KASAUKAN 28

1Piawo' boo ri Isak i Jakub, barakato' no am pambilin, kono, “Pai' panangandu' ra ralaa ru Kanaan ti. 2Tampos no, ongoi no ra pagun ru Misopotamia, ra baloi ru aki muno i Bituil, am panangandu' noyo ra sangulun anak ralaa ri Laban kamaman muli. 3Gama' ru mambarakat i Aki Kapuuno' Ondo' Maayo Kaga' Kuasa' no ra paguguatan muno am manaak rirun ra anak masuang, saboi masauk kou ra kinamatuaan ru masuang bansa'! 4#Kas. 17:4-8Gama' ru mambarakat i Aki Kapuuno' rirun am papag muno koson Io nambarakat ri Abragam, am gama' ru okou tatangan ra tana' inayanan mutu, ondo' pinataak noyo ri Aki Kapuuno' ri Abragam i!” 5Poongoyo' boo ri Isak i Jakub ra pagun ru Misopotamia, mongoi ri Laban anak ungkuyon ri Bituil, ulun ru Aram, maayo ungkuyon ri Ribika ina' ri Jakub am i Isau.

Nanangandu' poyo i Isau

6Nakapandai i Isau ra binarakat ri Isak i Jakub am nopoongoi riso ra pagun ru Misopotamia paguyum ra andu'. Nakapandai io niayuk ra paat ri Isak nambarakat ri Jakub, nanusub i Isak ri Jakub ra kalo manangandu' ra ralaa ru Kanaan. 7Nakapandai niayuk i Isau ra ginagaya' ri Jakub ragu ru matuo nano am minongoi io ra Misopotamia. 8Nakarati' boo i Isau ra ama' nano kalo maansayan ra ruandu' ru Kanaan. 9Ginio ra ongoi i Isau ri Ismail anak ungkuyon ri Abragam, am paguot ra anak ruandu' ri Ismail ondo' ininggalanan i Magalat, boborok ruandu' ri Nibayot.

Naginupi i Jakub giu' ra Bitil

10Iruani' ri Jakub bandar Birsyiba am ongoi ra pagun ru Aran. 11Paat tumolop mato ru orou, pakasuku' io ra rondo' intok#ra rondo' intok; kapoam ra rondo' intok ondo' mapasau. am pombolong ra giu' no. Luya' io am minulun io ra batu. 12#Jua. 1:51Paginupi boo i Jakub, nakito no rondo' tukar giti ra tana' ti am pompor no nakasuku' ra limbowon, am malaikat-malaikat tumuun magaloi ra tukar no. 13#Kas. 13:14-15Bigor Tuhan ra sapapa' ri Jakub#sapapa' ri Jakub; kapoam ra rasawat ru tukar no. am indagu, “Aku noyo Tuhan i Aki Kapuuno' ri Abragam am i Isak. Pataakon Ku rirun am papag muno tana' ra nambalangan muno. 14#Kas. 12:3; 22:18Papag muno koson ra kinasuang ru kaau ra tana' ti. Kapilaan nilo wilayah nilo ra ngaangai' tampilon, am mimpuun rirun am papag muno, ngaangai' bansa' ru tana' ti makaapu ra barakat.#am mimpuun…barakat; kapoam ngaangai' bansa' makitaak maa' raginio mambarakat Aku risilo koson Aku nambarakat rirun am papag muno. 15Karaa' noyo, indanganon am sindungin Tokou ra ati ayuk angayan muno am ibiton Tokou sumaguli' ra pagun ragitio. Kalo iruanin Tokou suku' Ku mabaal ngaangai' atan ondo' binantu' Kuli rirun.”

16Karat boo i Jakub am indagu, “Soroi Tuhan ragiti! Soroi Io ragiti am kalo nakapandai aku!” 17Nalaa' io am indagu, “Mapara' boo makalalaa' intok ragitio! Maaru' baloi gitio ri Aki Kapuuno', kulobon garabang umpasan ra suruga'.”

18Suabon no, rondom i Jakub sukal am alapo' no batu inulunan nali am potolorogo' baalo' ra batu pangkaraan. Uasi' no batu pangkaraan no ra umau jaitun koson patimpokon ri Aki Kapuuno'. 19Inggalani' no intok raginio Bitil#Bitil: Ralalom ragu Ibrani, inggalan ti makaarati' ra “baloi ri Aki Kapuuno'”. (Galing i ininggalanan intok raginio ra Lus). 20Pagibot boo i Jakub, kono, “Amon ru indanganon am sindungin aku ru Tuhan ra ugar kutu, am aniin No aku ra akanon am bayangon, 21suku' ra aku makasaguli' ra matanda' ra baloi ri ama' kuli, Okou noyo i Aki Kapuuno' kuno. 22Batu pangkaraan ra pinotolorog kutu masauk ra intok sumamba Rirun, am aniin Tokou ra sampiopor intor ra ngaangai' ondo' pataakon Muno raki'.”

Currently Selected:

KASAUKAN 28: TMT

Highlight

Copy