Isaya 43
43
Jehova mbwazovuna ba-Israyeli, babe bakamboni bakwe
1 #
Is 44:6; 42:6; 1 Kor 1:9; 2 Tim 1:9 Pele lino mbuboobu mbwaamba Jehova, ngonguwe iwakakulenga O Jakobo, ngonguwe iwakakubumba O Israyeli. Utayoowi, nkaambo ndakunununa, ndakwiita kuzina lyako, uli wangu. 2#Int 66:12; Dt 31:6-8; Dan 3:25Ciindi noinda akati kamaanzi, njooba ayebo, Noinda akati kamilonga, tiikooyookutola. Noenda mukati kamulilo, tokooyoopya pe, amabangabanga taakooyookutenta. 3#Tus 21:18Nkaambo ndime Jehova Leza wako, Uusalala wa-Israyeli, Mufutuli wako, Ndapa Egepita cibe cinunuzyo cako; Etiopiya a-Seba zyoonse ndazyaaba mucibaka cako. 4#Kul 19:5,6Mbuli mbuwakayandika mumeso aangu, alimwi wakali abulemu, ndakuyandisya, aboobo ndaaba bantu mucibaka cako, ndapa misyobo yabantu kukunununa buumi bwako. 5#Is 41:10,14; 44:2Utayoowi, nkaambo ndi ayebo. Njooleta lunyungu lwako kuzwa kujwe akuyobolola bana bako kuzwa kumbo. 6Njooambila kunyika kuti, Leka, Akwalo kumusanza njookwaambila kuti, Utakasyi, Leta bana bangu kuzwa kule abana bangu basimbi kuzwa kumagolelo aanyika. 7#Is 63:19; 29:23; Int 100:3; Joh 3:3; 2 Kor 5:17; Ef 2:10Leta boonse, kufumbwa uuambwa muzina lyangu, ngundakalengela bulemu bwangu. Ndime ndakamubumba, ndime ndakamwaanza. 8#Is 6:9; 42:19Pozya boofu bali ameso abasinkematwi bajisi matwi. 9Bamasi boonse babungane, inzubo zyoonse ziyoboloke, Nguni akati kabo uukonzya kutulwiida aya makani akutukananina makani aaciindi. Balete bakamboni babo kuti babalulamike. Baswiilile akuzumina kuti, Ndusinizyo. 10#Joh 1:7; Inc 1:8; Heb 12:1; Ciy 1:5; Is 44:8; 41:8Ndinywe bakamboni bangu, mbwaamba Jehova, alakwe mulanda wangu ngundisalide ngukamboni, kuti muzibe, mundizuminine, mumvwisye kuti ndime oyo uuliwo. Taakwe Leza iwakanditaangunina kubumbwa, alimwi taakwe uuyoondisyaala munsi lyangu. 11Ndime, ndime Jehova, Taakwe Mufutuli umbi. 12#Dt 32:16Ndime ndakamulwiida makani, ndime ndakafutula, ndime ndakamukananina, ciindi eco nikwatakuli Leza mweenzu akati kanu. Ndinywe bakamboni bangu, mbwaamba Jehova. Ndime Leza. 13#Int 90:2; Tus 8:23; Mik 5:2; Mt 19:26Ncobeni kuzwa kubuzuba obuno ndime oyo. Taakwe uukonzya kuvuna kumaanza aangu. Milimo niindibeleka, nguni uukonzya kwiikasya?
14Mbuboobu mbwaamba Jehova, Munununi wanu, Uusalala wa-Israyeli, Nkaambo kandinywe ncindatumina Babuloni. Njoobaselusya boonse kuti bacije. Ba-Kasidi bayoocija boonse mumaato aabo aakulibotezya. 15#Hos 13:10Ndime Jehova, Uusalala wanu, Mulengi wa-Israyeli, Mwami wanu. 16#Int 77:19Mbuboobu mbwaamba Jehova uucita inzila akati kalwizi akubamba mugwagwa mumaanzi mayumu; 17#Kul 14:4uupozya inkalaki amabbiza, impi abasilumamba, Baloona boonse antoomwe, tabakooyoobuka limbi. Bamaninina, bazima mbuli intambo yalampi. 18Mutaingasili makani aakamana, mutayeeyi makani aakale. 19#2 Kor 5:17; Ciy 21:5Amubone! Ndacita inkani impya. Iti boneke, Sa tamukooiziba? Njoocita inzila akati kankanda amilonga mumabuwa. 20#Is 48:21; Lk 1:74; Ef 1:5Banyama bamusokwe bayoondilemeka. Bamwaaba ampoo, boonse bayookoodwa nkaambo kakuti ndabapa maanzi munkanda amilonga mumabuwa, kuti nywisye bantu bangu basalidwe, 21bantu mbendakalibumbila kuti banditembaule. 22#Mal 1:13Nekubaboobo tona kundiita, O Jakobo; wandicimwa, O Israyeli. 23Tona kundiletela imbelele zyakupaizya nikuba kundilemekezya azituuzyo zyako. Nsina kukukataazya zipo zyabusu nikuba kukucima tununkilizyo. 24#Is 1:14; Mal 2:17; Jud 1:4Tona kunduulila misale amali aako nikuba kundikutya mafuta aazipaizyo zyako. Wandilemezya zibi zyako, wandikataazya milandu yako. 25#Is 44:22; Jer 31:34; Mik 7:18,19; Ezk 36:22Ndime, ndime oyo uusansamuna milandu yako nkaambo kangu ndemwini, azyalo zibi zyako nsikooyooziyeeya limbi. 26Undiibalusye, tubetekane antoomwe. Ubambe makani aako kuti ululamikwe. 27#Rom 5:12Uso mutaanzi wakabisya, abalo basikwiimaakati bako bakandibisizya. 28#Is 47:6; Malo 2:2; Int 79:4; Jer 24:9; Dan 9:11; Zek 8:13Nciceeco ncindakabisizya bami basalala; nciceeco ncindakabikila Jakobo kuti anyonyooke aba-Israyeli kuti basampaulwe.
Currently Selected:
Isaya 43: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
