KASAUKAN 27

Nambarakat i Isak ri Jakub

1Paat ri Isak matutuo noyo am noolou mato nano, piawo' no anak katuaan nano, i Isau, am indagu riso, “Anak kuno.”

Taam i Isau, “Iou, ama'.”

2Indagu i Isak, “Makito mu ra matutuo aku noyo am kalo lair mabuoi matoi aku. 3Alapo' panah am logot muno, ongoi ra limayak am pampalula' ra sanginan kana'. 4Ansaki' aku ra akanon maamis koson ra akanon kasuungan kuno, am ibito' raki'. Makaakan aku ra akanon no, barakaton tokou ra aku kalo poyo matoi.”

5Kaa' paat ri Isak mindagu ri Isau no, mangintalingo i Ribika. Pakaugar i Isau minongoi pampalula', 6indagu i Ribika ri Jakub, “Kakaining ku ri ama' muno minindagu ri Isau koson ragitio, 7‘Ibiti' aku kasanginan kana' ondo' lulaan muno am ansaki' aku ra akanon maamis. Makaakan aku ra akanon no, barakaton tokou ra saang ru Tuhan ra aku kalo poyo matoi.’ ” 8Kon poyo ri Ribika, “Raino, anak kuno, pangining raki' am baalo' atan ondo' panusuban kuno rirun. 9Ongoi ra sampanon ru kambing domba takano, pilio' ruo ngainan anak ru kambing ra moonsoi am ansakon ku ra akanon maamis kasuungan ru ama' muno. 10Ibiton mu akanon no riso am makaakan io, barakaton no boo okou ra io kalo poyo matoi.”

11Kaa' indagu i Jakub ra ina' nano, “Makapandai kou ra i Isau no makabulu-bulu kaa' kungkung kutu malumis. 12Maaru' gumuut i ama' raki' am mapandayan no ra mamparuung aku riso, ginio boo mangkinibit aku ayuk ra pagulasan raki' am sala' ka mambarakat io.”

13Taam ina' nano, “Anak kuno, polosoo' noyo ngaangai' ulas pataakon rirun no makatiu' raki', baalo' panusuban kutu rirun, am ongoi alapo' karuo ngainan ra kambing no.” 14Ongoyo' boo alapo' ri Jakub karuo ngainan kambing no am pataaki' ra ina' nano. Ansako' boo ru ina' nano ra akanon kasuungan ri Isak no. 15Pagalap boo i Ribika ra bayang moonsoi kaga' ri Isau ondo' binulian ra baloi no, am pabayango' no ri Jakub. 16Palangkupo' ri Ribika kungkung ru anak kambing no ra longon am ra liog ri Jakub ondo' kolondo' bulu no. 17Pataaki' no boo ri Jakub akanon maamis no nabaya' ra ruti' ondo' inansak nano.

18Ongoi boo i Jakub ra intok ru ama' nano am indagu, “Ama'!”

Taam ama' nano, “Iou, osoi kou?”

19Taam i Jakub, “Aku i Isau, anak katuaan muno. Binaal ku noyo ondo' nanusuban muli raki'. Panturung no am akano' kual ru linula' ra inansak kutu, maa' raginio mabarakat mu aku.”

20Indagu i Isak, “Okou anak kuno, ati kulaan kou nakaalap ra mataki'?”

Taam i Jakub, “Sabap ra nangindangan Tuhan i Aki Kapuuno' ondo' sambaan muno raki'.”

21Indagu i Isak ri Jakub, “Inggaar noyo raki' maa' ginio maguut tokou. Motopot kia okou ti i Isau?” 22Inggaar i Jakub ra ama' nano. Guuto' no i Jakub am indagu, “Bolos mutu koson ra bolos ri Jakub, kaa' longon mutu koson ra longon ri Isau.” 23Kalo nauligan ri Isak i Jakub sabap ra makabulu-bulu longon nano koson longon ri Isau. Barakaton noyo raan ri Isak i Jakub, 24lakat poyo mangkuot io, “Motopot kia ra okou ti i Isau?”

Taam i Jakub, “Iou, aku no.”

25Indagu boo i Isak, “Ibito' kual no raki'. Makaakan aku, barakaton tokou.” Ibito' ri Jakub kual no am ibito' no niayuk kasanganu wain ra inumon. 26Indagu boo ama' nano riso, “Anak kuno, inggaar poyo am alaki' aku.” 27Inggaar i Jakub mangalok ra ama' nano, pakaalok i Isak ra owou ru bayang nano am pambarakat riso. Indagu i Isak, “Owou maamis ru anak kutu koson owou ru umo ondo' binarakat ru Tuhan. 28Gama' ru manaak i Aki Kapuuno' rirun ra bolobou intor ra limbowon am manaak rirun ra tana' mangalabung! Gama' ru manaak Io rirun ra gandum am niayuk wain ra masuang kaga'. 29Gama' ru mangasauk bansa'-bansa' ra ulipon muno am ulun mangurumat rirun. Gama' ru manguasa' kou ra ngaangai' pabukat muno am papag ru ina' muno mangurumat rirun. Gama' ru mausung ulun ondo' magulas rirun am mabarakat ulun ondo' mambarakat rirun.”

Nakibarakat i Isau ri Isak

30Kopongo binarakat ri Isak i Jakub, am kakaugar ri Jakub, uli' i Isau, maayo nano intor ra nampalula'. 31Nangansak niayuk i Isau ra akanon maamis kasuungan ru ama' nano, ongoyo' no taaki' ra ama' nano, indagu i Isau, “Ama', panturung am akano' kual ondo' inibit kutu rirun, maa' raginio barakaton mu aku boo.”

32“Osoi kou ti?” kuot ri Isak riso.

“Aku i Isau, anak katuaan muno,” taam nano.

33Tumontol galing ngaangai' inan ri Isak am pangkuot io, “Osoi kia raitii' ni, ondo' nampalula' noyo raki' ra kana', am ondo' nagibit ni? Inakan ku koyoo' ra okou kalo poyo nakaratong, am naanian ku noyo io ra barakat pamupusan kuli am barakat ragili io tatangan ra sabuoi-buoi no.”

34Kaining ngaangai' ginio ri Isau, lakis io pantangi' ra maruol guang am indagu, “Ama'! Anii' aku niayuk ra barakat muno.”

35Taam i Isak, “Minatong boborok muno am namparuung raki'. Ginaau no barakat ondo' sotopot no panganian kuno rirun.”

36 # Kas. 25:29-34 Indagu i Isau, “Gitio noyo kainduo ri Jakub mamparuung raki'. Natimpok inggalan nano i Jakub.#Jakub; Inggalan ragitio bolos nano koson ra ragu Ibrani ondo' arati' nano “ruung”. Ginaau no longgom kuno koson anak katuaan am raino ginaau no poyo barakat kuno. Kolondo' kia boo barakat muno raki'?”

37Taam i Isak, “Napasauk aku noyo riso ra tuan muno am ngaangai' pabukat nano masauk ra ulipon nano. Nangani' aku noyo riso ra gandum am wain. Raino kolondo' atan-atan mabaal kuno rirun, anak kuno.”

38 # Ibr. 12:17 Nyanya'-nyanya' i Isau no makitaak ra ama' nano, “Rondo' ayuk kia barakat muno, ama'? Barakato' aku niayuk, ama'.” Tumalimpuun io poyo pantangi'.

39 # Ibr. 11:20 Indagu boo i Isak riso,

“Kolondo' kou ra bolobou intor ra limbowon,

am kolondo' kou ra tana' mangalabung.

40 # Kas. 36:8; 2 Raj. 8:20 Maayag kou ra ilang muno,

kaa' masauk kou ra ulipon ru boborok muno,

kaa' amon ru manggal kou,

makalabus kou intor ra kuasa' nano.”

41Ginio ra masisang i Isau ri Jakub, sabap ra inanian ru ama' nano i Jakub ra barakat i. Migindagu io ra guang nano, “Panguliran ra ama' ku matoi maar noyo, potoyon ku i Jakub no!”

Nanusub i Isak ri Jakub mongoi ri Laban

42Kaa' kaining ri Ribika inatangan ri Isau no, piawo' no i Jakub am indagu riso, “Iningo' noyo, maayo muno i Isau nangatang noyo mansuli' am mamatoi rirun. 43Anak kuno, raino baalo' atan ondo' raguon kutu. Tampos noyo am ongoi ra maayo kuli i Laban giu' ra pagun ru Aran. 44Ayan noyo riso ra kukula' buoi, saboi lasu' ru guang ru maayo muno masalui, 45am lilianin no boo atan ondo' pinamakuan muno riso. Manusub aku boo ra sangulun mongoi pagalap saguli' rirun. Marara' aku maluusan ra karuo ngaulun anak ku ralalom songorou.”

46Indagu i Ribika ri Isak, “Nasuraan aku magilong ra karuo ngaulun andu' ri Isau ra bansa' ru bokon no. Amon ru manangandu' niayuk i Jakub ra ruandu' ru bansa' ru Git no, moonsoi poyo matoi aku ayuk.”

Currently Selected:

KASAUKAN 27: TMT

Highlight

Copy