Isaya 42

Mulanda wa-Jehova

1 # Is 49:3,6; 52:13; Mt 3:17; 12:18; 17:5; Flp 2:7; Joh 3:35; Ef 1:6; Kol 1:12-14; Is 11:2; Mk 1:11; Lk 3:22; 9:35 Ngooyu mulanda wangu nguntabilila, musale wangu moyo wangu nguukondelwa. Ndabika Muuya wangu alinguwe, kuti aletele bamasi lubeta. 2Takooyoongolola nikuba kulizya ijwi lyakwe. Ijwi lyakwe talikooyoomvwigwa mumugwagwa pe. 3Itete lifuyukide takooyoolityola, akamuni kasuka takooyookazimya. Uyooleta lubeta cakusyomeka. 4#Heb 12:2; Matl 49:10Takooyooceelwa mumuni nikuba kutyolwa, mane akabike lubeta mukati kanyika, Azyalo nyika zyakunkomwe yalwizi ziyoolindila mulao wakwe.

5 # Is 44:24; Zek 12:1; Inc 17:25 Mbuboobu mbwaamba Leza, Jehova, iwakalenga ijulu akuliyanzaala, uubambasika nyika azintu zizwa mulinjiyo, uuabila bantu bali alinjiyo kuyooya, abaabo beendeenda mumo ulabapa muuya. 6#Is 49:6; Lk 2:32; Inc 13:47; 26:23Mebo nde-Jehova ndakwiita mubululami. Njookujata kujanza, njookubamba, njookubika kuti ube cizuminano cabantu amumuni wabamasi, 7#Lk 4:18; 2 Tim 2:26; Heb 2:14; Is 9:2ubononosye meso aaboofu, uvune baange muntolongo, ugwisye abo bakede mumudima muŋanda yabuzike. 8#Kul 3:14; Is 48:11Ndime Jehova. Ndezina lyangu. Bulemu bwangu nsikooyoobupa umbi, akulemekwa kwangu nsikooyookupa zikozyano zifulidwe. 9Amubone! Makani aaciindi amana kale. Ndamulwiida makani mapya. Naatana kuboneka, ndamwaambila ngao.

10 # Int 33:3; 40:3; 107:23 Amwiimbile Jehova lwiimbo lupya. Amumutembaule kuzwa kumagolelo aanyika. Lwizi luvuume azyoonse zili mulindulo. 11Igundu aminzi yalyo iongolole, minzi iikalwa ba-Kedari. Bantu bakede ku-Sela baimbe cakukondwa, baongolole kuzwa kumitwe yazilundu. 12Bape Jehova bulemu, bamutembaule munyika yakunkomwe yalwizi. 13Jehova uyooinka mbuli mwaalumi sintaze, uyoobusya busungu mbuli silumamba. Uyookwiila akuvuluma, uyoolwisya basinkondonyina canguzu. 14Ndakalyuumwide ciindi cilamfu. Ndakalitontwede akulyaanga. Pele sunu ndalila mbuli mwanakazi uumyongwa. Ndafooma akufwekemba loko. 15Njooyuminizya zilundu atulundulundu, njoopusamya misamu yazyo yoonse. Njoocita kuti milonga ibe nyika injumu, amaziba oonse njooayuminizya. 16Nkabela njooenzya boofu munzila njibatezi, njoobatola mumigwagwa njebatabwene, Njoosandula mudima kunembo lyabo ube mumuni, amasena aapilingene njooalulamika. Ngaaya makani ngenti cite, nkabela nsikooyoobalekelezya pe. 17Bayoopilusigwa kusule, bayoousa insoni boonse basyoma mituni, baambila zikozyano zifulidwe kuti, Ndinywe ba-Leza besu.

18Amuswiilile nubasinkematwi. Amulange nuboofu kuti mubone. 19#Is 43:8; Ezk 12:2; Joh 7:49Nguni moofu cita mulanda wangu? Nguni musinkematwi mbuli mutumwa wangu ngundatuma? Nguni moofu mbuli similimo wangu? Nguni moofu mbuli mulanda wa-Jehova? 20#Dt 4:3; Is 1:3; Rom 2:21Ulabona zintu zinji pele tobiki moyo wako kulinzizyo. Matwi aakwe alisinkukide pele taswiilili. 21Jehova wakakondwa nkaambo kabululami bwakwe, aboobo uyoolemeka mulao, utembaulike 22Pele oyu musyobo wabantu, balisaalidwe, balipenzedwe. Boonse balicedwe mumalindi, baliyubide muntolongo. Basaalwa, elyo taakwe uubavuna. Balanyanzigwa imbono, nkabela taakwe uuamba kuti, Amuzipilusye. 23Nguni akati kanu uuzumina kuswiilila aya makani? Nguni uuzumina kumvwisya, ateelele makani aaciindi ciza? 24Nguni wakaaba Jakobo kuti asaalwe? Nguni wakaaba ba-Israyeli mumaanza aabasikubba? Sa teensi Jehova? Sa teensi oyo nguwenya ngutwabisizya, ngutwakakakila inzila zyakwe, ngutwakakaka kuswiilila mulao wakwe? 25#2 Bam 25:9; Hos 7:9Nciceeco ncaakamutilila bukali bwakwe bupya ankondo yakwe injumu. Cakamutenta koonse koonse, nekubaboobo takwakaziba. Cakamuumpa, nekubaboobo takwakabika moyo wakwe kumakani.

Currently Selected:

Isaya 42: Ibbaib63

Highlight

Copy