aphan tomon japsi khang-lo apotsi nelitum aphrang anat ke damthekthedet-lo. Lasi nelitum Krit alanglom tomon atebin anatthu damsi Salmone kedai atalo kapponlo. 8Nelitum labangso alanglom akung kungsi damlo, lapen bor-i bor-a pen Lasia arongsopi adung kedo Fair Havens pu adim nanglelo.

9Hadak nelitum penang arni keding dolo, pima An Kehum Amei littang-lo apotsi telongpi pen kedam ke pherememelo. 10Lasi Pol halatum aphan paresi pulo, “Akehai atum, neli thek-long-lo, ilitum ladak pen talo atovar kedam ke pherememelo, pima ilitum ladak pen damlote kethap amar lapen telongpi anchot kali, ilitum methang amatta virji.” 11Bonta Chedanbang bang pharo ahemphu Pol kepu alam arjujedetsi telongpi kevekpon abang lapen telongpi ahemphu kepu alamsi kroirong-lo. 12Halabangso alongkam ke ningkreng ahut kedo mesen adim kalidet apotsi ongmuchot atum ke telongpi pen kedamjisi aning hang-lo. Lasi hadak pen damsi, unte ningkreng esek ke Phonix pu adim kedoji aphansi hadak pale nangji pu kepu atum ongmunak-lo. Pima Phonix ke Krit alanglompi along kedo Nichi-nitur lapen nichi-nirep anat kepangno alongkamlo.

Talo Angbong Tomon Thepi Kepho Alam

13Ansi nitur anat pen tomonso kevangji pangcheng-lo. Lasi halatum aning kematha alam pleng unpo pu mathasi telongpi kekok ari phlok-lo lapen Krit alanglompi dailap damlo. 14Bonta malomso aphi lang-lompi anat pen, Nirep-Nihang pu atomonthepi vangphlut-lo. 15Ansi telongpi hala-bangso atomon thepi pholok-lo, lapen telongpi aphrang anat dam un-edet-lo. Lasi nelitum telongpi lophlotsi tomonpi kejap aling nelitum aphan papondet-lo. 16Ansi nelitum Kada pu alanglomso anitur anat damsi tomonpi asapso chetebin long-lo. Hadak nelitum telongpi atelongso van bor-i bor-alo. 17Hala telongpi athak rungsi phamri kethe pen telongpi pen phan-rapthip-lo. Bonta Libia adet akung asangti ajo anat damra telongpi chingthang-lokna pu mathasi halatum pherelo. Lasi halatum telongpi ape parunlo, lapen lapusonsi telongpi aphan tomon paponlo. 18Tomon jasemet japsi telongpi aphan paleng-longtong-lo. Lasi puthot arni halatum telongpi along kethap penang amar talo along kevarji pangcheng-lo. 19Lapen puthot arnithu halatum amethang ari pen telongpi ajehak ajoton talo along var-et-lo. 20Penang arni nelitum arni lapen chiklolongso hei heita thek-longledet-lo, lapen tomon jasemet japbomlo. Lasi aphi ke nelitum kejokji aphan ning chethethepinlo.

21Hala monit atum kecho longle kejun longle ajirdingkluilo apotsi Pol halatum angbong arjapsi pulo, “Komarli atum, nanglitum neli lam arjura Krit alanglom pen vangvedet asonte lahei hei akesung phojokphlotji, lapen hormu hortar anta virvedetji apot-lo. 22Bonta nonke neli nanglitum aphan choningrilo, nanglitum ning chepathirklong pen donon! Pima nang-litum angbong baduta thithedetji, la telongpi ansi virchotji. 23Pima tove neli Arnam, atheke neli kangdukbom a-Arnam apherangke nelidung arjap-thersi, 24neliphan pulo, ‘Phereri, Pol! Nang Rom a-Recho angno arjap nangjilang. Lapen Arnam nangphan ingjinsosi nang pen telongpi kechethap rap rap atum an aphanta pajoktang-lo.’ 25Lahelo komarli atum, nanglitum ning thirklong pen donon. Pima neliphan kepu asonthotsi la plangpo pu neli Arnam aphan kroithip-lo. 26Bonta ilitum aphan konatne alanglom an epondetpo.”

27Ni krephli kechok aningve tomon-thepi nelitum aphan Adria atalo an nepondet-lo. Jirlo malom telong kevekpon atum langkung nanglelobon pusi mathalo. 28Lasi halatum lang punlo, lapen la karnuk lam ingkoi long-lo. Malomso aphi halatum punthusi lang karnuk lam krepho dolang pu chinilo. 29Ansi nelitum atelong arlong phodaina pu pheresi halatum telongpi akandar anat pen ingchin akongvek phli paklolo, lapen adap kepangthang dapji aphan Arnam ardomlo. 30Ansi telong kevek atum telongpi pen kekatji abidi rilo. Lasi halatum telongso lang along pasunlo, lapen palem lemsi telongpi aphrang anat pen ingchin akongvek penangbak kepakloji ason paklang-lo. 31Bonta Pol chedanbang bang pharo ahemphu lapen chedanbang atum aphan pulo, “Telong kevek atum telongpi arlo dodete, nanglitum jok un-e.” 32Lasi chedanbang atum telongso ari hei hei chorpetsi la lophlot-lo.

33Adap the-ang prinprele ahut halatum kedo an aphan kechoji ason pachotoisi pulo. “Nanglitum pini an ni krephli thangta choche junjesi inghongphrongbomlo. 34Lasi neli nanglitum aphan choningrilo, nangli-tum an chotha. Nanglitum kerengji aphan lake akenangsot-lo. Nanglitum angbong baduta achu ejeng natta virvedetji.” 35Pol labangso alam pudet aphi penangbak ahim enlo, lapen kadokave angno Arnam aphan kero pisi la beng-lo, lapen kechoji pang-cheng-lo. 36Halatum kadokaveta aning chepathir si cholo. 37Telongpi arlo nelitum kadokave bang pharo hinira throksi kep-ra throk dolo. 38Ansi halatum ingkrangling an cholo, lapen telongpi keparjangji aphan sok tepli do an talo along var-et-lo.

Telongpi Keru

39Adap the-angdang aphi telong kevek atum halabangso adim chini-nedet-lo, bonta talo akung asangti mili thek-long-lo, lapen unte hadak telongpi kepachingthang-lokji aphansi halatum pathik-lo. 40Lasi halatum ingchin akongvek ari an chor-etsi talo arlo lotekangphlot-lo. Halabangso ahut mamat halatum telongpi kepakeng-i alongpi hini kekok-i arita phlok-lo, lapen telongpi aphrang anat ape tarthusi halabangso asangti mili anat damlo. 41Bonta telongpi sangti survuksi longle phorok-lo. Telongpi aphrang akandar ke tongrutsi chingthang-lok-lo, lapen aphi akandar abang ke talo alang angsum ketong pen ajok rurailo.

42Ansi hala phatek kejang atum an lang vek-ra kat-etna pu mathasi chedanbang atum halatum kadokave aphan kepathijisi mathalo. 43Bonta chedanbang bang pharo ahemphu Pol aphan kepajokji aning hang-lo. Lasi alangli halatum aphan labangso akam paklemlongledet-lo. Tebonta lang kevekthek atum aphan ke telong pen lang pachonchui chuisi talo akung anat pakaptoilo. 44Lapen kedolang atum aphan ke kapat achet kalite telongpi abeng achet athak pachiripsi pakapduntoilo. Ansi halatum do-anta kora kapsi jokpet-lo.

Currently Selected:

AKAM 27: KARBIBSI

Highlight

Copy