Jenɨzɨzɨ 43

Jozepɨyarɨ gya'mwera Yɨzɨpɨ yagalaawɨna yaa'.

(43:1-34)

1-14Wapaaya Yɨzɨpɨ sabadaasa mi'na nyɨna kye' kuvɨnɨmaangei wɨda' “Sarɨmɨ ayahi dɨwila! Wapaaya pɨnɨ dɨnemubyɨla!” Juthai wɨda' “Bejaminɨjɨ muyɨ kyawaajɨ a'mwei wapaaya manemubi neyadera.” Tɨvi'na kuda' kuvɨnɨmaanga Yɨzɨrelɨ navɨka mwaalɨna yaka pɨgaa' wɨda' “Wikɨra. Wɨryaakelyɨ dɨwila! Nabaai yanga wɨjaaya'ne wɨmaarina, nɨgwia aya sarɨmɨre gɨlyavɨ mihakɨnɨke Yɨzɨpɨ mwaalyarɨ dumaari! Nɨgwia navɨka yɨwa'dɨke dɨngaka? Nɨgwia pɨnɨ maarapi wapemubya'na dɨmakwi! Dahaa' yarai dɨwi!”

15-24Yɨzɨrelɨ sara wɨdake' sara ye'. Yɨzɨpɨ sabanna Jozepɨyaryabanna kabe' Jozepɨyai Bejaminɨmɨ wanganna. Mi'na wanganaka gannya angevɨ mwaaiderɨ wɨda' “Tɨka munne naanga jovɨrava! Sɨrɨgwajagaa' a'mwe darari naadera.” Jozepɨyai sara kuda' a'mwe pwai tɨka wapaaya yovɨrava'. Jozepɨyare angevɨ gya'mwera davaabɨna yeva lɨka yɨna yeva wɨdaayaderɨ wɨde' “Kɨgaa' nemɨre gɨlyavɨ nɨgwia mihakɨwa'dɨkei mwanganyɨwa'do. Nɨgwia sa aya maa'mwo. Nabaai nɨgwia pɨnɨ maarona wapaaya pɨnɨnna mubaathera.” Wi'na kude' Jozepɨyare angevɨ maremwaaidei wɨda' “Lɨka mipɨnera! Kɨgaa' sarɨmɨre nɨgwia maa'mwa'de. Gotɨyai nɨgwia pɨnɨ sarɨmɨre gɨlyavɨ dahamihakɨwa'dɨ'?” Wɨdɨna yaka Sɨmɨyanɨmɨ kalavuzavɨdaasɨ maarɨna kya' a'mwe yuyara angevɨ marasaabɨna ye'.

25-34Gya'mwera angevɨ wɨla'dapi sɨrɨgwajagaa' Jozepɨyai wɨlaabɨna kya' gya'mwera “A'mwe naangeigɨ,” wɨdɨna yeva gɨ'du'na yeva wapaaya waburya yanga wɨjaavɨna. Yanga wɨjaavɨna kye' Jozepɨyai wɨda' “Sarɨmɨnyɨ sɨrɨnɨmaangei tewaanya damwaalɨ'?” “Tewaanya mwaalɨ',” wɨdɨna yeva gɨ'du'na ye'. Gɨ'du'na kye' Jozepɨyai Bejaminɨmɨ wanganaka wɨda' “Sarɨmɨre wɨryaakelyɨ kabɨwaa' yɨhwangamwa.” Jozepɨyarɨ kale wiadaasɨ Bejaminɨmɨ wɨda' “ ‘Gotɨyai tewaanna gyadeigɨnyɨ,’ gɨthɨma!” wɨdaka yarai gavinyaba wɨladaa'na yaka kɨnna maredɨna. Kɨnna maredɨna yaka gannya sɨnnyɨ' aalya yɨnyɨna yaka ayawɨnna wɨlaabɨna ya'. Jozepɨyai “Nemɨ naana!” daka sɨraangei pimagɨ wɨmwaaihɨna wɨryaakei pimagɨ wɨmwaaihɨna kutabanyara nayaa wɨmwaaihɨna ya'. Wɨmwaaihɨna yaka wapaaya jaapaina yaka pwaraavɨ kɨbangwa wina, Bejaminɨmɨ wapaaya naanga wina ya'. Sara yɨna kya' gya'mwera kumɨre gaidaa'na wanganna wapaaya naanga Bejaminɨmɨ wina yake' wanganeva atɨka maru'na'na ye'.

Currently Selected:

Jenɨzɨzɨ 43: byr

Highlight

Copy