Maakɨ 11

Anga Jeruzaalemɨ Jizaazai tewaanna wɨlaawa'.

(Matɨyui 21:1-11; Lukɨ 19:28-40; Jonɨ 12:12-19)

1Jeruzaalemɨ adaihɨsaba Anga Bepaaza Anga Betaani mannɨkeba Mugunya Wolivɨ yɨ'ma'na kye' gamɨre pwaraarɨ wɨdaasɨna 2“Angeba sakyɨrɨ' sakyaba wɨlaawakɨlyɨ yɨme'nya'bɨ' dogiya naanga saadɨwɨnyai wɨla pwekɨnɨkerɨ wanganakɨlyɨ dogiyarɨ a'mwe aane pwai kwai milamwaalyarɨ wɨla yaarakɨlyɨ nɨmɨnyawɨnna dɨmakabyɨla! 3A'mwe pwai kwai ‘Sabwi baa'na yɨvanɨgi?’ yɨhɨthaza' dara duzɨla! ‘Naangei sarɨna kugainɨvanɨkɨra. Nabaai mi'na kyojɨ sagaa' yɨme'nya'bɨ' dogiyarɨ ayɨna maryasaabathelyɨ.’ ” 4Mi'na wɨdaasɨna kya' saraai kaanya wawagɨla adusavɨ dogiya naanga saanyai tɨkuryaba mwasawɨ wɨla pwekɨnɨkerɨ wanganagɨla wɨla yaarɨna. 5Wɨla yaarɨna kyagi saba pwara daavɨna yeva wɨdɨna “Baarɨ' yɨvanɨgi? Dɨwɨnya sarɨ baa'na yaa'manɨgi?” 6Sara wɨdɨna kye' saraai Jizaazai wɨdake' kudahi “Wikɨra. Dɨmakwila!” 7Sara wɨdɨna kye' Jizaazaryawɨnna dogiya saanyarɨ makabɨna kyagi yɨvɨta mararaapaleva dogiyarɨ yɨlakɨna kye' sahwai yɨvɨsɨkaavɨ a'ba yɨlamwaaina. 8Sara yɨlamwaaina kya' a'mwe kwalaalyara “Sahwai naangerɨ yɨlaaya yaana!” dɨnyɨna yeva kunnya yɨvɨsa tusavɨ marakɨna kye' pwara “Tɨnna tewaanya wanganya'nengɨ,” deva taanya kɨwa'nake peda'na yeva tusavɨ nayaa marakɨna. 9Nayaa marakɨna kye' sai yɨlamwaaidɨ'nyɨ sɨnnawɨnyarajɨ dɨviyarajɨ sara yɨlaaya yeva jaka wɨdanganna “Naangeigɨ, Gotɨyai padaihasamaarana! Gotɨyai Naangei gɨthasaabake'na gamɨnyɨne yayavɨ bɨwaanyaigɨnyɨ tewaanna gɨzaavana! 10Sɨnnawɨ Ne Devitɨ tewaanya nemaremwalyaakabaaibɨ' Gotɨyarɨna dɨnemaremwaala! Maremwaala savɨ Gotɨyai tewaanna wiana! Menya ke'mwewɨnyaigɨ dɨnevadaihasamaaka! Su! Su!”

11Sai Anga Jeruzaalemɨ wɨlaawɨna yaka Gotɨyare angevɨ wɨlaawaka saba yuyangɨ tɨnna wangamabɨna yaka sagaa' sawɨsɨrɨna mena yɨma'nakegaa' Betaani anga maalɨkevɨna gamɨrera atɨraai sɨvɨlyɨrɨdaa'nyɨ pwaraalyarajɨ kaanna wɨna ya'.

Jizaazai yɨta pihɨyarɨ wɨda'.

(Matɨyui 21:18-19)

12Mwanyavɨ dɨkaaveva Betaanidaasara wodaapi gamɨnyɨ mɨjɨka wina. 13Mɨjɨka wina yadaa'nyɨ keiba yɨta pihɨyai kɨwa'nakerɨ tɨnna wanganaka “Yɨsɨlya daaka?” daka kaanna wɨna. Yɨsaryabanna baka sagaa' dara wanganake' “O, kɨwata gave daaka?” Sare' dare'nesɨ. Yɨta yuya yɨsɨla mya mɨlyadɨ'nyɨ. 14Daka yɨsarɨ wɨdɨna “Yɨsimaayaigɨ yuyagaa' aane pwai kwai gɨmɨre yɨsɨla manyɨ gyatheigɨnyɨ.” Sara wɨdadaasɨ gamɨrera wɨ'nyɨna ye'.

Jizaazai Gotɨyare Angevɨna wawa'.

(Matɨyui 21:12-17; Lukɨ 19:45-48; Jonɨ 2:13-22)

15Jeruzaalemɨna yɨ'mavaawɨna kye' Gotɨyare angevɨ saba Jizaazai wɨlaabɨna yaka yaasaraavɨ marirɨgalaasɨna ya'. Nɨgwia yanga yɨnya'neraavɨre yɨ'bɨnyangɨjɨ kwaamɨrya yaasadɨvɨsaraavɨre namwaalɨsangɨjɨ marapuratawasɨ'na yaka 16a'mweraavɨ wɨdɨna “Gotɨyare anga davɨ aane pwaigɨ kwaigɨ gɨlyɨvɨsa mamwa'nalota'dɨnnera!” 17Sara wɨdɨna yaka wɨjɨwaakɨna “Gotɨyare bukuya' dɨnɨke' ‘Gotɨyai dara wɨdake'na daaka! “Nɨmɨre ange' tɨbarɨyagaala ja'nesɨra. A'mwe ajɨmya yuyangɨyara angevɨ wɨlaabapi tɨbarɨyagaala nyɨdɨpɨ'desɨra.” ’ Sara dɨnɨke' pwara wɨlaabɨna kyɨwaa' sahwaraavɨre nɨgwia mwagi'nya'neba daa dava!”

18Sipɨzipɨya Gotɨyarɨna mubɨthɨka yɨra'dɨvɨta naangerajɨ yagaaikɨwɨjarajɨ sara wɨ'nadɨvɨ' Juya naangera gamɨnyɨna “Balade'na gara yaadeinaavaka?” dɨnyɨna. Sare' dare'nesɨ. Sahwarɨna lɨka naanga yesa'nanyɨ. Sare' dare'nesɨ. Kwala bwa'naanya' wɨjɨwaakɨyagaalya'na atɨka maru'na'muluna ye'. 19Sara dɨnyɨna kye' sawɨsa' kajɨnna' angebadaa'nyɨ salyɨ gamɨrerajɨ bwalaawɨna ye'.

Yɨta pihɨyai wɨjɨwaakya'nesɨra.

(Matɨyui 21:20-22)

20Mwanyavɨ tusavɨ kaanya wodaapi yɨta pihɨya' pwipulyajɨ taanyajɨ yuya yawaka balake' tɨnna wanganna. 21Tɨnna wanganna kye' Pitai mi'na yawɨraka sarɨ wɨdɨna “Nejɨwaakyaigɨ, dangana! Yɨta pihɨyai yagaala dɨragɨnya' wɨdɨwa'dɨnyai mena baimwaka.” 22Wɨdɨna kya' kumɨnyɨ wɨdɨna “Gotɨyarɨ dɨlɨmwagarila! 23Nebwi yɨhɨthɨwa. Pwai mugunya' wɨdozɨ ‘Mugunyaigɨ dɨkaava'gɨzɨ saalaalyavɨ dɨvaihɨnana!’ Nabaai gamɨre sɨmunyavɨ ‘Mugunyai sara yadelyɨra,’ kalɨmwagarojɨ Gotɨyai gamɨnyɨna sara yadelyɨra. 24Savɨne'na yɨhɨthɨwa. Tɨbarɨyagaala duthathe gɨnnya sɨmunyavɨ ‘Gotɨyai mena sara nyɨjaawa',’ kada'gɨzɨ gɨzaavadengɨra. 25Tɨbarɨyagaalya'na daava'gɨzɨ yawɨ'dɨza' ‘Ai, pwai kwai kayaa'na nyɨwaka! Sɨnna tɨka nyɨda'mwa',’ sagaa' ‘Gamɨre kayaa'nanya' mi'na marasɨ'nɨwa,’ jawɨka! Nabaai Gɨmaamaangei Sɨgunyavɨ mwaalɨkei gɨmɨre kayaa'nanya marasɨ'nade'na sara ja! 26Kɨrɨ' pwara kayaa'na gyɨwaasa'na kumɨre yɨwetawakya mamarasɨ'nyɨ yɨja', yɨ gɨmɨre yɨwetawakyanna Gɨmaamaangei Sɨgunyavɨ mwaalɨkei mamarasɨ'nyɨ yadelyɨra.”

Jizaazare dɨragɨnya' aai wɨjaava'?

(Matɨyui 21:23-27; Lukɨ 20:1-8)

27Jeruzaalemɨna ayɨna wɨlaabɨna. Mi'na wɨlaabɨna kye' sahwai Gotɨyare angevɨ kaanya bulayamaryadaa'nyɨ gamɨnyawɨnna sipɨzipɨya Gotɨyarɨna yɨra'dɨvɨta naangerajɨ yagaaikɨwɨjarajɨ a'mwe naangerajɨ wɨlaabeva 28wɨdɨna “Sa be dɨragɨnya yawaaihɨnyavaka? Yawaaihɨnya'na sa ya'neigɨnyɨ dɨragɨnya' aai gɨzaavakasɨyaka?”

29Jizaazai sahwaraavɨ wɨdɨna “Yagaala pɨrɨ' yɨhiwaaravɨma! Savɨ kaja'nanyɨdapi sara yawaaihe'ne dɨragɨnya' yɨhɨzɨwaakɨdeinyɨra. 30Jonɨ aalya bavɨtaazɨyabwina Sɨgunyavɨdaasɨ Gotɨyai duzɨwaakaka? Kwaakevakɨ a'mwera duzɨwaakeva? Dɨza'nanyɨjɨla!” 31Sara wɨdɨna kya' yagaala dɨnyɨna “ ‘Sɨgunyavɨdaasasɨra,’ kudawaajɨ ‘Jonɨ nɨmɨnyɨna wɨjɨwaaka'. Baa'na mu'nyetaihɨlaka!’ nanedathɨka! 32Sare' kɨrɨ' ‘A'mweraavɨdaasasɨ,’ madaanna! Kwala bwa'naanya' nanerabɨka! Sahwaraavɨna lɨka yadaa mwaaiho.” Sare' dare'nesɨ. A'mwe yuyara yawɨ'na “Nebulyasɨ. Jonɨ Gotɨyarɨ wɨ'nanejɨwaakadelyɨ.” 33Sara dɨnyɨna yeva Jizaazarɨ ma'maa'na “Sa'na myawɨrivanɨgo.” Jizaazai wɨdɨna “Nabaai manyɨjɨvanɨgasa'na nɨmɨ yawaaihe'ne dɨragɨnya'na mihɨzɨwaakɨwɨnesɨ.”

Currently Selected:

Maakɨ 11: byr

Highlight

Copy