2 Makani 21
21
Bwami bwa-Joramu
1Lino Josafati naakafwa, wakazikwa abamawisi mumunzi wa-Davida, nkabela Joramu mwanaakwe wakalya izina lyakwe. 2Kajisi babu nyina, bana ba-Josafati: Azariya a-Jehieli a-Zekariya a-Azariya a-Mikayeli a-Sefatiya, Aba boonse bakali bana ba-Josafati mwami wa-Juda. 3Wisaabo wakabapa zyaabilo zinji, insiliva angolida azintu ziyandisi, antoomwe aminzi iili amabaya mucisi ca-Juda, pele bwami wakabupa joramu, nkaambo ngonguwe iwakataanguna: kuzyalwa. 4#Matl 4:8; Bab 9:5; 1 Joh 3:12Lino Joramu naakamana kulya bwami bwawisi, alimwi naakaliyumya, wakajazya babunyina boonse ipanga, abamwi basilutwe ba-Israyeli. 5Joramu kajisi myaka iili makumi otatwe aibili naakaba mwami, nkabela wakeendelezya mu-Jerusalemu myaka iili musanu aitatu. 6#2 Bam 8:18; 2 Mak 18:1; 22:2; Neh 13:26Wakeenda munzila yabami ba-Israyeli, mbubonya mbubakeenda basiluzubo ba-Ahabu, nkaambo mwana musimbi wa-Ahabu nguwakaba mukaakwe. Wakacita bubi mumeso aa-Jehova. 7#2 Sam 7:12,13; 1 Bam 11:36; 2 Bam 8:19; Int 132:11Nekubaboobo Jehova takwakanyonyoona luzubo lwa-Davida, nkaambo kacizuminano ncaakatangene a-Davida, mbuli mbwaakasyomezya kumupa mumuni, walo abana bakwe, mazuba oonse.
8 #
Matl 27:40; 2 Bam 8:20; 9:22; Int 106:39; Ciy 17:1-5 Mumazuba aakwe ba-Edomu bakapapila ba-Juda, balisalila mwami wabo beni. 9Elyo Joramu wakainka abasilutwe bakwe ankalaki zyakwe zyoonse, nkabela wakabuka masiku, wauma ba-Edomu ibakamuzyungulukide, walo abami bankalaki zyakwe. 10#Matl 27:40Mbuboobo ba-Edomu mbubakapapila bwami bwa-Juda akusikila sunu. Lino kuciindi eco nciconya bakamupapila ba-Libina abalo, nkaambo kakuti wakaleka Jehova Leza wabamawisi.
11 #
Lev 17:7; 20:5 Alimwi wakayaka zipaililo zyakuzilundu mumalundulundu aa-Juda, aboobo wakaleesya bantu baku-Jerusalemu akweenzya ba-Juda munzila iitaluleme. 12Lino kwakamusikila lugwalo luzwa kuli-Eliya musinsimi. Lwakati, Mbuboobu mbwaamba Jehova Leza wa-Davida uso. Mbuli mbotana kweenda munzila zya-Josafati uso amunzila zya-Asa mwami wa-Juda, 13#Kul 34:15; 2 Bam 9:22pele weenda munzila zyabami ba-Israyeli, alimwi waleesya ba-Juda abantu bakede mu-Jerusalemu, mbubonya mbuli basiluzubo ba-Ahabu mbubakaleesya bantu, alimwi wajaya banyoko baluzubo lwauso, bantu babotu kwiinda nduwe, 14bona! Jehova ulaumya bantu bako luumo lupati, abana bako, abanakazi bako, ambono zyako. 15Ayebo uyoociswa loko bulwazi bwamumala mane lumwi mala aako azwe nkaambo kabulwazi butamani.
16 #
2 Sam 24:1; 1 Bam 11:14,23; 2 Mak 22:1 Mpawo Jehova wakabusizya Joramu bukali bwaba-Filisti abukali bwaba-Arabu ibabambene aba-Kusi. 17#2 Mak 24:7Nkabela bakeza mucisi ca-Juda akucisaala. Bakatola imbono zyoonse nzibakajana kuŋanda yamwami, abana bakwe abanakazi bakwe, Teekwakamusyaalila mwana naba omwe cita Jehoazi mwanaakwe muniini.
18Lino kusule lyayaaya Jehova wakamuumya mumala bulwazi butasilikiki. 19Lino nicakaba ciindi, kumamanino aamyaka yobile, mala aakwe akazwa nkaambo kabulwazi, aboobo wakafwa cakuzunta loko. Nkabela bantu bakwe teebakamucitila cililo cakulizya mbuli cilizyo cabamawisi. 20Kajisi myaka iili makumi otatwe aibili naakaba mwami, elyo wakeendelezya muJerusalemu myaka iili musanu aitatu, pele naakafwa katakwe buusu mumyoyo yabantu, Bakamuzika mumunzi wa-Davida, pele takwakazikwa mutubanda twabami.
Currently Selected:
2 Makani 21: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
