Johane 19

1Mpoonya Pilato wakajata Jesu, wakamukwabbaula. 2Abalo basinkondo bakaluka musini wamamvwa, bakamusamika nguwo kumutwe wakwe, alimwi bakamusamika cisani cabwami, 3#Joh 18:22bakaswena kulinguwe bakati, Wabonwa, O mwami waba-Juda. Bakamuumauma amaanza aabo. 4Alimwi Pilato wakazwa, wabaambila kuti, Amubone, ndamuleta kulindinywe, kuti mukazibe kuti nsijene kaambo kulinguwe. 5Mpoonya Jesu wakazwa, ulisamide musini wamamvwa ecisani cabwami. Pilato wakabaambila kuti, Amubone, ngooyu muntu. 6Ndilyonya bapaizi bapati abasilumamba babo nobakamubona, bakoompolola bakati, Abambulwe, abambulwe aciingano. Pilato wakabaambila kuti, Amumutole nobeni mumubambule aciingano, nkaambo nsijene mulandu kulinguwe. 7#Joh 5:18; 10:33; Lev 24:16Ba-Juda bakamuvuwa kuti, Tulijisi mulao, kumulao oyu ulyeelede kufwa nkaambo walicita Mwana a-Leza. 8Ndilyonya Pilato naakamvwa ijwi elyo, wakayoowesya. 9Wakanjila alimwi mucibetekelo, wakabuzya Jesu kuti, Ino uzwa kuli yebo? Pele Jesu takamuvuwide. 10Nkaambo kaako Pilato wakamubuzya kuti, Sena toambi kulindime, tozi kuti ndili abwami bwakuti ukabambulwe aciingano, abwalo bwami bwakukwaangulula? 11#Joh 10:18; Inc 2:23Jesu wakamuvuwa kuti, Nowatakapegwa bwami kuzwa kujulu, nowatalijisi nguzu kulindime, nkaambo kaako oyo uwakandyaaba kulinduwe nguujisi cibi iciinda cako. 12#Inc 17:7Eno kuzwa ciindi eco Pilato wali kuyanda kumwaangulula, pele ba-Juda bakoompololesya bakati, Kuti wamwaangulula muntu oyu, toli mweenzinyina Kaisara. Woonse muntu uulipa kami-kami ngusinkondonyina Kaisara. 13Nkaambo kaako Pilato naakamvwa majwi aya, wakaleta Jesu anze, wakakala acuuno cabwami abusena ubutegwa Ibbuwa lyamabwe, muci-Hebrayo kutegwa Gabata, 14Obu bwali buzuba bwakulibamba, ciindi caamutwe esikati, Wakabaambila ba-Juda kuti, Amubone, ngooyu Mwami wanu. 15#Joh 19:6Pele bakoompololesya kuti, Azwe, azwe, mumubambule aciingano. Pilato wakabaambila kuti, Sena nkabambule Mwami wanu? Bapaizi bapati bukavuwa kuti, Tatujisi Mwami pele Kaisara walo. 16#Mt 27:31-50; Mk 15:20-37; Lk 23:26-46Mpoonya wakabapa nguwe kuti abambulwe aciingano.

Jesu mbwaakaftoida aciingano

(Matayo 27:32-56; Marko 15:16-41; Luka 23:26-49)

17Elyo bakamujata Jesu bamutola, walo wakaliyumwida mwini ciingano, Bakaya kubusena ubutegwa Kaanza, nkokutegwa muci-Hebrayo Golgota, 18nkobakamubambula aciingano, abamwi bobile abakali awalo, akumwi kubbazu omwe, akumwi omwe, walo Jesu akati. 19Alimwi Pilato wakalemba bulembo, wakabubika aciingano. Bulembo bwali kuti, Ngooyu Jesu waku-Nazareta, Mwami waba-Juda. 20Eno ba-Juda banjibanji bakabala bulembo obu, nkaambo oko nkwaakabambwidwa Jesu kwakali kufwaafwi kumunzi. Alimwi majwi aya akalembwa muci-Hebrayo, amuci-Roma, amuci-Helene, 21Nkaambo kaako bapaizi bapati baba-Juda bakamwaambila Pilato bakati, Utalembi kuti, Mwami waba-Juda, pele lemba kuti, Wakaamba kuti, Ndi Mwami waba-Juda, 22Pilato wakavuwa wakati, Ncendalemba ndicilembede.

23Eno basinkondo, nobakamubambula Jesu aciingano, bakabweza zyakusama zyakwe, bakazicita zibeela zyone kuti baabane, umwi umwi abe acibeela comwe, acalo cibaki mbubonya, eno cibaki teecakali amuluko, cakaliswaangene coonse, 24#Int 22:18Nkaambo kaako bakalyaambya beni kuti, Tutacizapauli, pele atuwaale cisolo, na cilaba cani, Kwakaba obo kuti Lugwalo luzyulile lwakuti,

Bakaabilana zyakusama zyangu,

Bakawaalila cibaki cangu cisolo,

Nzeezi nzobakacita basinkondo. 25Eno oko kuciingano ca-Jesu kwakali kwiimvwi banyina, awalo mwanaakwabo banyina, Maliya muka-Klopa, awalo Maliya Magadelene. 26#Joh 13:23Nkaambo kaako Jesu naakabona banyina, awalo sikwiiya ngwaakali kuyanda, uwakali kwiimvwi mpoonya, wakaambila banyina kuti, Mwanakazi, bona, ngooyu mwanaako. 27Eno wakamwaambila sikwiiya kuti, Bona, mbaaba banyoko. Kuzwida ciindi eco sikwiiya oyo wakabatola kumunzi wakwe.

28 # Int 22:15; 69:21; Joh 13:3; 18:4 Munsi lyaaya Jesu mbwaakali kuzi kuti zintu zyoonse zilimaninide, kuti Magwalo azyulile wakati, Ndafwa nyota. 29#Int 69:21Kwakali kabia akazywide waini uupapa. Nkaako bakanika nsinsa muwaini oyo uupapa, biisomeka kusumo akwiitola kumulomo wakwe. 30Eno Jesu naakatambula waini oyo uupapa wakati, Kulimanide, Nkabela wakakotamika mutwe wakwe, wakosoka.

31 # Dt 21:23 Eno nkaambo bwakali buzuba bwakulibamba, kuti mitunta itasyaali aziingano mane ku-Sabata, (nkaambo buzuba obo bwa-Sabata bwakali buzuba bupati) ba-Juda bakakumbila kuli-Pilato kuti maulu aabo atyolaulwe, ayalo mitunta igwisigwe. 32Nkaambo kaako basinkondo bakasika, bazootyolaula maulu aamutaanzi, aaumwi wabaabo abakabambwidwe awalo. 33Pele nobakasika kuli-Jesu, bakabona kuti ulifwide kale, tabakamutyolawide maulu aakwe. 34Nekubaboobo umwi wabasinkondo wakabweza sumo, wakamuyasa kubbazu, ndilyonya kwakazwa bulowa amaanzi. 35Oyo uwakabona wakaba kamboni, bukamboni bwakwe bulisinizizye. Ulizi kuti tabeji, kuti anywebo mukasyome, 36#Kul 12:48; My 9:12; Int 34:20Nkaambo zintu ezi zyakacitwa kuti Magwalo azyulile aamba kuti, Cifuwa cakwe neciba comwe tacikooyootyolwa. 37#Zek 12:10; Ciy 1:7Alimwi lumwi Lugwalo lwaamba kuti, Bayoomulangilila ngobayaside.

Jesu mbwaakazikwa

(Matayo 27:57-66; Marko 15:42-47; Luka 23:50-56)

38 # Mt 27:57-61; Mk 15:42-47; Lk 23:50-55 Munsi lyakooko Josefa waku-Aremateya, uwakali sikwiiya wa-Jesu, pele ngwakumbali nkaambo kakutiya ba-Juda, wakakumbila Pilato kuti agwisye mutunta wa-Jesu. Pilato wakamuzumizya, Elyo wakasika, wakagwisya mutunta wakwe. 39#Joh 3:1-2; Mt 2:11Awalo Nikodemo wakasika, nguwenya uwakazide kuliJesu masiku kusaanguna, wakaleta tununkilizyo utuvwelene, ututegwa mura aalo, mweelwe wamwaanda wampondo. 40Mpoonya bakabweza mutunta wa-Jesu, bakuuzambaila zisani zituba, antoomwe amicelo iinunka kabotu, mbubonya mbuli ciyanza ncobazika ba-Juda, 41Eno mpoonya awo mpaakabambwidwa akali cuumbwe cipya icitanazikidwe muntu. 42Eno nkaambo kabuzuba bwakulibamba bwaba-Juda, bakamuzika Jesu mumonya omo, nkaambo cuumbwe cakali afwaafwi.

Currently Selected:

Johane 19: Ibbaib63

Highlight

Copy