Popular Bible Verses from Isaya 43

Share

Amubone! Ndacita inkani impya. Iti boneke, Sa tamukooiziba? Njoocita inzila akati kankanda amilonga mumabuwa.

Ciindi noinda akati kamaanzi, njooba ayebo, Noinda akati kamilonga, tiikooyookutola. Noenda mukati kamulilo, tokooyoopya pe, amabangabanga taakooyookutenta.

Mutaingasili makani aakamana, mutayeeyi makani aakale.

Pele lino mbuboobu mbwaamba Jehova, ngonguwe iwakakulenga O Jakobo, ngonguwe iwakakubumba O Israyeli. Utayoowi, nkaambo ndakunununa, ndakwiita kuzina lyako, uli wangu.

Mbuli mbuwakayandika mumeso aangu, alimwi wakali abulemu, ndakuyandisya, aboobo ndaaba bantu mucibaka cako, ndapa misyobo yabantu kukunununa buumi bwako.

Nkaambo ndime Jehova Leza wako, Uusalala wa-Israyeli, Mufutuli wako, Ndapa Egepita cibe cinunuzyo cako; Etiopiya a-Seba zyoonse ndazyaaba mucibaka cako.

Utayoowi, nkaambo ndi ayebo. Njooleta lunyungu lwako kuzwa kujwe akuyobolola bana bako kuzwa kumbo.

Ndime, ndime oyo uusansamuna milandu yako nkaambo kangu ndemwini, azyalo zibi zyako nsikooyooziyeeya limbi.

Ndinywe bakamboni bangu, mbwaamba Jehova, alakwe mulanda wangu ngundisalide ngukamboni, kuti muzibe, mundizuminine, mumvwisye kuti ndime oyo uuliwo. Taakwe Leza iwakanditaangunina kubumbwa, alimwi taakwe uuyoondisyaala munsi lyangu.

Ndime, ndime Jehova, Taakwe Mufutuli umbi.

Ncobeni kuzwa kubuzuba obuno ndime oyo. Taakwe uukonzya kuvuna kumaanza aangu. Milimo niindibeleka, nguni uukonzya kwiikasya?

Banyama bamusokwe bayoondilemeka. Bamwaaba ampoo, boonse bayookoodwa nkaambo kakuti ndabapa maanzi munkanda amilonga mumabuwa­, kuti nywisye bantu bangu basalidwe, bantu mbendakalibumbila kuti banditembaule.

Njooambila kunyika kuti, Leka, Akwalo kumusanza njookwaambila kuti, Utakasyi, Leta bana bangu kuzwa kule abana bangu basimbi kuzwa kumagolelo aanyika. Leta boonse, kufumbwa uuambwa muzina lyangu, ngundakalengela bulemu bwangu. Ndime ndakamubumba, ndime ndakamwaanza.

Mbuboobu mbwaamba Jehova uucita inzila akati kalwizi akubamba mugwagwa mumaanzi mayumu; uupozya inkalaki amabbiza, impi abasilumamba, Baloona boonse antoomwe, tabakooyoobuka limbi. Bamaninina, bazima mbuli intambo yalampi.

Ndime Jehova, Uusalala wanu, Mulengi wa-Israyeli, Mwami wanu.