Maakɨ 12

Waainɨwɨla wawɨnyavɨ yadɨvɨsaraavɨnesɨra.

(Matɨyui 21:33-46; Lukɨ 20:9-19)

1Sahwai ke'ba'na wɨdɨna “A'mwe pwai wawɨnyavɨ gɨraipɨzɨla maarya'na burɨnna ya'. Sai kurɨta yavɨkaryaka gɨraipɨwɨla burɨdaka kavi'nɨnnyavɨ gɨraipɨzɨla mwa'mwagikya'ne' lɨkaka anga maalɨki' wawɨnyaba banganarya'ni' madɨna. Mi'na madɨna yaka pwaraavɨ wɨda' ‘Nɨmɨre wawɨnya' maremwaalapi gɨraipɨzɨla pɨnɨ yɨhɨzaavɨde.’ Sahwara wawɨnya' kamaremwaale' a'mwe sai kwaaka pɨbanna kaanna wɨna. 2Kaanna wɨna kya' gɨraipɨzɨla mya yakegaa' sai gannya wawɨnyawɨnna wɨdaayaderɨ wawɨnyavɨne sɨla pɨnɨnna wɨdaasɨna. 3A'mwe wɨdaasɨna yakei kaanna wɨna kya' wawɨnya' maremwaaidɨvɨsara wɨdaayade sarɨ galalɨmwanna yeva mala wɨrameva ayɨna wawɨnya' gyakwaryawɨnna simaayarɨ wɨdaasɨna. 4Sara wɨdaasɨna kye' gyakwai wɨdaayade pwarɨ wɨdaasɨna kya' gamɨre mɨnyagɨnyavɨ kayaaka yeva bɨrala yɨna. 5Sara kye' wɨdaayade pwarɨ wɨdaasɨna kya' sarɨ mena tamakeva wɨdaayade pwaraavɨ wɨdaasakeraavɨ pwaraavɨ mala tamɨna yeva pwaraavɨ mena tamakɨna ye'. 6Sara kye' wawɨnya gyakware pwai gawaalɨvaangei yɨlaaya wɨmaryadei kuna mwaala'. Ganɨmaangei daka ‘Nyɨbwaalɨvaangerɨna tewaanna yawɨpɨ'derera,’ daka wɨdaasɨna. 7Wɨdaasɨna kya' widavadaa'nyɨ wawɨnya' maremwaaidɨvɨsara tɨnna wanganeva dɨne' ‘Sai gawaalɨ' dɨvi ganɨmaangere yuya maaradelyɨra. Yarala, tamakawaajɨ gamɨre wawɨnya' namaaradɨ'de'na maraadeinera.’ 8Sara dɨnyɨna yeva galalɨmwanna yeva tamakɨna yeva gɨraipɨziwawɨnyavɨdaa'nyɨ marasɨ'na ye'.

9Gɨraipɨwawɨnyavɨ naangei berɨ' yadelaka? Sahwai wɨlaabozɨ a'mwe saraavɨ kayaaka wigalakojɨ a'mwe pwaraavɨ ‘Sarɨmɨ nɨmɨre wawɨnya' dɨmaremwaalyideihɨlyɨra,’ wɨdathelyɨ. 10Gotɨyai dɨnɨke' pɨkarɨyɨkwia tɨnna mwanganyɨ yadɨvɨsa' daaka?” wɨdɨna ya'. Wɨdɨna yaka sahwai yawɨ'na “Sɨlaangeinyɨra,” yawɨraka wɨdɨna “Dara dɨnɨke'

‘Anga madɨvɨsara sɨlaangerɨ wanganeva

“Kayaa'nanyai,” dɨneva marasɨ'na yesai

Simɨjamaanga nawɨ'nyai yɨma'nyɨna ya'.

11Gotɨyare sara wakɨna yake'

Tɨnna wanganona “Tewaanya',” dɨno.’

Gotɨyare bukuya' sara dɨnɨkesɨ.” 12Juya naangera dara wangane' “O, nemɨnyɨna ke'ba'nanya' duthɨwaka!” Deve'na “Jizaazarɨ wɨla yɨrakaana!” dɨneva kwala bwa'naanyavɨna lɨka yeva gamɨnyawɨ yagalya'mavaawɨna ye'.

Taakɨzɨyagaalya'nesɨra.

(Matɨyui 22:15-22; Lukɨ 20:20-26)

13A'mwe naanga sara Perɨzɨya pwarajɨ Erotɨyare pwarajɨ saraavɨ wɨdaasɨna “Jizaazai kayaa'na wɨdathe'na dɨwila! ‘Kayaa'na kudozɨ kalavuzavɨ wɨmwaihaana!’ dapɨri dɨwila!” 14Sara wɨdaasɨna yesara kaanna bɨna yeva wɨdɨna “Nejɨwaakadɨnyaigɨ, ‘Nebulya' dade' midaaka!’ gyawɨ'mwo. A'mwe aane pwai kwai gɨmɨnyɨna dɨvanɨke'na lɨka myɨvanɨgɨ. Sare' dare'nesɨ. A'mweraavɨre sɨnna gavevɨ tɨnna mwanganyadɨnyaigɨnyɨ. Aawa. A'mwe naangeraavɨjɨ a'mweraavɨjɨ avaaina wɨdadɨ Gotɨyarebwi gavebwi nayaa wɨjɨwaakadɨnyaigɨnyɨra. Romɨ maremwaaidei Sizaarɨ taakɨzɨya wɨjaaya'na nemɨre yagaaikɨwɨnya berɨ' dɨnɨkavaka? Tewaanya' daaka? Aawa daaka? Taakɨzɨya wɨjavaadeina daaka? Mujavaanneina daaka?” 15Sara wɨdesara kwaasɨ yagaala wɨdesaraavɨna yawɨraka wɨdɨna “ ‘Sahwai kayaa'nanyabwi yana!’ yawɨreva yaamɨjɨ baa'na nyɨdɨwaava! Mone' tɨnna wanganya'neinyɨ dɨnyɨmaryaama!” 16Wɨdɨna kya' mi'na makabɨna kye' wɨdɨna “Pikɨzaaya dasɨ pɨkarya dajɨ aaihwarengaka?”

17“Maremwaaidei Sizaarengɨra,” wɨde' sahwara. Sara wɨdɨna kye' Jizaazai wɨdɨna “Sizaarɨ Sizaare ayɨna duzaayɨla! Gotɨyarɨ Gotɨyare ayɨna duzaayɨla!” Sara wɨdɨna kya' gamɨnyɨna “Nawɨ'nyabwina dadele!” dɨnyɨna ye'.

Baryara ayɨna kwaihwaainakera dɨkaaya'nesɨ.

(Matɨyui 22:23-33; Lukɨ 20:27-40)

18A'mwe Sazuzɨyara, “A'mwera kabalapi yuna madɨkaayɨ yɨpɨ'dera,” yawɨresarajɨya pwara gamɨnyawɨnna beva yɨwaara'na 19“Nejɨwaakadɨnyaigɨ, Ne Mozɨzai nedɨnɨke' ‘A'mwe pwai kware gya'mwei balajai kaimɨraavɨmaayai a'mwevɨ bwasɨkwoja' a'mwei a'mwe savɨ maarojɨ kaimɨraaya maryawakɨnna, yaya' baryarɨne' wɨdɨna yadengɨra.’ 20Sa'na dɨnɨke' a'mwe ata purɨdaasɨ pwaraalyadaraka mwaale'. Kamwaale' sɨraangai a'mwevɨ maaraka kaimɨraavɨmaayai gamɨre sɨvigwa'jɨkerɨnei kunei bala'. 21Kabala' dɨviyai a'mwe savɨ maaraka kaimɨraavɨmaayai bala'. Kabala' dɨviya pwai avaaina ya'. 22Sana sana yuyara ata purɨdaasɨ pwaraalyadaraka a'mwe savɨ maareva kaimɨraavɨmaayadaraka bale'. Kabale' aayagaa' a'mwe sa' bala'. 23Dɨkaasagaa' sahwaraavɨ kyɨdɨkaavojɨ a'mwe gaware' mwaaladevaka? Sare' dare'nesɨ. Ata purɨdaasɨ daraalyara yuya sadaraka balaanga sa' maaresa'nanyɨ.” 24Sara yɨwaara'na kye' Jizaazai wɨdɨna “Sarɨmɨre sɨmunya kayaa'na yawɨ'manɨga'. Gotɨyare bukuyasɨ Gotɨyare dɨragɨnyasɨ myawɨrivanɨgasavɨ kayaa'na yawɨ'manɨgasa'na midaaka! 25Sare' dare'nesɨ. Baryara dɨkaapɨ'dehaa' a'mwera a'mwengɨ mamaarina, a'mwe a'mweraavɨ mamaa'nyɨ yɨpɨ'dengɨ. Aawa. Sɨgunyavɨ balaangengɨ mamaaryadɨvɨsara mamaayara mwaaihatabaaibɨsarera. 26Nabaai baryara dɨkaapɨ'de'na Ne Mozɨzai yɨdayaake' yɨsɨ' dɨka nyaake' yagaalyavɨ mwanganyɨjeva! Yɨsɨkɨdaasɨ Gotɨyai Mozɨzarɨ wɨjaa' ‘Dahaa' Evɨraamɨmɨre Gotɨyainyɨ. Dahaa' Aazakɨmɨre Gotɨyainyɨ. Dahaa' Jaikopɨmɨre Gotɨyainyɨ.’ 27Mozɨzai sara yɨdayaake' a'mwera baleva Gotɨyareba mwaaihasa'na Gotɨyai wɨdɨna ‘Kumɨre Gotɨyainyɨ.’ A'mwera yawɨ'na ‘O, a'mwe bainɨkera.’ Kɨrɨ' Gotɨyai yawɨ'na ‘Nɨmɨnyɨne'na gaala mwaaihasara.’ Sarɨmɨre yagaala kwaasɨ yagaalyasɨra,” wɨdɨna ya'.

Yagaaikɨwɨnya naange'nesɨra.

(Matɨyui 22:34-40; Lukɨ 10:25-28)

28Yagaaikɨwɨja pwai baka dɨnyɨna yesa' wɨ'naka dara wanganake' “Sahwai nayaa duthɨvanɨka!” Daka yɨwaara'na “Yagaaikɨwɨnya kwalaalya warɨ'. Yagaaikɨwɨnya aaya sɨnnawɨnya' berɨvaka?” 29Jizaazai ja'nawɨdɨna “Yagaaikɨwɨnya sɨnnawɨnya' dara dɨnɨke' ‘Yɨzɨrelɨyaihi du'nyi! Naangei nemɨre Gotɨyai Naanga gave pwainanyalyɨra. 30Naangei gɨmɨre Gotɨyarɨna naanga gɨvu'nana! Gɨmɨre sɨmunya yuyavɨjɨ gɨmɨre kurya naangeinajɨ gɨmɨre yawɨta yuyangɨjɨ, gɨmɨre dɨragɨnya yuyangɨjɨ Gotɨyarɨna naanga gɨvu'nana!’ 31Yagaaikɨwɨnya aya kɨrɨ' dara dɨnɨke' ‘Gɨmɨ saigɨ gɨmɨnyɨna kale gyɨvanɨke' a'mwe gɨmɨre angeba mwaalɨkerɨna sara kale gyana!’ Yagaaikɨwɨnya dawaai naangewaalyɨra. Yagaaikɨwɨnya aane pɨrɨ' kɨrɨ' yuya sawaarɨ wavɨla'manɨka pɨrɨ' mɨ'.” 32Sara wɨdɨna kya' Yagaaikɨwɨjai wɨdɨna “Nejɨwaakadɨnyaigɨ, tewaanya dɨwaana. Nayaa dɨwaa ‘Gamɨ gave pwainanyalyɨ. Gotɨya aane pwai kwai mamwaalyɨ'.’ 33Gamɨnyɨna sɨmunya yuyasɨ, munyɨ' yuyɨsɨ, yawɨta yuyasɨ, dɨragɨnya yuyajɨ, naanga nevu'nade'na tewaanyasɨra. Nabaai nemɨnyɨna kale neyɨvanɨke' a'mwe nemɨre angeba mwaalɨkerɨna kale sara neyana! Sa' tewaanyasɨra. Sawaai naangewaalyɨra. Gotɨyarɨne sipɨzipɨya bulɨmakaawoya yuyara dɨka nasɨ'na yadejɨ yuya yanga wɨmaarina yadaanyajɨ sa maalɨkengɨra.” 34Sara wɨdɨna kya' Jizaazai dara wanganake' “Gamɨ sai tewaanya dathɨvanɨka!” Daka wɨdɨna “Gotɨyai maremwaaideva maavewɨ mamwaalyɨgɨ.” Sara wɨdɨna kya' a'mwe aane pwai kwai myawɨramaari “Nɨmɨ lɨka myɨvanɨge. Yagaala pɨnɨ yɨwaaravɨdeinyɨra,” myawɨramaari ya'.

“Kɨraazɨtɨyai aaihwalaka?” Jizaazai wɨda'.

(Matɨyui 22:41-46; Lukɨ 20:41-44)

35Gotɨyare Angevɨ Jizaazai wɨjɨwaakakei wɨdɨna “ ‘Kɨraazɨtɨyai, Gotɨyai wɨdasaabathei Ne Devitɨmɨ Gawaalɨkɨra,’ Yagaaikɨwɨjara sara be'na wɨdɨvanɨgava? 36Gotɨyare Kuryarɨ Devitɨ sahwai pɨkarya yɨdayaa'

‘Nemɨre Naangei nɨmɨre Naangerɨ wɨda'

“Naarɨmɨ yuyaraavɨ maremwaalakadeinaalyɨ.

Nɨmɨre aangasabanna dɨmwaaideigɨnyɨ.

Gɨmɨre sɨvɨlyɨraarɨ yɨkamaangeraavɨ marulawakɨdehaa'nanyɨ.” ’

37Devitɨ sahwai Kɨraazɨtɨyarɨna ‘Naangelyɨra,’ sara dɨnɨke'na gamɨre gawaalɨvaangei gara mwaalɨka!” Sara wɨdɨna kya' kwala bwa'naanya wɨ'neva yɨlaaya ye'.

Yagaaikɨwɨjaraavɨrebwi.

(Matɨyui 23:1-36; Lukɨ 11:37-54; 20:45-47)

38Sara wɨjɨwaakɨna “Yagaaikɨwɨja pwaraavɨrebwi mipɨnera! Mala nayaa jɨwannyɨla! Kumɨ sara yɨlaayabwi ‘A'mwera yawɨpɨka! “Sara sɨdu'nakera mwaaihava!” ’ deva yɨvɨta gaala saamɨnya' marabwaayeva kaanya yamaryɨvanɨgasabwi. Mubyabanna a'mwera ‘Naangeigɨ. Tewaanyaigɨ,’ wɨdɨvanɨgasabwi. 39Lotuangevɨ naangeraavɨre namwaalyɨsangɨ mwaaimanɨgasabwi. Tɨka munnegaa' nawɨ'nyaba gaveba nɨvanɨgasabwi. Sabwina yɨlaaya marivanɨga'. 40Sara yɨvanɨgasara yaanyɨwaakengɨre angengɨ kuka yuna maa'manɨgasara. A'mwera ‘Kumɨ sara tewaanyarera,’ yawɨrya'nera tɨbarɨyagaala naanga kwaasɨ wɨdɨvanɨga'. Sara yɨvanɨgasaraavɨ Gotɨyai naanna jɨdavadera daanga naanga wɨvɨnaderera,” wɨdɨna ya'.

Yaanyɨwaake' Gotɨyarɨ nɨgwia wɨjaava'.

(Lukɨ 21:1-4)

41Gotɨyare angevɨ nɨgwia wakya'neba aya kɨba Jizaazai mwaalaka a'mwera nɨgwia wakesangɨ tɨnna wanganna. Tɨnna wangadaa'nyɨ a'mwera gɨlyɨvɨta naangejɨyara nɨgwia naanga kwake' 42yaanyɨwaake' gɨlyɨvɨ'maaya' baka nɨgwia maalɨkikaai wakɨna. 43Sara wakɨna kya' sai gamɨreraavɨ jɨvwaramaa'na yaka wɨdɨna “Nyu'nyɨla! Nebwi yɨhɨthɨwa. Yaanyɨwaaka gɨlyɨvɨ'maaya da' Gotɨyarɨna naanga wɨjaawaka. Pwara maalɨ'na wɨjawaava. 44Sare' dare'nesɨ. Sahwara nɨgwia naange wakɨwaasa Gotɨyai wanganaka nabaai nɨgwia naanga naanga kumɨre angengɨ kuna warɨke wanganaka dɨvanɨ' ‘Yanga maalɨkesɨra.’ A'mwe' nɨgwia maalɨkikaai wakɨwakevɨ Gotɨyai wanganaka dara wangamwake' ‘Ai, a'mwe sa' wɨgainɨwake' gannya yuya dakɨwaka! Nɨgwia pɨnɨ wapaaya mubya'na mwarijɨka!’ Daka dɨvanɨ' ‘Yanga naangesɨra.’ ”

Currently Selected:

Maakɨ 12: byr

Highlight

Copy