AKAM 21

Pol Jerusalem Kedam

1Nelitum halatum pen chepa-didetsi damlo. Ansi telongpi pen kekengset atovar damsi nelitum Kos alanglom lelo. Puthot arni nelitum Rods alanglom lelo, lapen hadak pen damthusi Patara lelo. 2Hadak nelitum Phinis atum adet kedamji atelongpi phodunlo. Lasi nelitum telongpi chethapsi hadak pen barlo. 3Nelitum Saipras pu alanglompi thek-longchit an nangkele ahut telongpi Saipras anitur anat tevarsi Siria adet anat damlo. Ansi nelitum Tair arongsopi nanglelo, pima hadak halabangso atelongpi amar otekang-lo. 4Hadak kekroitang penang atum aphan nelitum chetongsi halatum along erui an dodunlo. Halatum Karjong pen jakong longsi Pol aphan pulo, “Nangli Jerusalem damri.” 5Bonta hadak kedo nangji arni an choksi nelitum hadak pen barlo. Halatum do-an, apiso lapen asomar atum pen pen nelitum aphan rongsopi angtan an nethon dunsi, talo akung nelitum kadokave kengphu patongruisi Arnam ardomlo. 6Ansi nelitum halatum pen lahin lahin chepadisi telongpi chethap-lo, lapen halatumta amethang ahem chedamlo.

7Nelitum Tair arongsopi pen dam-thusi Tolemais pu arongsopi an telongpi pen lelo. Hadak kekroitang atum pen nelitum kardom chepilo, lapen halatum along arni isi dokok-lo. 8Puthot arni nelitum hadak pen barsi Sijeria arongsopi lelo, lapen hadak nelitum Philip pu inut Birta Keme kepachethang abang ahem dodamlo. Alangli ke Jerusalem amondoli mate kroi-asong along kam kepacherapdunji aphan kangvaitang bangthroksi angbong pen inut abang-lo.#Akam 6.5; 8.5 9Alangli asopi bangphli dolo. Halatum okarjang-lang lapen halatum ke Arnam alam kemontri atumlo. 10Nelitum hadak penang arni kedo ahut, Agabas pu inut Arnam alam kemontri abang Judia adet pen vang-lo.#Akam 11.28

11Alangli nelitum along vang-lo, lapen Pol avamkok ensi amethang akeng lapen ari chingnangsi pulo, “Karjong Kangthir lasonsi pulo, Jerusalem along Jihudi atum labangso avamkok ahemphu aphan lason ingnangsi Jihudi kalidet atum arideng hodaiji.”

12Labangso alam arjulongsi, nelitum lapen hadak kedo amonit atum Pol aphan Jerusalem dam nangnelo pusi choningrilo. 13Bonta alangli nangthak-dunsi pulo, “Nanglitum lason kechiru lapen neli ning aduk kepi athe kopima? Pima Jerusalem along neliphan kangnangji aphan neli chesik-lo, lapu anchot kali, bonta Hemphu Jisu aphan ajok hadak neli kethiji aphan anta chesik-lo.”

14Alangli nelitum alam kekroiji aning hanghedet-lo, lasi nelitum alangliphan kepakroiji bor-i-edetsi pulo, “Hemphu aning kehangle paplengnang.”

15Hadak nelitum penang arni padamdet aphi nelitum ahormu kedo an chesiksi Jerusalem kedamji aphan barlo. 16Sijeria pen kevang, sangho penang atumta nelitum along nangdunlo. Saipras alanglom along kedo Manason pu abang ahem halatum nethondunlo. Alangli hem kedoji aphansi nelitum aphrang pen pathik-lo. Manason ke sangho keplang paphrangcheng atum angbong pen inut-lo. Alangli nelitum aphan chak-lo.

Jems Along Pol Kedam

17Nelitum Jerusalem nanglesi kekroitang atum aning arong pen nelitum aphan chak-lo. 18Puthot arni Pol lapen nelitum kadokave Jems along damlo. Hadak mondoli akesar atum anta dopet-lo. 19Pol halatum pen kardom chepilo, lapen alangli keklem akam pen ajok Arnam Jihudi kalidet atum angbong keklem alam an halatum aphan thanpet-lo. 20Hala-tum labangso alam arjulongsi Arnam anong pathelo. Ansi halatum Pol aphan pulo, “ Korte Pol, Jihudi atum angbongta kekroi atum suri suri dolo, lapen halatum kadokaveta Aron aphan chemathapik-lo, lake nangli thek-long-lo. 21Bonta Moses Aron kroinangne, atheke halatum amethang asopo atum aphan reng-rot pi nangne lapen Jihudi atum aron-atang hei hei kroi nangnelo pusi nangli hala Jihudi kalidet atum adet angbong kedo a-Jihudi atum aphan thanlo pusi latum arjulong-lo. 22Nangli ladak vangtang-lo pu halatum jonghe setta arjulongji. Tangte ilitum kopisi klem apot-loma? 23Nelitum nangliphan kethan asonthot-le nangli klemnon. Ladak seme kedengtang amonit bangphli do.#Kela 6.13-21 24Nangli latum along dunra, latum pen pen nangmethang chepangthir damnon, lapen latum achu kechesoiji anam pinon. Anke latum achu chesoi thekpo. Lasonsi nangliphan kebok alam eson natta ahok kali, bonta nanglike ahokpetsi Moses Aron kroibomlo pu kadokave atum chinipo.#Akam 15.29 25Bonta Jihudi kalidet atum angbong pen kekroitang atum aphan ke loh toksi ilitum keparaitang alam, atheke Sekarkli amar, avi lapen kokthat api a-ok chonangne lapen beisa akam klemkledet nangji pusi thanlo.”#Akam 15.29

26Lasi Pol halabangso amonit atum aphan ponsi puthot arni halatum pen pen chepangthirlo. Ansi alangli Kardomhemthepi Kangthir arlo dunlo, lapen halatum abangphutin kechepangthir arni komantu jutjima, lapen kopi a-arnisi halatum abang-phutin aphan ajok athok thok nangjima, lahei hei alam thandunlo.

Kardomhemthepi Arlo Pol Aphan Kenep

27Bonta ni throksi jutji dok dok ahut Asia adet pen kevang a-Jihudi atum Pol aphan Kardomhemthepi arlo thek-long-lo. Halatum armu atum aphan chorung chojarsi Pol aphan panep-lo, 28lapen halatum hangjosi pulo, “Israel amonit atum, nelitum aphan nerap dunnon! Bithe bitha adim damsi ilitum amonit atum aphan, Moses Aron lapen la Kardomhemthepi Kangthir kephangnodakji alam kadokave atum aphan kethan abang labangso amonit helo. Lapen nonke alangli Jihudi kalidet amonit atum aphanta Kardomhemthepi arlo vansi la kangthir adim pahijimlo.” 29(Pima halabangso aphrang, rongsopi angbong Pol along Ephesas asor, Trophimas aphan halatum thek-long-lo. Lasi Pol alangliphan Kardomhemthepi arlo ponlo pu halatum mathasi labangso alam pulo.)#Akam 20.4

30Rongsopi adang an huriseilo, lapen monit atum bithe bitha pen nangkat phro phrosi Pol aphan nep-lo, lapen alangliphan Kardom a-Hemthepi arlo pen ingtan chethurponlo. Hala mamat Kardom a-Hemthepi anghap inghap-et-lo. 31Halatum alangliphan kepathijisi bor-ilo. Bonta Jerusalem angbong huriseilo pu alam halabangso ahut mamat Chedanbang bang suri isi ahemphu aphan thandamlo. 32Hala mamat alangli chedanbang bang pharo ahemphu atum aphan, lapen chedanbang atum aphan ponsi rat atum anglum vang-lo. Armu atum alangliphan lapen chedanbang atum aphan thek-longsi Pol aphan kechok obup-lo. 33Chedanbang ahemphu abang Pol adung vangsi alangliphan nepchek-lo, lapen ingchin ari rini pen Pol aphan kekokji ahukum pilo. Ansi alangli arjulo, “Labangso amonit komatma, lapen alangli kopi akam klemtang-loma?” 34Armu atum hangjosi, manene atum ke eson alam thanlo, lapen akaprek atum ke ason kaprek alam thanlo. Lasi kehorisei apot ahok alam chini un-edetsi alangli Pol aphan chedanbang atum ahem arlo keponji ahukum pilo. 35Pol don don an kele ahut armu atum jakong pen kethur pangtang pik-lo apotsi chedanbang atum alangliphan rungponrin nangkok-lo. 36Armu atum an alangli phi phi dunlo lapen hangjo josi pulo, “Alangliphan pathinon!”

Pol Kechethakdun Alam

37Chedanbang atum Pol aphan chedanbang ahem arlo keponji dok dok ahut Pol chedanbang bang suri ahemphu aphan pulo, “Neli nangliphan kopine alam arjulongjima?”

Chedanbang ahemphu abang pulo, “Nangli Grik alam ningjethekma? 38Labangso aphrangke inut Ijip adet amonit det kephangnodakji aphan thursi bang suri phli amonit aphan kejejangtang ajo japonlo. Tangte nanglike halabangso abang kalima?”

39Pol thakdunsi pulo, “Neli ke Jihudi amonit-lo, lapen Silisia adet Tarsas arongsopi si neli mahang thek-lo. Neli ke la anong kethedung arongsopi amonit-lo. Neli armu aphan kepuji ahukum neli pitha. Neli nangliphan kechoningri alam lahelo.”

40Chedanbang ahemphu abang alangliphan hukum pilo, lasi Pol don don athak arjapsi armu atum aphan kepadoklipjisi ari pen asin paklang-lo. Halatum doklip-lo lapen Pol Ibri alam pen kepuji pangcheng-lo:

Currently Selected:

AKAM 21: KARBIBSI

Highlight

Copy