Isaya 41

Jehova alike ngu-Leza, Ulagwasya bantu bakwe

1Amuumune kubusyu bwangu inywe nuzisi zyakunkomwe yalwizi. Misyobo yabantu ibukulusye inguzu zyabo. Baswene kufwaafwi, elyo kunsi bayooamba. Atuswanaane kukubeteka makani. 2#Is 46:11; 45:1Nguni uubusya muntu uuzwa kujwe uuya buzunda koonse nkwalyataula? Ulaaba bamasi mumaanza aakwe, ulamubika kuti abe mweendelezi wabami. Ulabaabila ipanga lyakwe mbuli lusuko, batandwe mbuli buungu kunembo lya buta bwakwe. 3Ulaya bubatobela, ulainda kabotu, nekuba kuti inzila njatola maulu aakwe taanaindide mumo. 4#Is 44:7; 43:10; 48:12; Inc 15:18; Ciy 1:11,17Nguni iwakabeleka akucita obo? Nguni wakaita mazyalani oonse kuzwa kumatalikilo? Ndime Jehova, ndime mutaanzi, akumamanino njooba mbubonya obo. 5Nyika zyakunkomwe yalwizi zyakabona akuyoowa. Magolelo aanyika akakankaama, Bakaswena afwaafwi akusika. 6Bakagwasyanya, umwi aumwi mweenzinyina, umwi aumwi wakaambila siluzubonyina kuti, Koyuma. 7Aboobo mubezi wakayumya mufuzi, ayooyo uubulunganya ansando wakagwasya sikuuma cifulilo. Wakaamba aakufula kuti, Ncibotu. Wakacikankamina amanembe kuti citasunzululwi.

8 # Matl 18:19; Neh 9:7; 2 Mak 20:7; Jak 2:23 Pele uwe, O Israyeli mulanda wangu, Jakobo ngonsalide, lunyungu lwaAbrahamu muzolwani wangu, 9uwe ngundakajata kuzwa kumagolelo aanyika, ngundakaita kuzwa kuzyooko zyayo, akukwaambila kuti, Nduwe mulanda wangu, ndakusala, nsikutandide pe, 10#Dt 31:6; Rom 8:31Utayoowi, nkaambo ndili ayebo. Utakankami, nkaambo ndime Leza wako. Njookuyumya, njookugwasya, ncobeni njookutabilila ajanza lyalulyo lyabululami bwangu. 11#Kul 23:22; Zek 12:3Bona! Boonse bakukalalila bayoofwa insoni, bayoousigwa bweeme. Abo bakubusizya inkondo bayooba cintu buyo, bayoonyonyooka. 12Abo basikwaambana ayebo, uyoobayandaula akutabajana. Boonse basinkondonyoko bayooloba, bayooba cintu buyo. 13Nkaambo mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako. 14#Job 19:25Utayoowi O ciyokansi Jakobo, anywebo nubantu ba-Israyeli. Nookugwasya, mbwaamba Jehova a-Munununi wako Uusalala wa-Israyeli. 15#Mik 4:13; 2 Kor 10:4,5Bona! Ndakubika kuti ube cipozyo cibosya cipya cijisi meno, lino uyoopola zilundu akuzipwayaula, atwalo tulundulundu uyootuvwimbaula mbuli buungu. 16#Jer 51:2Uyoozimwaya, elyo muuwo uyoozitola, akale kambizi kayoozimwaisya. Lino uyoosekelela muli-Jehova akutembaula Uusalala wa-Israyeli.

17Batengwana abacete balayandaula maanzi pele taakwe, aboobo indimi zyabo zyayuminina nkaambo kanyota. Mebo nde-Jehova njoobavwiila, mebo nde-Leza wa-Israyeli nsikooyoobalekelezya. 18#Is 35:6,7; Int 107:35Njootuntumusya milonga atala lyazilundu zikukwidwe muuwo, amwalo mumakuti njoobusya matoolo. Njoosandula inkanda kuba iziba lyamaanzi, ayalo nyika injumu iyooba tusensa twamaanzi. 19Mumonya munkanda njoomeneka misamu yakedari ayamuunga ayamisiwe ayamafuta, amugundu muyoomena misamu yakupresi amisigili amizimbwa yoonse antoomwe, 20#Job 12:9kuti babone akuziba akubika myoyo yabo kumakani, bamvwisye boonse kuti ijanza lya-Jehova ndelyakacita obo, Uusalala wa-Israyeli nguwakazilenga.

21Amubambe makani aanu, mbwaamba Jehova. Amulete bukamboni bwanu, mbwaamba mwami wa-Jakobo. 22Balete makani, batulwiide zintu ziyooboneka. Amutulwiide makani aakainda, tuzibe mbwaabede, kuti tubike myoyo yesu kulingao, tuzibe makani aaciza. Na makani aaciza, amutulungulwide ngao. 23#Dt 18:22; Jer 10:5Amutulwiide makani aacili kunembo, kuti tuzibe kuti muli ba-Leza. Amucite makani naaba mabotu naaba mabi, kuti twaabone akugamba. 24Ma! Muli zintu buyo, amilimo yanu tiikwe makani. Kufumbwa muntu uumusala ulasesemya.

25 # Ezr 1:2 Ndabusya muntu uuzwa kunyika: ngooyu wasika. Kuzwa kujwe ulalemeka izina lyangu. Uyoolyataula basilutwe mbuli butope, mbubonya mbuli mubumbi mbwakanda bulongo. 26Nguni wakalungulula makani kuzwa kumatalikilo kuti tuzibe? Nguni wakatulwiida kalekale, twaambe kuti uliluleme? Ncobeni taakwe uulungulula, taakwe uumulwiida makani, taakwe uuswiilila majwi aanu. 27Amubone! Ndime ndakataanguna kwaambila Zioni kuti, Ngaaya makani, ngaaya makani, amwaateelele, Ndime ndakatumina Jerusalemu sikuleta makani mabotu. 28#Is 63:5; Dan 2:10Na ndalanga, taakwe muntu pe. Taakwe sikulaya akati kabo uukonzya kundivwiila na ndabuzya makani. 29Ncobeni boonse mbabuyo, amilimo yabo tiikwe makani. Zikozyano zyabo zifulidwe nzyamuuwo buyo, zilipilingene.

Currently Selected:

Isaya 41: Ibbaib63

Highlight

Copy