Maakɨ 10

A'mwera a'mwamarya wasɨ'dɨvɨsabwina wɨjɨwaaka' Jizaazai.

(Matɨyui 19:1-12; Lukɨ 16:18)

1Sabadaasai sai Kwaaka Juthɨya wavɨlavaka Aalya Jothanɨ ga'mavaka kwaaka saba kamwaala' gamɨnyawɨ kwala bwa'naanya mwaaidapi wɨjɨwaakadevaaibɨ' aya kɨnɨ nayaa wɨjɨwaakɨna. 2Sara wɨjɨwaakɨna yadaa'nyɨ Perɨzɨya pwara wɨlaabeva “Sahwai kayaa'nanya' yana!” deva yaamɨjɨ yɨwaara'na “Pwai gannya balaangevɨ wasɨ'naja' sabwi tewaanna yadevwi daaka? Kayaa'na yadevwi daaka?” 3Sara yɨwaara'na kye' wɨdɨna 4“Savɨne' Ne Mozɨzai sɨrɨnɨmaangeraavɨ yagaala berɨvɨ wɨjaihɨlaka?” Sahwara wɨdɨna “Mozɨzai da' dɨnɨ' ‘A'mwe pwai yawɨrojɨ “Nɨnnya a'mwe' wasɨ'nɨma!” dozɨ pɨkarɨyɨkwiavɨ yagaala sa' yɨdavojɨ gannya balaange' yunakunyavɨ wasɨ'nadelyɨra.’ ” 5Sara wɨdɨna kye' Jizaazai wɨdɨna “Sarɨmɨre sɨmunyangɨ galarɨlavɨmwaaihɨnyɨna yɨwaata sabwina kɨwɨnya sa' Ne Mozɨzai dɨnɨkesɨra. 6Dɨnɨke' sɨnnawɨ sagaa' Gotɨyai yuya wakyaakegaa' Gotɨyare yagaala dɨnɨ' ‘Gotɨyai kwalyalyɨ gannya balyasɨ yavɨkaryaake'na 7a'mwe pwai ganɨmaangelyɨ ganaangesɨ sawaarɨ yagalya'makuna yojɨ a'mwe' maarɨna yojɨ 8gamɨre a'mwesɨ mwaalɨna yakɨriyagaa' kɨyoi avaalyawaalyɨ. Kɨlaaka gavejɨ' yɨma'nikadewaalyɨ.’ Sa' dɨnɨke'na a'mwe pwalyɨ a'mwe pɨrɨsɨ sawaai mɨka. Aawa. Kɨlaaka gavejɨsɨyawaalyɨ. 9Sarevɨdaa'nyɨ Gotɨyai kɨlaaka gavejɨsɨyawaarɨ wakake'na kwalaangei gannya balaangevɨ mwasɨ'nannesɨra.”

10Salyɨ gamɨrerari angevɨ bulamwaaina kye' gamɨrera a'mwevɨ wasɨ'nya'na yɨwaara'na. 11Savɨne' yɨwaara'na kye' wɨdɨna “Pwai kwai gannya balaangevɨ wasɨ'nojɨ a'mwe mudɨkevɨ kamaarojɨ Gotɨyai wanganojɨ ‘Gannya balaanga ayavɨna a'mwe mudɨkevɨ ata lɨmwamwakelyɨra,’ dathelyɨra Gotɨyai. 12Nabaai a'mwe' gannya kwalaangerɨ byenɨda'makwalyuna yaja' a'mwe pwarɨ kamaa'nojɨ ‘Gannya kwalaangerɨna a'mwe mudɨkerɨ ata lɨmwamwakesɨra,’ dathelyɨra Gotɨyai.”

Jizaazai kaimɨraayangɨna tewaanna wɨda'.

(Matɨyui 19:13-15; Lukɨ 18:15-17)

13A'mweyura “Sahwai ata yɨmetavana!” deva gamɨnyawɨnna kunnya kaimɨraayaraavɨ makabɨna kye' gamɨrera maanga wɨdɨna “Mipɨnera!” 14Jizaazai dara wanganake' “Ai, nɨmɨrera maanga duthɨvanɨgava!” Daka sɨnna tɨka kudava' wɨdɨna “Nɨmɨnyawɨnna kaimɨraaya bɨpɨka! Kumɨnyɨna kaanya maribɨnera! Sare' dare'nesɨ. Gotɨyai maremwaaideva pwara kaimɨraaya darabɨsara Gotɨyarɨ lɨmwadɨvɨsara mwaaibɨ'dengɨra. 15Nebwi yɨhɨthɨwa. Pwai kwai ‘Gotɨyareba mwaalɨma!’ dazai ‘Kaimɨraayai Gotɨyarɨ yɨlaaya yadeibɨsainyɨ yɨma'nɨwɨjainyɨ,’ majɨ kyori Gotɨyare maremwaaide nawɨ'nyaba mulaabi yadelyɨra. Arɨkawɨnyɨra.” 16Sara wɨdaka kaimɨraaya gannya asawaalyɨ mujɨ'na yaka ata yɨmeta'na yaka “Gotɨyai gɨmɨnyɨ tewaanna gyathelyɨra,” wɨdɨna wɨdɨna ya'.

A'mwei gɨlyɨvɨta naangejɨyarɨnesɨ.

(Matɨyui 19:16-30; Lukɨ 18:18-30)

17Angebadaasai kwaakaanya wodaa'nyɨ a'mwei gamɨnyawɨnna kaanyave'na wawaka “Naangelyɨra,” daka kwadaai gɨlaka yɨwaara'na “Nejɨwaakadɨnya tewaanyaigɨ, ‘Gotɨyare yuyagaa' yuyagaa'ne gaalyabwi maarɨma!’ da'mujɨ gara yɨdeinyaka?” 18Sara wɨdɨna kya' Jizaazai wɨdɨna “ ‘Tewaanyaigɨ,’ nyɨdɨwaanya' baa'na nyɨdɨwaa? Pwara kayaa'nanyara, Gotɨyai gavei tewaanyalyɨra. 19Yagaaikɨwɨnya dara yawɨ'mwaa. A'mwe maramakɨnna! A'mwengɨ ata malɨmwadɨnna! Kuka minna! Kwaasɨ yagaala majalɨkurakɨnna! Kwaasɨya ya'gɨzɨ pwarengɨ kuka mamaa'dɨnna! Gɨmaamaangelyɨ gwaangesɨ gɨzɨkaja sara jɨthengɨra. Kɨrɨmɨre yaya' dɨmakɨla!” 20A'mwei sare wɨ'naka wɨdɨna “Nejɨwaakadɨnyaigɨ, yagaaikɨwɨnya sangɨ kawe'nyagaa'daa'nyɨ sara mɨdɨdɨnyainyɨ.” 21Wɨdɨna kya' Jizaazai wanganaka gamɨnyɨna wɨvu'nakerɨ wɨdɨna “Gave pɨrɨ'na gɨhainɨvanɨ'. Wawa'gɨzɨ gɨnnya gɨlyɨvɨsa yaasa'gɨzɨ nɨgwia maara'gɨzɨ gɨlyɨvɨ'maayaraavɨ yanga wɨjaava'gɨzɨ Gotɨyareba warade gɨlyɨvɨsajɨyaigɨ nyɨmɨdɨnaadeigɨnyɨra.” 22Sara wɨdake'na a'mwere kale wiadaa'nyɨ “Aala,” dɨna jɨkurya yaka kavena wɨna ya'. Sare' dare'nesɨ. Gamɨre gɨlyɨvɨta kwalaalya kɨnɨnnakelyɨ. 23Mi'na wɨna kya' Jizaazai a'mweraavɨ maranganaka gamɨreraavɨ wɨdɨna “Gɨlyɨvɨkɨraya naangejɨyara wawɨnya naanga yɨna yɨna yɨpɨjara kwajɨ Gotɨyai maremwaaideva tewaanyaba kupɨdɨkerera.” 24Sara wɨdɨna kya' gamɨrera atɨka maru'nakulɨna. Atɨka maru'nakulɨna kye' Jizaazai ayɨna ma'maa'na “Kaimɨraayaihi, Gotɨyai maremwaaidevanna wɨlya'na wawɨnya naangesɨra. 25Langa lɨlɨtavalo'ma'nɨkerɨkɨ jɨlɨkyaawarya kaamelɨyai wɨlaawade'na wawɨnya maalɨkesɨ. Gotɨyai maremwaaideva gɨlyɨvɨta naangejɨyai wɨlaawade'na wawɨnya naangesɨra.” 26Sara kuda' atɨka maru'na'muluna yeva dɨnyɨna “Gotɨyarebanna aai yɨlaawadevanaka? Aarɨ padaihasamaaradelaka?” 27Dɨnyɨna kye' Jizaazai kumɨnyɨ tɨnna wanganaka wɨdɨna “A'mwera yapi mulaawi yɨpɨ'dera. Aawa. Gotɨya gavei kyojɨ wɨlaawɨpɨ'derera. Sare' dare'nesɨ. Gotɨyai yuyanna yadelyɨra.” 28Pitai sarɨ gaai wɨdɨna “Yɨthaa, nemɨ yuyangɨ ya'mawakona gɨmɨdɨnaabɨho.” 29Sara wɨdɨna kya' Jizaazai wɨdɨna “Nebwi yɨhɨthɨwa. Aane pwai kwai nɨmɨnyɨne'najɨ yagaala tewaanya'najɨ gannya ange' gya'mwera gya'mwe ganaange' ganɨmaangei gannya kaimɨraaya gannya wawɨnya ya'mawakojɨ 30kɨrɨ' dahaasagaa' anga kwalaalya, gya'mwe kwala naange, ganaanga kwalaalya, kaimɨraaya kwala naanga naanga, wawɨnya naangeva' mamaari yadei midaaka! Kwaaka davakɨ naanga naanga maarade kɨrɨ' nɨmɨnyɨne'na pwara taanginya wɨjaavɨpɨ'de dɨvi yɨma'nadehaa' Gotɨyare nawɨ'nyaba yuyagaa' yuyagaa'ne gaalyabwi maaradelyɨra. 31Sa'na Kwaaka davakɨ pwarɨna ‘A'mwe sɨnnawɨnyalyɨra,’ dɨmanɨgasarɨna Gotɨyareba ‘O, aayaangemɨlɨkɨra,’ dɨnɨpɨ'delyɨra. Yɨ pwarɨna ‘A'mwe aayaangemɨlɨkɨ,’ dɨmanɨgasarɨna Gotɨyareba ‘O, sɨnnawɨnyalyɨra,’ dɨnɨpɨ'delyɨra. Yɨ kwalaalyaraavɨna sara dɨnɨpɨ'derera.”

Dahasaai dahaa' Jizaazai gannya baryagaa'na wɨda'.

(Matɨyui 20:17-19; Lukɨ 18:31-34)

32Jeruzaalemɨnera tusavɨ kaanya widawadaapi Jizaazai kaanya wodaa'nyɨ pwara “Sabannei lɨka myɨwaka,” deva atɨka maru'nakulɨna yeva mɨdɨnna yesara lɨka yɨna. Lɨka yɨna kye' sai gamɨreraavɨ pɨba wɨmwaaihaka gamɨnyɨna yɨma'nya'ne'na wɨdɨna 33“Yɨthaanyi! Jeruzaalemɨneina yimanaawɨgo. Saba A'mweraavɨne Kaimɨraayainyɨ maarapi sipɨzipɨya Gotɨyarɨna yɨra'dɨvɨta naangerajɨ yagaaikɨwɨjarajɨ saraavɨ kanyɨmarɨmwaaihori a'mwe sara nɨmɨnyɨna ‘Sai baladelyɨra,’ jɨdavapi anga naanga pimagɨnyaraavɨ (Romɨ mwaalyaraavɨ) nyɨmarɨmwaaihɨpɨ'derera. 34Kanyɨmarɨmwaaihapi bɨrala nyapɨri maagwala nyopwasɨ'napɨri lannaka wɨlyabaalyɨ mala nyɨramapɨri nyɨramakɨpɨ'deinyɨ. Kabala'muri yɨrɨka daryaai darɨ' kwavɨlavojɨ kwaihwaainakeinyɨ ayɨna dɨkaavɨdeinyɨra.”

Jemɨzalyɨ Jonɨjɨ kɨdaraai Jizaazarɨ yɨdaanganagi.

(Matɨyui 20:20-28)

35Sagaa' Jemɨzalyɨ Jonɨjɨ kɨdaraai Sevathiyare gawaalɨ' kwaraai saryawɨnna wɨlaabahɨla wɨdɨna “Nejɨwaakadɨnyaigɨ, gɨthakade' naarɨmɨnyɨne'na sara jɨtheinaalyɨra. Sara yawɨ'mwoi.” 36Mi'na wɨdɨna kyagi wɨdɨna “Kɨrɨmɨnyɨna baarɨ' yɨjɨwa?” wɨdɨna ya'.

37“Naarɨmɨnyɨna tewaanyaba maremwaala'gɨzɨ gɨmɨre byaannakevɨ ‘Pwaigɨ aangasavɨ pwaigɨ kwanaamevɨ namwaalyɨta nawɨ'nyawaarɨ kwalamwaalakɨlyɨ nemɨ maremwalaadeinera,’ sara nehɨthana!” 38Sa' wɨdɨna kyagi Jizaazai wɨdɨna “Nyɨdaangamanɨgɨlya' myawɨriwaai. Daanga nyɨvɨnade'na kaapɨya sa' dɨnyideraaihi daaka? Nabaai daanga kihɨvɨnojɨ dɨragɨnyaraaihi daa'? Nɨmɨre kɨlaaka yuyajɨkɨ daanga nyɨvɨnade'na nɨmɨre bavɨtaazɨya' nyɨma'nadesɨreva nabaai kɨrɨmɨre kɨlaaka yuyajɨkɨ daanga kihɨvɨnojɨ kɨrɨmɨ dɨragɨnna dɨmwaalyideraaihi daaka?” 39Sara wɨdɨna kya' wɨdɨna “Naarɨmɨ dɨragɨnyainaai wikɨra. Wi'na yakaneinaalyɨ.” Jizaazai wɨda' “Kaapɨyavɨ aalya nɨde' savɨ aalya dɨnyideraaihɨlyɨ. Nɨmɨnyɨ bavɨtaazɨya' nya'de' kɨrɨmɨnyɨ yɨhwaradesɨ. 40Sare kɨrɨ' nɨmɨre aangasavɨjɨ nɨmɨre kwanaamevɨjɨ walamwaalya'na nɨnnya wawɨnya' daaka! Aawa. Gotɨyai yawɨrojɨ gamɨ sahwai namwaalyɨta nawɨ'nyawaai yovɨrawakyaakewaarɨna pwaraarɨ wɨmwaaihadelyɨra.”

41Gamɨrera pwara atɨraalyara sadaraai wɨdahɨlya' wɨ'nyɨna kye' Jemɨzalyɨ Jonɨjɨ sadaraarɨna sɨnna tɨka wɨdavɨna. 42Sɨnna tɨka wɨda'daa'nyɨ Jizaazai wɨjɨvwaramaa'na “Yuyaihi, kaajɨla!” wɨdɨna “Ajɨmya yuyangɨyaraavɨrebwi yawɨ'mwaa'. Ajɨmya yuyangɨyaraavɨ maremwaaidɨvɨsara ‘Nemɨ a'mwe naangeinera,’ dɨdɨvɨ' a'mweraavɨ marulawakɨna yadɨvɨ' mwaaiha'. Nabaai kumɨre a'mwe naangera kumɨnyɨ dɨragɨnna yadɨvɨsarera. 43Sabwi mipɨnera! Sarɨmɨjɨyai pwai ‘Nɨmɨ a'mwe naangeinyɨ yɨma'nɨma!’ yawɨrojɨ pwaraavɨ wɨdaayojɨ a'mwe naangei yɨma'nadelyɨra. 44Pwai kwai ‘Pwaraavɨne sɨnnawɨnyainyɨ yɨma'nɨma!’ yawɨrojɨ pwaraavɨre yaasɨwa'wawɨnyai yɨma'nojɨ sɨnnawɨnyai yɨma'nadelyɨra. 45Sare' dare'nesɨ. Sahwainyɨ A'mweraavɨne Kaimɨraayainyɨ pwara nyɨdaayɨpɨ'de'na mabyɨwa. Aawa. Pwaraavɨre wɨdaayɨde'na bɨweinyɨ. A'mweraavɨre kayaa'nanyabwina mubya'na kabala'mujɨ a'mwera tewaanna mwaaibɨ'de'na bɨweinyɨ. Kwalaalyaraavɨna a'mwamɨnɨgwiainyɨra.”

Jizaazai tɨbɨnyarɨ tewaanya yavada'gala'.

(Matɨyui 20:29-34; Lukɨ 18:35-43)

46Anga Jeriko yɨ'mavaaweva sahwalyɨ gamɨrerari kwala bwa'naanyasɨ sara Jeriko ya'ma'daapi Baatɨmayaazai, Tɨmayaazare gawaalɨ', tɨbɨnyai a'mweraavɨ “Nɨgwia nyɨjaama! Tɨbɨnyainyɨ,” dadei tu'maangebaarɨ mwaalɨna. 47Mwaalɨna yaka dara wɨ'nake' “Jizaazai Naazaretɨ mwaalyai daaka!” Daka jaka wɨdɨna “Ne Devitɨmɨreigɨ, Jizaazai, nɨmɨnyɨ kale dɨnyɨgaimwana!” 48Sara jaka wɨdɨna kya' pwara maanga wɨdɨna “Madɨnna! Kave dɨmwaala!” Maanga wɨdɨna kye' kɨrɨ' jaka naanga naanga wɨdɨna “Ne Devitɨmɨreigɨ, nɨmɨnyɨ kale dɨnyɨgaimwana!” 49Jizaazai sara wɨ'naka mudaraka pwaraavɨ wɨdɨna “Nɨmɨnyawɨnna duzɨvwaramaarila!” Mi'na wɨdɨna kya' sahwara tɨbɨnyarɨ jaka jɨvwaramaa'na, wɨdɨna “Wikɨra. Jɨvaimwanna! Gɨzɨvwaramaa'mwake' yarai dɨthɨkaaka!” 50Wɨdɨna kye' gannya yɨvɨta tapalasɨ'naka yarai dɨkwosɨ'nadaavaka Jizaazaryawɨnna wɨlaabɨna. 51Wɨlaabɨna kya' Jizaazai wɨdɨna “Gɨmɨnyɨna berɨ' yɨjɨwa? Gara yawɨ'mwaa?” Tɨbɨnyai wɨdɨna “Naangeigɨ (Ravuni), ‘Nɨmɨ tɨnna wanganɨma!’ dena gɨthɨwa.” 52Sara wɨdɨna kya' Jizaazai wɨdɨna “Nɨmɨnyɨ nyɨlɨmwamwaanya'na gɨmɨre tɨnnyaraai tewaanya yana! Kaanya dɨwona!” Sara wɨdɨna kya' gamɨre tɨnnyaraai tewaanya kyɨma'na' tusavɨ Jizaazai kwawa' a'mwei mɨdɨnna ya'.

Currently Selected:

Maakɨ 10: byr

Highlight

Copy