AKAM 23

1Pol Kangsai-Amei amonit atum aphan langdingsi pulo, “Israel Akorte-marli atum! Pini arni anta neli ke Arnam angno neli Ning-ingthin klar-et pensi dobomlang.” 2Ansi Pol angho along kepatengji aphan Anna-nias pu akurusar kethenei abang hala Pol adung karjapphrong atum aphan hukum pilo. 3Pol alangliphan thakdunsi pulo, “Oh, Saini kevittang a-arpong! Arnam chenamsi nangphan nangchokpo. Aron ateng pen neliphan kangsaiji aphansi nang hadak ing-nilo, bonta nangmethang ke nephan kepachokji ahukum pisi Aron ingdilo!”#Mat 23.27-28

4Pol adung kedo amonit atum alangliphan pulo, “Nang kopusi Arnam a-Kurusar kethenei aphan lason alam kepu hailoma?”

5Pol thakdunsi pulo, “Alangli kurusar kethenei abang-lo puke neli chininedet-lo, Israel akorte marli atum! Pima ‘rat ahemphu aphan putot-ri pu hastro along ketok do.’”#Keba 22.28

6Armu angbong penang atum ke Pharisi atumlo, lapen akaprek atum ke Saduki atumlo pu chinisi Pol Mei angbong kehang pen pulo, “Israel Akorte marli atum! Neli ke Pharisi amonit-lo, lapen Pharisi atum aso lo. kethitang atum rengthusi thurji pu nening kethe kedo apotsi nephan ladak ne ingsailo!”#Akam 26.5; Phili 3.5

7Alangli labangso alam pudet aphi Pharisi lapen Saduki atum angbong kechebohongji pangcheng-lo, lapen halatum angbong abe hini dokok-lo. 8(Pima Saduki atum ke kethitang atum akethur ave, sining apherangke lapen karjongta ave pusi pulo; bonta Pharisi atum ke la kadokaveta do pusi kroilo.)#Mat 22.23; Mar 12.18; Luk 20.27 9Kehangjo ase thethumuchot-lo, lapen Pharisi abe atum angbong pen aron thekser penang atum thursi lam kechedan pen pulo, “Labangso amonit aphan nelitum thang adaita thek-longle. Karjong kalite sining apherangkesi alangliphan kethan binong tahailo!”

10Halatum angbong lam chedanseisi huripik-lo apotsi Pol aphan ingsek-ipo pusi chedanbang bang suri isi ahemphu abang pherelo. Lasi alangli chedanbang atum aphan armu atum angbong toisi halatum arideng pen Pol aphan vansi chedanbang ahem arlo kepaponji ahukum pilo.

11Halabangso aningve Hemphu Pol adung arjapthersi pulo, “Phereri! Nang ladak Jerusalem along nehaki kepi asonthotsi Rom arongsopi angbongta nehaki pinangji.”

Pol Aphan Kepathiji Kepathikjoi Abidi

12Puthot adap Jihudi penang atum chingvaisi alam pathik-lo. Halatum Pol aphan pathithe tik ke thangta choche, junje pusi semetang-lo. 13La kehingno abidi kechepathik atum bang phlikep soselo. 14Halatum kurusar kethe atum lapen akesar atum along damsi pulo, “Netum Pol aphan pathithetik ke thangta choche pusi semetang-lo. 15Tangte nonke nanglitum lapen Jihudi atum kangsai amei amonit atum Chedanbang bang suri ahemphu along monit toira, nanglitum Pol aphan ansose kangsai pamejisi ning hang-lo apotsi alangliphan nanglitum angno van nangji pule kepalemlem pen pathan damnon. Anke Pol nanglitum adung nanglele ako nelitum alangliphan kepathiji aphan chesikdingpo.”

16Bonta Pol angjirpi asopo labangso kepathiktang alam arjulong-lo, lasi alangli chedanbang ahem arlo damsi Pol aphan labangso alam thandamlo. 17Ansi Pol chedanbang bang pharo ahemphu inut aphan hangsi pulo, “Labangso ariso aphan chedanbang bang suri ahemphu along pontha. La alangliphan kopine kethanji alam do.” 18Ansi alangli halabangso ariso aphan chedanbang bang suri ahemphu adung ponsi pulo, “Hala phatek arlo kedo a-Pol neliphan hangsi labangso ariso aphan nanglidung pontha pusi neliphan choningrilo; pima labangso ariso nangliphan kopine kethanji alam do pusi pulo.”

19Chedanbang bang suri ahemphu abang halabangso ariso aphan ari otponsi ihi anat ponlo, lapen arjusi pulo, “Nangli neliphan kethanji alam kopima?”

20Halabangso ariso pulo, “Jihudi atum angbong keja atum penap nanglidung vangsi Pol aphan Jihudi atum Kangsai Amei angno vantu pusi nangliphan kechoningriji aphan pathiktang-lo. Kangsai Amei amonit atum Pol aphan ansose kangsai pamejisi aning hang-lo pusi halatum kepalem lem pen nangliphan thanji. 21Bonta nangli halatum alam kroiri; pima halatum angbong pinso amonit bangphlikep sose atum ke Pol aphan pathithetik ke thangta choche-junje pusi semetang-lo. Lasi halatum alangliphan kepathiji aphan chepatujoisi tondingji. Non halatum labangso akam keklemjisi chesikding-lo, lapen nangli keparaiji alam aphansi inghongphrong-lo.”

22Chedanbang bang suri ahemphu abang halabangso ariso aphan pulo, “Nangli neliphan labangso alam thanlo puke nangli badu aphanta thanri.” Ansi alangli halabangso ariso aphan padamjuilo.

Pol Aphan Govornor Felix Angno Kepon

23Ansi chedanbang bang suri ahemphu abang hala chedanbang bang pharo ahemphu aphan hukum pisi pulo, “Sijeria arongsopi kedamji aphan akeng pen kedam aron-aso bang pharo hini, losei kardon aron-aso bang throksi kep lapen chir kejor aron-aso bang pharo hini pathiknon, lapen hadak kedamji aphan chesiknon. 24Pol kardonponji aphan losei kalite gadha hei hei pathiknon, lapen thang akesung avepin pen alangliphan Felix Govornor akeng-ri ponnon.” 25Ansi chedanbang bang suri ahemphu abang loh tok-lo. Alangli ketok lapuson helo:

26“Neli Klodias Laisiassi labangso aloh, nangli, Felix govornor akehai aphan tok-lo: Kardom deng-iktha. 27Jihudi atum labangso amonit aphan nepsi pathiji dok dok-lo. Halabangso ahut neli chedanbang atum ponsi alangliphan halatum arideng pen pajok-lo. Alangli ke Roman amonit-lo pusi neli arjulong-lo. 28Halatum alangliphan adai ketin alamthe neli kechinijisi ning hang-lo; lasi neli alangliphan halatum akangsai amei along ponlo. 29Halatum amethang aron kopine alam apotsi alangliphan adai tinlo. Bonta alangli kethi nangji, kalite phatek kedo nangji, lason adai kedo akam ke alangli thangta klemklelo, lake neli thek-long-lo. 30Lapen alangliphan kepathiji abidi pathiktang-lo pusi neliphan thanlo; lasi hala mamat neli alangliphan nangli kengri nangketoiji aphansi pathik-lo. Alangliphan adai ketin atum nangli ingnosi alangliphan kebok alam kepaklangji aphan neli hukum pilo.”

31Alangli hukum kepi asonthotsi chedanbang atum klemlo. Pol aphan endamsi, halabangso aningve mamat alangliphan Antipatris arongsopi an ponlo. 32Puthot arni akeng pen kedam aron-aso atum ke chedanbang ahem along nangchevoilo, bonta Pol along kepadun losei kardon aron-aso atum aphan ke hadaksi otekang-lo. 33Ansi halatum Sijeria arongsopi lesi Govornor aphan halabangso aloh pilo, lapen Pol aphan alangli rideng hodailo. 34Govornor halabangso aloh porhesi Pol aphan arjulo, “Nangli kolobangso adet amonit-lo?” Ansi Pol ke Silisia adet amonit-lo pu chinisi, 35alangli pulo, “Nangliphan adai ketin atum ladak nangle lote neli nangli lam arjupo.” Ansi Pol aphan Herod recho ahem along bidamsi alangliphan honpametu pu ahukum pilo.

Currently Selected:

AKAM 23: KARBIBSI

Highlight

Copy