Luka 16

Gikozyano camubanzi siluuni

1Alimwi wakaambila basikwiiya bakwe kuti, Kwakali muntu umwi muvubi uwakajisi mubanzi, walo wakaambilizigwa kulinguwe kuti, Ulasowaila lubono lwako. 2Mpoonya mpoonya wakamwiita, wamubuzya kuti, Ino ali buti makani aya ngendamvwa kulinduwe? Koyubulula bubanzi bwako, nkaambo tokooyooba limbi mubanzi. 3Elyo mubanzi wakalyaambya mucamba cakwe kuti, Ino ndiyoocita buti nkaambo simalelaangu ulanditanda kububanzi? Ukulima nsijisi nguzu pe, akukumbila ndijisi buusu, 4Ndilizi mbwenti cite kuti na ndatandwa kububanzi bakanditambule mumaanda aabo. 5Nkabela wakabaita boonse abakali amilandu kulisimalelaakwe. Wakabuzya mutaanzi kuti, Sena uli amulandunzi kulisimalelaangu? 6Wakati, Ninsazi zyamafuta izili mwaanda. Wakamwaambila kuti, Jata lugwalo lwako, fwamba ukale, ulembe makumi osanwe. 7Nkabela kuluumwi wakati, Ino yebo uli amulandunzi? Wakavuwa kuti, Nzyeelelo izili mwaanda zyamaila. Wakati kulinguwe, jata lugwalo lwako, ulembe makumi aali musanu mwaatatu. 8#Ef 5:8; 1 Tes 5:5Elyo simalelaakwe wakalumbaizya mubanzi oyo uutaluleme mbwaakacita camaanu, nkaambo bana baansi ano mbasimaanu mucizukulu cabo kwiinda bana bakusalala. 9#Lk 14:14; Mt 6:20; 10:40; 19:21Eno ndamwaambila kuti, Kamulicitila beenzinyoko kulubono lwakutalulama, kuti lwaakumana, bamutambule mumaanda aatamani. 10#Lk 19:17Uusyomekede kuciniini ulisyomekede akucipati, uutaluleme kuciniini taluleme akucipati. 11Aboobo kuti tamusyomeki kulubono lwakutalulama, ino nguni uuti kamusyome kulubono lwinilwini? 12Alimwi kuti tamusyomeki kulizyabamwi, ino nguni uuti kamupe canu? 13#Mt 6:24Taakwe muzike uukonzya kubelekela bami bobile, Nkaambo ulasula umwi ayande umwi, na ulakakatila kuluumwi, asampaule umwi. Tamukonzya kubelekela Leza milimo antoomwe alubono.

Bwami bwamulao

14 # Mt 23:14 Aba-Farisi abakali kuyandisya mali nobakamvwa makani ayo oonse bakamuseka. 15#Lk 18:9-14; Mt 23:28; Int 7:9; Tus 6:16,17Nkabela wakabaambila kuti, Nywebo mulimbabo abalilulamika kumbele lyabantu, kwalo Leza uliizi myoyo yanu, nkaambo icilemekwa bantu ncisesemyo kuli-Leza. 16#Mt 11:12-13Wakaliko mulao, abasinsimi, mane kusikila kuli-Johane, kuzwida ciindi eco Makani Mabotu aa-Bwami bwa-Leza alakambaukwa, eno boonse babunjila akusungilizya. 17#Mt 5:18Pele ncuuba kuti imaninine nyika ejulu, kwiinda kuti kumane kazila komwe kamulao.

18 # Mt 5:32; 19:9; 1 Kor 7:10-11 Muntu umwi umwi uuleka mukaintu wakwe, akwata umbi, waba simamambi, awalo uukwata uwalekwa mwaalumi, waba simamambi.

Cikozyano camuvubi a-Lazaro mukumbizi

19Kwakali muntu umwi muvubi, wakali kusama zisamo zyabwami aziteteete, Wakali kulya zibotu mazuba oonse. 20Kwakaliko amukumbizi umwi uwakali kutegwa Lazaro, uwakabikwa amulyango wakwe, wakali ezicisa zinjizinji, 21#Mt 15:27wakali kubwezelela bufwefwelenga ubwakali kuwida kunsi atafule lyamuvubi oyo, ii, abalo babwa bakaboola bamyankuta zicisa zyakwe. 22Eno mukumbizi oyo wakafwa, abaangelo bakamutola kucamba ca-Abrahamu. Awalo muvubi wakazikwa.

23Elyo kucikalilo cabafwa, mbwaakali amapenzibulanga, wakatambya meso aakwe, wabona Abrahamu kulaale, awalo Lazaro acamba cakwe. 24Ndilyonya wakoompolola ejwi pati wati, Taata Abrahamu, ndifwida luzyalo, utume Lazaro kuti atompe mpela yamunwe wakwe mumaanzi, azootontozye mulaka wangu, nkaambo ndapengesya mumabangabanga aya. 25Pele Abrahamu wakateeti, Mwana, koyeeya kuti wakalitambwide zibotu zyako nowakali muumi, mbubonya Lazaro mbwaakatambwide zibi. Eno muno walyokezya, pele yebo wapengesya. 26#Mt 10:37; Dt 33:9,10; Lk 18:29,30; Joh 12:25Alimwi kwabikwa dindi ipati akati kesu anywebo, kuti abakokuno abayanda kuzubukila oko tabakonzya, abalo abakooko kulindinywe tabakonzya kusika okuno. 27Nkabela wakateeti, Taata, ncendakukumbila nkuti ukamutume kuŋanda yataata, 28nkaambo ndijisi banabakwesu bosanwe, akabaambilisye kuti batabooli kulibobuno busena bwamapenzi. 29#2 Tim 3:16Pele Abrahamu wakamwaambila kuti, Balijisi Musa abasinsimi, abaswiilile mbabo. 30Walo wakati, Pe, pe, Taata Abrahamu, kwalo anooli nokwabuka umwi kubafu, wainka kulimbabo, nobati kasanduke. 31#Joh 11:45-53Wakamuvuwa kuti, Na tabamvwi Musa abasinsimi, tabakooyoozumina nokubuka uuzwa kubafu.

Currently Selected:

Luka 16: Ibbaib63

Highlight

Copy