Luka 7

Silumamba waku-Kapemauma

(Matayo 8:5-13)

1 # Mt 8:5-13 Naakamana kwaamba makani aakwe oonse mumatwi aabantu, wakanjila mu-Kapenaumu.

2 # Joh 4:47 Eno umwi mupati wabasilumamba wakali kujisi muzike ngwayandisisya, uwali kuciswa, afwaafwi akufwa. 3Elyo naakamvwa Jesu, wakatuma bapati baba-Juda kulinguwe, wamukumbila kuti aboole azooponye muzike wakwe. 4Balo nobakasika kuli-Jesu bakamukumbilisya bati, Uleelede oyu kuti umucitile boobo, 5nkaambo ulayanda mukowa wesu, nguwe uwakatuyakila cikombelo cesu. 6Mpoonya Jesu wakainka abo. Naakasika afwaafwi aŋanda, silumamba wakatumwa abeenzinyina kulinguwe kuyooamba kuti, Mwami, utalikataazyi, nseelede kuti ukanjile muŋanda yangu, 7alimwi ndati nseelede kuboola kulinduwe, koamba ejwi buyo, mwanaangu ulapona. 8Nkaambo amebo ndi muntu uulaililwa, ndilijisi basilumamba munsi lyangu, Ndaambila oyu kuti, Koya, kai ulainka. Ndaambila umwi kuti Koboola, kai ulaboola. Ndaambila muzike wangu kuti, Cita obu, kai ulacita, 9Jesu naakamvwa makani aya wakamuyoowa, wacebukila bantu abali kumucilila, wati kulimbabo, Ndamwaambila, nsinabwene lusyomo ululi bobuya nomuba mu-Israyeli. 10Abakatumidwe nobakaboola kumunzi, bakajana muzike wapona kale.

Jesu mbwaakabusya uwakafwide ku-Naini

11Nobwakaca, wakainka kumunzi uutegwa Naini, basikwiiya bakwe bakamucilila amakamu makamu aabantu. 12#Lk 8:42; 1 Bam 17:17Naakasika afwaafwi amulyango wamunzi, kwakali kutembekedwe muntu uwakafwide, mwaalumi uwali alike kulibanyina, alimwi banyina wali mukamufu, abantu banjibanji abaamunzi bakali awe. 13Nkabela Mwami naakamubona wakamufwida luzyalo, wati kulinguwe, Leka kulila, 14Ndilyonya waswena afwaafwi wajata macila, abakamutembekede baima, wati, Mulombe, ndakwaambila, Buka. 15#1 Bam 17:23; 2 Bam 4:36Mpoonya awo uwakafwide wakabuka, wakala watalika kwaambaula. Nkabela wamupa kulibanyina. 16#Lk 1:68; 19:44Boonse bakayoowa, balemya Leza bati, Kwabuka musinsimi mupati akati kesu, alimwi bati, Leza wayeeya bantu bakwe, 17Elyo yakamvwigwa mpuwo yakwe mu-Judaya moonse amucisi coonse icizingulukide.

Abatumwa ba-Johane Mubapatizi

(Matayo 11:11-19)

18 # Mt 11:2-19 Basikwiiya ba-Johane bakamwaambila zyoonse zintu ezi. 19#Int 40:7; 118:26; Mal 3:1; Dan 9:26Nkabela Johane wakaita basikwiiya bakwe bobile, wabatuma ku-Mwami wati, Sena nduwe oyo uuza, na tucilangila umbi? 20Aba bantu nobakasika kulinguwe bakati, Johane Mubapatizi watutuma kulinduwe wati, Sena nduwe oyo uuza, na tucilangila umbi? 21Kuciindi eco nciconya wakaponya banjibanji kuzilwazi akukuciswa akumyuuya mibi, aboofu banjibanji wababonunuzya. 22#Is 35:5-6; 61:1Jesu wakabaambila kuti, Kamuya mukamwaambile Johane zintu ezi nzomwabona anzomwamvwa, kuti boofu babona, abatyokede beenda, basicinsenda basalazigwa, basinkematwi bamvwa, abafwide babusigwa, abacete bakambaukilwa Makani Mabotu. 23Uli acoolwe uutajani kulindime icimulebya.

24Nobakainka mbaakatumide Johane, wakatalika kwaamba Johane kubantu wati, Ino ncinzi ncomwakaakweebela munkanda? Sena ndubu ulupeka amuuwo? 25Ino ncinzi ncomwakaakubona? Sena muntu uusamide masila mateteete? Amubone, abasama masila mabotu abali azilyo izilweela bakede mumaanda aabwami. 26#Lk 1:76Ino mwakaakubonanzi? Sena musinsimi? Ii, ndamwaambila, mupati kwiinda musinsimi. 27#Mal 3:1Oyu ngonguwe uwakalembwa kuti,

Amubone, ndatuma mutumwa wangu kumbele lyabusyu bwako, Nguuti kakululamikile nzila kumbele lyako.

28 # Lk 1:15 Ndamwaambila kuti, akati kabaabo abazyedwe bakaintu, taakwe mupati uuinda Johane, nokubaboobo muniini mu-Bwami bwa-Leza ulamwiinda, 29#Mt 21:32; Lk 3:7,12Nkabela bantu boonse nobakamvwa, abalo basimutelo, bakamulemya Leza, abakabapatizidwe alubapatizyo lwa-Johane. 30#Inc 13:46Anukuti ba-Farisi abasimilao bakanenya ncaakabakanzila Leza, mbobatakabapatizigwa nguwe.

31Elyo Mwami wakati, Abantu basunu ndibakozyanye enzi sena? Ino balikozyene enzi? 32Balikozyene abana abakede mucisambalilo abaitana kuti, Twakamwiimbila, anu tamukazyanide, twaimba cakulyeetezya, anu tamulilide. 33#Lk 15:2Nkaambo Johane Mubapatizi wakasika, talyi nsima, tanywi waini, nywebo mwati, Ujisi daimona. 34Eno Mwana a-Muntu wasika, walya, wanywa, nkokuya mwati, Amubone, muntu sindya, mukolwi, mweenzinyina abasimutelo abacitazibi. 35Pele busongo bulazyulila kubana boonse bambubo.

Mukaintu mbwaakananika matende aa-Jesu

(Matayo 26:6-13; Marko 14:3-9; Johane 12:1-8)

36 # Lk 11:37 Umwi waba-Farisi wakamukumbila kuti bazoolye awe. Nkabela wakanjila muŋanda yamu-Farisi oyo, wakala kuti alye. 37#Mt 26:7-13; Mk 14:3; Joh 12:3-8Eno mumunzi omo mwakali mukaintu mucitazibi, naakamvwa kuti ulikede ulalya muŋanda yamu-Farisi, wakaleta nsazi yamafuta aanunka kabotu, 38#Mt 26:7-13; Joh 12:3-8waima kumatende aakwe ulalila, imisozi yakwe yakatalika kulopya matende aakwe, waasyuuzya susu lyakwe, wamumyontesya matende aakwe, waananika mafuta, 39Nkabela mu-Farisi uwakamwiita, naakabona obo, wakayeeya mumoyo wakwe wati, Oyu naali musinsimi, naamuziba mukaintu oyu uumujata kuti nguni, na uli buti, nkaambo mucitazibi. 40Jesu wakamuvuwa kuti, Simoni, ndiyanda kwaamba kulinduwe, (Wakati, Koamba, Mufundisi.) 41Kwakali bantu bobile abakali amulandu kumuntu umwi. Umulandu waumwi ngwamasheleni aali myaanda yosanwe, uwaumwi ngwamakumi osanwe. 42Eno mbobakabula cintu cakulunga, wakabajatila boonse bobile. Ino kulibaabo nguuli uuti muyandisisye? 43Simoni wakamuvuwa wati, Ndiyeeya kuti nguyooyo ngwaakajatilisya. Wakamwaambila kuti, Wayeeya kabotu, 44#Matl 18:4Mpoonya wasandukila kumukaintu, wati kuliSimoni, Sena wamubona mukaintu oyu? Ndanjila muŋanda yako, tondipede maanzi aakusanzwa matende aangu, pele walo walopya matende aangu emisozi yakwe, waasyuuzya esusu lyakwe. 45#Rom 16:16Tondimyontede yebo, pele walo, kuzwida ciindi ncaanjila, talekede kumyontesya matende aangu. 46Umutwe wangu tounanikide mafuta, anu oyu wananika matende aangu mafuta mabotu. 47Ncendakwaambila kuti, Wajatilwa zibi zyakwe zinjizinji, nkaambo wayandisisya. Pele uujatilwa kaniini, uyanda kaniini. 48#Lk 5:20,21Mpoonya awo wakamwaambila mukaintu kuti, Wajatilwa zibi zyako. 49Elyo abo mbaali kukede abo akulya batalika kubuzyanya bati, Nguni oyu uujatila zibi? 50#Lk 8:48; 17:19; 18:42Nkabela wakaambila mukaintu kuti, Lusyomo lwako lwakufutula, koya aluumuno.

Currently Selected:

Luka 7: Ibbaib63

Highlight

Copy