Jenɨzɨzɨ 44

Jozepɨ yaamɨjɨ kyaa' gya'mwera tewaanya yaa'.

(44:1-34)

1-9Kɨdaraka mi'na kane' Jozepɨyai gannya wawɨnya wɨdaayaderɨ wɨdɨna “Kumɨre gɨlyangɨ wapaaya dɨmaramihya! A'mwera nɨgwia gannya gɨlyangɨ dɨmihya! A'mwe pwarevɨ sara ja! A'mwe pwarevɨ sara ja! Nabaai nɨmɨre maa'gula tewaanya naange' wɨryaakere gɨlyavɨ dɨmaramihya!” Sara wɨdɨna kya' wɨdaayadei sara ya'. Mwanyagaa' Jozepɨyarɨ gya'mwera yagalya'makuna. Yagalya'makuna kye' Jozepɨyai wɨdaayaderɨ wɨda' “A'mwe saraavɨ dɨmɨjaahala! Mɨjaahaina ya'gɨzɨ dara dutha! ‘Nɨmɨre a'mwe naangere maa'gula tewaanya naange' kuka kyɨwaakɨra.’ ” Wɨdaayadei kaanna kaanna wɨna yaka mɨjaahalaka Jozepɨyai wɨdake' sara wɨda'. Sara kuda' Jozepɨyarɨ gya'mwera wɨde' “Aawa. Maa'gula sai mamaariwo. Pware gɨlyavɨ maa'gulyai wangana'gɨzɨ gamɨzai dɨramakɨdelyɨra. Nabaai nemɨ yuyaina gɨmɨre a'mwe naangere wawɨnya wɨdayadaanyaina yɨma'naadeinera.”

10-17Jozepɨyarɨ wɨdaayadei wɨda' “Maa'gula sarɨ kuka maa'mwaka gavei wɨdaayadei yɨma'nadelyɨ. Sarɨmɨ pwaihi kaanna dɨwila!” Mi'na wɨdaka kumɨre gɨlyangɨ wanganna wanganna yaka Bejaminɨmɨre gɨlyavɨ maa'gulya' daapɨna ya'. Daapɨna kya' Jozepɨyarɨ gya'mwera kale kwia' lɨka yɨna ye'. Lɨka yɨna yeva Jozepɨyaryawɨnna ayɨna kaanna wɨna yeva kale wiadaasɨ sagaa' gɨ'du'na ye'. Gɨ'du'na kye' Jozepɨyai wɨdɨna “Sarɨmɨ sara yɨvanɨgasa'na nɨmɨ sɨdu'nakeinyɨ yawɨ'dɨnyainyɨra. Da' baa'na yɨwaatavaka?” Wi'na wɨdɨna kya' Juthai wɨda' “Nemɨ yagaala berɨ' gɨthaazɨwona? Nemɨ kayaa'na yɨvanɨgo' dahaa' gɨmɨre wawɨnya gɨthayadaanyaina yɨma'naadera.” Sara kuda' Jozepɨyai wɨdɨna “Arɨkawɨnyɨra. Nɨmɨre maa'gulya' kuka maa'mwakei gavei nɨmɨre nyɨdaayadei yɨma'nadera. A'mwe pwara kuvɨnɨmaangeryawɨnna ayahi kaanna wɨna yɨpɨ'dera.”

18-34Mi'na wɨdɨna yakegaa' Juthai wɨda' “Bejaminɨmɨne nenɨmaangei yɨlaaya naanga marivanɨka. Kwarame kwalaalya naanga kwavɨlava' sagaa' neya'mwe Jozepɨyai pwai mɨka. Sagaa' yuyagaa' nenɨmaangerɨ kale wia'. Dahaa' Bejaminɨmɨ kamaara'gɨzɨ nenɨmaangei balɨna yadelyɨra. ‘Bejaminɨ kaanna wɨna yade,’ da'gɨzɨ nɨmɨ dava mwaala'mujɨ wawɨnya gɨthaayadɨnyainyɨ yɨma'nɨdeinyɨra. Bejaminɨ kaanna muyɨ nyadɨka! Nɨmaamaangeryawɨnna aya muyɨ yadɨ mwaalɨna yɨdeinyɨra.”

Currently Selected:

Jenɨzɨzɨ 44: byr

Highlight

Copy