AKAM 22
22
1“Korte marli, lapen po marli atum, non neli kechethakdunji alam arjutha!”
2Alangli halatum aphan Ibri alam pen kepu arjulongsi halatum doklip muchot-lo. Ansi Pol puthulo:
3“Neli ke Jihudi amonit-lo, lapen Silisia adet Tarsas arongsopisi neli mahang thek-lo. Bonta neli Jerusalem arongsopi alongsi the-ding-lo lapen Gamalielsi neliphan athikpet pen ephusar atum Aron nelithanpet-lo. Pini ladak kedo, nanglitum abangphutin asonthotsi nelita Arnam aphan matha-elo.#Akam 5.34-39 4Labangso atovar kekroi atum aphan ne cheneksi pathilot anta klemlo, lapen pinso, arloso atum aphanta nepsi phatek beng-lo.#Akam 8.3; 26.9-11 5Ne ahok alamsi thanlo, lake Kurusar Kethenei abang lapen Jihudi Ameipi amonit atum anta haki nangchodun un. Alanglitum Damaskas arongsopi kedo a-Jihudi atum aphan ketok aloh neli ponsi hadak kedo, labangso amonit atum aphan kenepji, kekokji lapen aduk kepiji aphan neli latum aphan Jerusalem kevanjisi neli hadak damlo.”
Pol Aning Kecherui Alam Kechethan
(Akam 9.1-19; 26.12-18)
6“Neli damsi Damaskas arongsopi leji dokdok ahut, nerlo chitim apor malom sining pen men men kethe-ang atur vangsi nedung bithe bitha turphlak-lo. 7Neli longle athak krepbup-lo, lapen neliphan kepu ase neli arjulong-lo, ‘Sol, Sol! Nang kopi apotsi nephan chenek-loma?’ 8Ne arjudunlo, ‘Nangli komatma, Hemphu?’ Hemphu nephan pulo, ‘Neke Najareth a-Jisulo, hala nang kechenekbom abang-lo.’ 9Neri asangho atumta halabangso akethe-ang atur thek-long-lo, bonta halatum ke nephan kepu ase arjulongledet-lo. 10Neli arjudunlo, ‘Neli kopisi klem nangjima, Hemphu?’ Hemphu neliphan pulo, ‘Thurra Damaskas damnon. Nang keklem nangji akam Arnam kopi pi pathiktang-loma, lake hadaksi nangphan thanpetpo.’ 11Halabangso akethe-ang atur neliphan keturphlak pen ajok nelimek checharchedet-lo. Lasi neliri-asangho atum neliphan neri-ponsi Damaskas arongsopi neliponlo.
12“Halabangso arongsopi along Ananias pu inut dhoromi amonit dolo. Alangli ke ilitum Aron kekroi thirklong abang-lo lapen hadak kedo a-Jihudi atum an alangliphan aman pi-olo. 13Alangli nedung vangsi arjaptherlo, lapen pulo, ‘Korte, Pol, nangli mek checharthunon!’ Hala mamat nelimek checharthulo, lapen neli alangliphan langding-lo. 14Ansi alangli pulo, ‘Nangli ephusar atum a-Arnam aning kehang alam kechiniji, Arnam Aban, dhoromi abang aphan kethek-longji lapen alangli kepu ase karjulongji aphansi Arnam nangliphan ingvaitang-lo. 15Pima nangli kethek-longtang lapen karjulongtang alam an kadokave amonit aphan kethanji aphan nangli alangli haki plangji, 16lapen nonke nangli kopisi paderbom nangjilangma! Thurra, baptisom ennon, lapen alangliphan ardombomra nangli pap hei hei chepakak-etnon!’
Jihudi Kalidet Atum Aphan Kethanjisi Pol Aphan Kepha
17“Ansi neli Jerusalem chevoithulo, lapen ne Kardomhemthepi arlo Arnam kardom ahut ning arjan thek-long-lo. 18Neli ning arjan along neli Hemphu aphan thek-long-lo. Hemphu neliphan pulo, ‘Paprapnon! Jerusalem pen barseraknon. Pima nang nelamjir kethan alam ladak kedo amonit atum dengdedetji.’ 19Neli thakdunsi pulo, ‘Hemphu,’ neli sinagog hei hei along damsi nangliphan kekroi atum aphan nep-lo, phatek beng-lo lapen chok-lo, lake halatum chinihurlo. 20Lapen nangli haki keplang abang, Stephan aphan kepathi ahut nelita hadaksi dolo, lapen alangliphan kepathi che-dondunlo, lapen alangliphan kepathi atum ape-ari honpilo!#Akam 7.58 21Ansi Hemphu neliphan pulo, ‘Damnon, pima ne nangphan heloving kedo, Jihudi kalidet atum angbong nangtoipo.’”
22Armu atum Pol lapu-an kepu alam ansi arjudunchot-lo; labangso aphi ke halatum ase dotik pen hangsi pulo, “Alangli pen chepahelonon! Alangliphan pathinon! Alangli kereng nangji a-ot ave!” 23Halatum jasemet hangjo josi amethang methang ape lapen sangti aduk angsong varlo. 24Ansi chedanbang bang suri isi ahemphu abang Pol aphan chedanbang ahem arlo kepaponji ahukum pilo, lapen monit atum kopi apotsi alangliphan la-an hangjo joloma, la kechiniji aphansi alangli amethang aron-aso atum aphan Pol aphan champre abu pen kepachokji ahukum pilo. 25Bonta kepachokjisi Pol aphan kekokhet ahut, Pol hadak karjapther, chedanbang bang pharo ahemphu aphan pulo, “Ado kechiniji aphan ingsaise ako Roman amonit aphan kechokji aron doma?”
26Labangso alam arjulongsi chedan-bang bang pharo ahemphu abang hala chedanbang bang suri isi ahemphu aphan thandamsi pulo, “Nangli kopisi keklemloma? Labangso amonit ke Roman amonit-lo.”
27Lasi chedanbang bang suri isi ahemphu abang Pol adung vangsi arjulo, “Neliphan nethantha, nangli Roman amonitma?”
Pol thakdunsi pulo, “Kalang.”
28Chedanbang bang suri ahemphu abang pulo, “Neli ke tangka pi-o pensi Roman amonit plang-lo.”
Pol thakdunsi pulo, “Bonta neli ke mahang kethek penta Roman amonit-lo.”
29Anke alangliphan lam karjuji dok dok amonit atumta hala mamat alangli dung pen dam et-lo. Lapen Chedanbang bang suri isi ahemphu abangta Pol ke Roman amonit-lo pu chinisi lapen alangliphan pakokdet-lo apotsi pherelo.
Mei Angno Pol Karjap
30Jihudi atum Pol aphan kopi apotsi adai tinloma, labangso alam chedanbang bang suri isi ahemphu abang kechini pameji aning hang-lo. Lasi puthot arni alangli Pol aphan kekok ari phlokjok-lo, lapen kurusar kethe atum, lapen Jihudi atum kangsai Ameipi amonit atum an kechingrumji ahukum pilo.
Currently Selected:
AKAM 22: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
