Luka 17

Twaambo tone twa-Jesu

1Limwi wakaambila basikwiiya bakwe kuti, Takukonzeki kuti zilebyo zitabiwo, pele maawe kulooyo uuzileta. 2#Mt 18:6,7Kwamubotela walo kuti aangwe bbwe munsingo yakwe awaalwe mulwizi, kwiinda kuti alebye umwi wabaniini aba. 3#Mt 18:15Amukalilangisye. Kuti munyoko wakubisizya umutapatile, kuti weempa umujatile. 4#Mt 18:21,22Kuti wakubisizya ziindi izili musanu muzibili mubuzuba bomwe, aboola kulinduwe ziindi izili musanu muzibili ati, Ndeempwa, umujatile.

5 # Mk 9:24 Elyo baapostolo bakaambila Mwami kuti, Yungizya lusyomo lwesu. 6#Mt 17:20; 21:21Mwami wakati, Mwanoojisi lusyomo ululi mbuli nseke yamusitada, muyooambila mubula oyu kuti, Zyuka awa, ukasimpwe mulwizi, uyoomumvwa. 7Pele ino nguni kulindinywe uujisi muzike uulima, na uuembela, akotoka buyo, ateeti kulinguwe, Koboola eno, ukale ulye? 8Sena takoomwaambila kuti, Ndilulamikila ndilalile, libambe undipampwide, nsaangune kulya akunywa, nkokuya ayebo noti kalye akunywa? 9Sena uyoomulumba muzike oyo, mbwaacita ncaakalaililwa? Ndiyeeya kuti pe. 10Mbubonya obo anywebo, mwamana kucita zyoonse nzomwalaililwa, amukaambe, Tuli bazike buyo, twacita ncotwali kweelede kucita.

Jesu mbwaakasalazya basicinsenda abali kumi

11 # Lk 9:51; 13:22 Mulweendo lwakwe kuya ku-Jerusalemu, wakainda akati ka-Samariya a-Galilaya. 12#Lev 13:45,46Naakanjila mumunzi umwi, kwakamucinga baalumi abali kumi basicinsenda. Bakaima kulaale, 13boompolola bati, O mwami Jesu, tufwide luzyalo. 14#Lev 13:49; 14:1-32; Lk 5:14Naakababona wakabaambila kuti, Kamuya mukalitondezye kubapaizi, Nobakali kuya bweenda bakasalazigwa. 15Nkabela umwi wabo naakabona kuti wapona, wakapiluka walumbaizya Leza ejwi ipati, 16wavundama kumatende aa-Jesu, wamulumba. Walo wakali muSamariya. 17Jesu wakavuwa kuti, Sena tabasalede abali kumi? Ino bali kuli abali musanu mubane? 18Sena taakwe uwaboola kulumbaizya Leza, pele oyu uwamasi? 19#Lk 7:50Wakamwaambila kuti, Buka uende, lusyomo lwako lwakufutula.

Bwami bwa-Leza mbobuzoosika

20 # Joh 18:36; 3:3 Elyo ba-Farisi nobakamubuzya kuti, Bwami bwa-Leza buzoosika lili? wakabavuwa wati, Ukusika kwa-Bwami bwa-Leza takubonwa. 21#Mt 24:23; Joh 1:26; 12:35Alimwi bantu tabakooyooamba kuti, Mboobu, na Mbobuya, nkaambo, amubone, Bwami bwa-Leza buli mukati kanu.

22Nkabela wakaambila basikwiiya bakwe kuti, Kuyoosika ciindi ncomuyooyanda kubona buzuba bumwi bwamazuba aa-Mwana a-Muntu, pele tamukooyoobubona. 23#Lk 21:8Nobayoomwaambila kuti, Amubone, nguulya kuya na nguuno kuno, mutakainki mutakabacilili, 24#Mt 24:26,27nkaambo mbubonya mbuli lulabo ululaba kubbazu limwi lyejulu, lulamweka akubbazu limwi, mbubonya obo mbwayooba Mwana a-Muntu mubuzuba bwakwe. 25#Lk 9:22Pele lutaanzi uleelede kuciswa zinjizinji, akutakatwa kulibasunu. 26#Matl 6:5-8; Mt 24:37-39Eno mbubonya mbokwakaba kumazuba aa-Nowa, kuyooba mbubonya obo kumazuba aa-Mwana a-Muntu, 27#Matl 7:6-24Bakali kulya, bakali kunywa, bakali kukwata akukwasigwa, mane do kusikila kubuzuba Nowa mbwaakanjila mubwaato, imiyoba yakasika yabajaya boonse, 28#Matl 18:20–19:25Kwakaba mbubonya obo kumazuba aa-Lota, bakali kulya, bakali kunywa, bakali kuula akuuzya, bakali kulima akuyaka. 29#Matl 19:24,25Pele kubuzuba Lota mbwaakazwa mu-Sodoma, kwakaloka mulilo uwakazwa kujulu amusulufa, wakabatenta boonse. 30Kuyooba mbubonya obo kubuzuba mbwati kalibonye Mwana a-Muntu. 31#Mt 24:17-18; Mk 13:15-16; Matl 19:26Kubuzuba obo, oyu uuli aciluli, alubono lwakwe ululi muŋanda, atakaseluki kulutola, awalo uuli kumuunda atakapiluki. 32#Matl 19:26Amuyeeye muka-Lota, 33#Mt 10:39; 16:25; Mk 8:35; Lk 9:24; Joh 12:25Umwi umwi uuyanda kufutula buumi bwakwe uyoobusweekelwa, kwala uusweekelwa buumi bwakwe, uyoobuyobola, 34Ndamwaambila kuti kumasiku ayo kuyooba bobile abulo bomwe, umwi uyootolwa, umwi uyoosyaala. 35#Mt 24:40,41Kuyooba bakaintu bobile abanooziila amwi, umwi uyootolwa, umwi uyoosyaala. 36Kuyooba baalumi bobile mumuunda, umwi uyootolwa, umwi uyoosyaala. 37#Job 39:30; Mt 24:28Nkabela bakamuvuwa kuti, Ino nkukuli, Mwami? Wakabaambila kuti, Oko ukuli mutunta, nkokuyooyobolokela basikube.

Currently Selected:

Luka 17: Ibbaib63

Highlight

Copy