Luka 8

Bakaintu abakalela Jesu

(Matayo 27:55,56; Marko 15:40,41)

1 # Lk 4:43 Munsi lyakaindi Jesu wakanjilauka muminzi amutunzi, wakali kuya bukambauka akwaamba Makani Mabotu aa-Bwami bwa-Leza, wakali abo abali kumi abobile, 2#Mt 27:55-56; Mk 15:40-41; 16:9; Lk 23:49abakaintu bamwi abakaponyegwa kumyuuya mibi akuzilwazi: Maliya uutegwa Magadalene uwakagwisigwa badaimona abali musanu mubabili, 3awalo Johana, muka-Cuza, mubanzi wa-Heroda, a-Susana, abamwi banjibanji abakali kumulela alubono lwabo.

Cikozyano camusyangi

(Matayo 13:1-23; Marko 4:1-20)

4 # Mt 13:1-23; Mk 4:1-20 Nkabela naakayoboloka makamu makamu aabantu, abakazwa kuminzi yoonse nobakasika kulinguwe, wakabaambila mucikozyano kuti, 5Musyangi wakazwa kukuminza mbuto zyakwe, eno naakali kuya buminza zimwi zyakawida munzila, zyakalyataulwa matende, abayuni bamujulu bazilya. 6Zimwi zyakawida mumabwe, nezyakamena buyo zyakapusama nkaambo zyabula musyu. 7Zimwi zyakawida mumamvwa, nezyakamena antoomwe amamvwa, azifundilizya. 8Zimwi zyakawida muvu bbotu, zyamena, zyazyala mwaanda. Naakaamba makani aya wakoompolola kuti, Uujisi matwi aakumvwa, amvwe.

9Nkabela basikwiiya bakwe bakamubuzya kuti, Ino caamba kutinzi cikozyano eci? 10#Is 6:9-10Wakati, Mwapegwa nywebo kuziba izisisidwe zyaBwami bwa-Leza, kwalo kulibamwi kulaambwa muzikozyano zyalo, kuti nobabona batabonesyi akumvwa batamvwisisisyi. 11#1 Pet 1:23Eno cikozyano nceeci: imbuto ninkani ya-Leza, 12#1 Kor 1:21Abo abali munzila mbabaswiilila, ndilyonya wasika Saatani, wabanyanga makani mumyoyo yabo, kuti batasyomi akufutulwa, 13Abaabo abali mumabwe mbabamvwa makani, baatambula akubotelwa, pele tabajisi miyanda, basyoma kaindi, elyo kwasika kutepaulwa mpoonya mpoonya balenguka. 14Ezyo izyakawida akati kamamvwa, mbabamvwa makani, bazwa awo baya bweenda, bafundilizigwa makataazyo, alubono, amisobano yabuumi, tabazyali micelo. 15#Inc 16:14; Heb 10:36; Ciy 3:10Ezyo zyamuvu bbotu mbambabo abamvwa makani amoyo mubotu uululeme, baajatisya, bazyala micelo calunamba.

Cikozyano celambe

(Matayo 5:14-16; Marko 4:21-23; Luka 11:33-36)

16 # Mk 4:21-25 # Mt 5:15; Lk 11:33 Taakwe muntu uunga atomeka lambe, walivunika mumutiba, nekuba kulibika munsi abulo, pele ulalibika acikalikilo, kuti abanjila omo babone kusalala. 17#Mt 10:26; Lk 12:2Nkaambo taakwe cisisidwe iciti takasisululwe, taakwe civumbidwe iciti takavumbululwe kuti cibe atuba. 18#Mt 25:29; Lk 19:26Nkaako amucenjele mbomumvwa, nkaambo uujisi uyoopegwa, uutajisi uyoonyangwa aceeco ncayeeya kuti ulicijisi.

Banyina abanabakwabo Jesu

(Matayo 12:46-50; Marko 3:31-35)

19 # Mt 12:46-50; Mk 3:31-35 Elyo bakasika kulinguwe banyina abanabakwabo, pele bakakakilwa kuswena kulinguwe nkaambo kamakamu makamu aabantu. 20Nkabela wakaambilwa kuti, Banyoko abanabakwanu mpobali anze, bayanda kukubona. 21Wakabavuwa kuti, Bama abanabakwesu mbabaswiilila makani aa-Leza akwaacita.

Jesu mbwaakaumuzya iguwo

(Matayo 8:23-27; Marko 4:35-41)

22 # Mt 8:18,23-27; Mk 4:35-41 Kubuzuba bumwi wakanjila mubwaato abasikwiiya bakwe, wati kulimbabo, Atuzubuke, tuye mutala lyeziba. Nkabela bakainka. 23Nebacili kuya bweenda Jesu woona, Mpoonya mpoonya kwakasika iguwo ipati muziba, amaanzi akatalika kubbizya bwaato, bakali mumapenzi mapati. 24Bainka bamubusya bati, O mwami, O mwami, twafwa. Mpoonya wabuka, waumuzya iguwo amayuwe amaanzi. Ndilyonya aleka, kwabatama. 25Elyo wakababuzya kuti, Nduli lusyomo lwanu ino? Bakayoowa, baankamana, babuzyanya bati, Ino nguni oyu uumuzya iguwo amaanzi, mpoonya zilamumvwa?

Umu-Gerasa uwakanjidwe badaimona

(Matayo 8:28-34; Marko 5:1-20)

26 # Mt 8:28-34; Mk 5:1-20 Bakasika kucisi caba-Gerasa, icibambene eca-Galilaya. 27Naakazubuka atala wakaswaana amuntu waamunzi oyo, uunjidwe badaimona. Ciindi cilamfu taakali kusama cintu, taakali kukala muŋanda pele muzyuumbwe. 28Naakabona Jesu wakakwiila, wamuvundamina wati ejwi ipati, Ino ndijisi mulandunzi ayebo, Jesu, Omwana a-Leza, Sijulu lyamajulu? Ndakukumbila kuti utandipenzyi. 29Nkaambo walailila muuya uusofweede kuti Zwa mulooyo muntu, Nkaambo kanjikanji wakamujisi, muntu wakalindilwa ulaangidwe enketani ezibulo, wakaziryolaula zyaanzyo, watandwa daimona kuya musokwe, 30Jesu wamubuzya wati, Nduweni zina lyako? Wati, Ndime Banji, nkaambo wakanjidwe badaimona banjibanji. 31Nkabela bamukombelezya kuti atabatandili mumulindi uutagoli. 32Kwakaliko oko butanga bwangulube zinjizinji, izyali kucela acilundu, bakamukumbila kuti abazumizye kunjila mulinzizyo. Wakabazumizya. 33Mpoonya badaimona bakazwa mumuntu oyo, banjila mungulube, nkabela butanga boonse bwakakunkulikila muziba, bwaakulobelela. 34Abeembela nobakabona icakacitika bakatija, baakuluula makani mumunzi amumatungu. 35Elyo bantu bakazwa kuyoobona icakacitika. Bakasika kuli-Jesu, bajana oyo muntu, uwakagwisigwa badaimona, ulikede kumatende aa-Jesu, ulisamide, uliluzi. Bayoowa. 36Nkabela abo abakacibona babaambila mbwaakaponezegwa oyo uwakanjidwe badaimona. 37Eno bantu boonse abali mucisi icizingulukide Gerasa bakamukumbila kuti azwe kulimbabo, nkaambo bakayoowa kapati. Nkabela walo wakanjila mubwaato wabweeda. 38Pele mwaalumi uwakagwisigwa badaimona, wakamukumbilisya kuti bainke awe, Kwalo Jesu wakamupilusya wati, 39Bweeda kulindinywe ukabalungulwide zyoonse Leza nzyaakucitila, Nkabela wakainka, waamba mumunzi woonse zyoonse nzyaakamucitila Jesu.

Jesu mbwaakabusya musimbi, ambwaakaponya mukaintu uwakali acilwazi cabulowa

(Matayo 9:18-26; Marko 5:22-43)

40 # Mt 9:18-26; Mk 5:21-43 Eno Jesu naakabweeda, bantu bakamutambula akubotelwa, nkaambo bakali kumulangila boonse. 41Nkabela kwakasika mwaalumi uwali kutegwa Jairo, mweendelezi wacikombelo, wakavundama kumatende aa-Jesu, wamukumbila kuti aboole kuŋanda yakwe. 42#Lk 7:12Nkaambo wakali amwana musimbi, omwe pele, uwakali emyaaka iyati kabe kumi mwiibili, wakali kuciswa kapati, afwaafwi akufwa. Eno naakali kuya bweenda, makamu makamu aabantu bakamuvumpa.

43Elyo mukaintu uwakali kuzwa bulowa myaaka iili kumi mwiibili, uwakasowa lubono lwakwe loonse kubasilisi, nekubaboobo taakwe uwakamuponya pe, 44wakasika kusule lya-Jesu, waampa moombe wengubo yakwe, ndilyonya bulowa bwaleka kuzwa. 45Jesu wati, Ino nguni uwandyaampa? Boonse nobakakazya, Petro wakati, ambaali abo, Mwami, bantu balikubunganine, balikuzingulukide, ino waamba kuti, Nguni uwandyaampa? 46Pele Jesu wakateeti, Mpali uwandyaampa, nkaambo ndalimvwa kuti nguzu zyazwa kulindime. 47Elyo mukaintu naakabona kuti tasisiki, wakaboola ulakankama, wamuvundamina, waamba kumbele lyabantu boonse ncaamwaampila ambwaaponyegwa ndilyonya. 48#Lk 7:50Nkabela wakamwaambila kuti, Mwanaangu, kokazika buyo moyo, lusyomo lwako lwakufutula, koya aluumuno.

49Naakacili kwaamba, kwakasika muntu uuzwa kumweendelezi wacikombelo, waamba kuti, Mwanaako wafwa, utamukataazyi Mufundisi. 50Jesu naakamvwa obo, wakamuvuwa kuti, Utayoowi, kosyoma buyo, musimbi uyoopona, 51Naakasika kuŋanda takazuminide muntu naba omwe kuti anjile, pele Petro, a-Johane, a-Jakobo, awisi abanyina musimbi. 52#Lk 7:13Bali kubiizika boonse akumulila, pele walo wati, Mutalili, nkaambo tafwide pe, uloona, 53Bamuseka mbobali kuzi kuti musimbi wafwa. 54Pele walo wakabatanda boonse, wamujata kujanza, woompolola wati, Omusimbi, buka, 55Mpoonya muuya wakwe wakaboola, wabuka ndilyonya, Jesu walailila kuti apegwe cakulya, 56#Lk 5:14; Mk 7:36Abazyali bakwe bakayoowa, pele wakabalaya kuti bataambili muntu eci icakacitwa.

Currently Selected:

Luka 8: Ibbaib63

Highlight

Copy