1 Ba-Korinto 15

Makani aabubuke bwabafu

1Lino bakwesu, ndamuzibya Makani Mabotu ngindakamukambaukila, ngaonya ngimwakatambula, nkabela muliimvwi mulingao, 2alimwi ngaonya ngimufutusizidwe, na mwakakatila makani ngindakamukambaukila, nkutaamba kuti mwakasyoma cabuyo. 3#Is 53:5-12Nkaambo kukusaanguna ndakamutambika eco ncindakatambula ndemwini, nkukuti kuti Kristo wakafwa nkaambo kazibi zyesu, mbuli mbwaamba Malembe, 4#Int 16:8-10; Mt 12:40; Inc 2:24-32; 2 Bam 20:5; Is 54:7; Hos 6:2alimwi wakazikwa, akubuka kubuzuba bwatatu, mbuli mbwaamba Malembe. 5#Mt 28:16-17; Mk 16:14; Lk 24:34,36; Joh 20:19Lino wakabonwa kwa-Kefa, lumwi wakabonwa akuli bali ikumi ababili. 6Kusule wakabonwa kulibabunyina bainda myaanda yosanwe ciindi comwe, akati kababunyina abo banamaleya mpobacili asunu, pele bamwi balifwide. 7#Lk 24:50Lino kusule wakabonwa kwa-Jakobo, elyo kulibaapostolo boonse, 8#Inc 9:3-6; 1 Kor 9:1nkabela kukusyaalila wakabonwa akulindime mbuli mwana uubelulwa. 9#Inc 8:3; Ef 3:8; Mt 5:19; 1 Tim 1:15Ikuti ime ndimuniini wabo baapostolo boonse, nseeledwe izina lyaapostolo, nkaambo ndakapenzya imbungano ya-Leza. 10#2 Kor 11:5,23; 6:1Pele luzyalo lwa-Leza ndulwakandicita mbumbede, alimwi luzyalo lwakwe lwakulindime teelwakaba lwabuyo pe, pele ndakabeleka milimo kwiinda boonse, nekubaboobo teensi ndime pe, nduzyalo lwa-Leza lundikalide. 11Pele nimba ndime nibaba mbabo taakwe makani. Mbubonya mbutukambauka, nkabela inywe mwakazumina ngaonya.

12Lino na kulakambaukwa kuti Kristo wakabuka kubafu, ino balaambilanzi bamwi akati kanu kuti taakwe bubuke bwabafu? 13Kwatanooli bubuke bwabafu, alakwe Kristo tabukide. 14Pele Kristo naatabukide, elyo lukambauko lwesu ndwabuyo, alwalo lusyomo lwanu ndwabuyo. 15#Inc 1:22; 5:32Alimwi, kwanooli boobo, kulajanwa kuti tuli bakamboni ba-Leza babeji, nkaambo twakalungulula kuti Leza wakabusya Kristo kubafu, anukuti takakamubusya pe, bafu nibatabuki. 16#1 Kor 6:14Nkaambo bafu nibatabuki, alakwe Kristo tabukide, 17pele anooli Kristo tabukide, elyo lusyomo lwanu ndwabuyo, mucili mukati kazibi zyanu. 18Alimwi abo bafwide muli-Kristo balifwidilide, 19Kuti mubuumi obuno luzutu mutupangikide moyo ali-Kristo, tulafwidika insoni kwiinda bantu boonse.

20 # Kol 1:18; 1 Kor 11:30 Pele ncobeni Kristo ulibukide kubafu, waba kabalwebalwe kabaabo bafwide. 21#Matl 3:17-19; Rom 5:12,18Nkaambo mbubonya mbuli lufu mbulwakabeda ijanza lyamuntu, ndijanza lyamuntu ndibwakabeda abwalo bubuke bwabafu, 22Nkaambo mbuli mbubafwa boonse muli-Adamu, mbubonya obo mbubayooponezegwa boonse muli-Kristo, 23#1 Tes 4:16; Ciy 20:5pele umwi aumwi kuciindi cakwe ceelede, Kristo ngukabalwebalwe, elyo kusule bana ba-Kristo kuciindi cakuboola kwakwe. 24#Dan 2:44Ndilyonya naayooba mamanino, nayootambika bwami kumaanza aa-Leza wisi, nayoolobesezya boonse beendelezi abami abasimutwe. 25#Int 110:1; Mt 22:44Nkaambo uleelede kweendelezya mane do nanooyoobikide basinkondonyina boonse kunsi lyamaulu aakwe. 26#Ciy 20:14; 21:4Sinkondonyina musyaalizi uuyoolobesegwa ndufu. 27#Int 8:6Nkaambo zintu zyoonse Leza wazibombya kunsi amaulu aakwe, Pele na kwaambwa kuti zintu zyoonse zilibombesedwe, ncobeni nkokuti teensi kwaamba oyo iwakamubombesezya zintu zyoonse. 28Lino naamana kumubombesezya zintu zyoonse, elyo alakwe Mwana mwini uzoolibombya kuliyooyo iwakamubombesezya zintu zyoonse, kuti Leza abe malondwedo aazintu zyoonse.

29Alimwi nkutyeni abo babapatizigwa nkaambo kabafu? Kuti taakwe bubuke bwabafu, ino nkaambonzi bantu nibabapatizigwa nkaambo kabafu? 30#Rom 8:36Aswebo tubeni tubeda anzi mubutambo ciindi coonse? 31#2 Kor 4:10,11Mebo ndili mulufu mazuba oonse. Ndaamba cakusinizya mbubonya mbuli kutangala nkwenjisi nkaambo kandinywe muli-Jesu Kristo Mwami wesu. 32#Is 22:13Kuti nindakalwa ku-Efese mbuli bantu mbubalwa abanyama bakali, cilandigwasya buti? Kuti bafu tababuki, atulye akunywa buyo, nkaambo junza tulafwa.

33Mutalyeeni. Mweenda abamineme, anywebo mulaminama. 34#Rom 13:11; Ef 5:14; 1 Kor 6:5; Inc 26:8Amusinsimuke cakululama, mutabi nimucita zibi, nkaambo bamwi banu tabajisi luzibo lwa-Leza. Ndaamba cakumuusya insoni.

35Pele inga umwi muntu ulaamba kuti, Ino bafu balabuka buti? Baleza amibilinzi? 36#Joh 12:24We, mufubafuba! Kufumbwa cintu ncobyala webo, tacikooyooba abuumi catasaanguna kufwa. 37Alimwi, eco ncobyala taceensi ngomubili uuyooba pe, ninseke buyo yabulotwe nanka imwi iili boobo, 38#Matl 1:11elyo Leza uliipa mubili mbuli mbwayanda, musyobo umwi aumwi wambuto ulaupa mubili wawo wini, 39Nyama yoonse tiielene pe, Kuli nyama yabantu, kuli nyama yabanyama, kuli nyama yanswi, kuli nyama yabayuni. 40Alimwi kuli mibili yakujulu amibili yaansi, pele bulemu bwayakujulu mbumbi, abulemu bwayaansi mbumbi. 41Nkubuli bulemu bwazuba, abulemu bwamweezi, abulemu bwanyenyeezi, nkaambo inyenyeezi imwi ilipambukene kunyenyeezinyina kubulemu.

42Mbubonya obo mbububede bubuke bwabafu, Cibyalwa cilafwika, cibuka tacifwiki. 43#Flp 3:20,21Cibyalwa cilasampaulika, cibuka cilijisi bulemu. Cibyalwa cilikompeme, cibuka cilijisi inguzu. 44Cibyalwa mubili wamuntunsi, cibuka mubili wamuuya. Mubili wamuntunsi ngumbi, amubili wamuuya ngumbi. 45#Matl 2:7; Joh 6:63; 2 Kor 3:6,17Mbuboobu mbukulembedwe kuti, Muntu mutaanzi Adamu wakaba muntunsi muumi, Adamu musyaalizi wakaba muuya uupa buumi. 46Pele uusaanguna teensi wamuuya pe, wamuntunsi nguusaanguna, elyo musule wamuuya, 47#Matl 2:7Muntu mutaanzi wazwa ansi, ngwabulongo, muntu wabili wazwa kujulu, 48Mbuli oyu sibulongo mbwabede, mbubonya abalo basibulongo mbubabede. Alimwi, mbuli sikujulu mbwabede, mbubonya abalo basikujulu mbubabede. 49#Matl 5:3Nkabela mbuli mbutwakajisi cinkozya casibulongo, tuyooba acinkozya casikujulu mbubonya.

50 # 1 Kor 6:13 Lino bakwesu, ndamwaambila eci. Bantunsi tabakonzyi kuvuba Bwami bwa-Leza, alimwi bafwika tabakonzyi kuvuba zitafwiki. 51#1 Tes 4:15-17Amubone, ndamwaambila makani aasisidwe. Ngaaya, Tatukooyoofwa toonse pe, pele toonse buyo tuyoosanduka, 52#Mt 24:31; 1 Tes 4:16Tuyoosanduka mukaindi kaniini loko, mbuli mululabo lomwe lwaliso, nuuyoolila mweembo musyaalizi. Nkaambo mweembo uyoolila, elyo bafu bayoobuka mbuli batafwiki, aswebo nituyoosanduka. 53#2 Kor 5:4Nkaambo eci ciboleka cileelede kusamikwa butaboli, acalo eci cifwika cileelede kusamikwa butafwiki. 54#Is 25:8Lino ciboleka nicamana kusamikwa butaboli, acalo cifwika nicamana kusamikwa butafwiki, ndilyonya ndiliyooba eli ijwi lilembedwe lyakuti, Lufu lwamenenenwa kuluzundo. 55#Hos 13:14; Is 25:8We, lufu! luli kuli luzundo lwako? We, lufu! luli kuli lumoola lwako? 56#Rom 7:13; 6:14Lumoola lwalufu nzibi, alimwi inguzu zyalufu ngumulao. 57Pele tulalumba Leza ikuti ulatupa luzundo kunguzu zya-Mwami wesu Jesu Kristo.

58 # 2 Mak 15:7; Ciy 14:13 Mbubo, bakwesu bayandika, amukakatile, mutazungaani, Amupangike myoyo yanu lyoonse kumilimo ya-Mwami, nkaambo mulizi kuti milimo yanu yamu-Mwami tiikonzyi kuba yabuyo pe.

Currently Selected:

1 Ba-Korinto 15: Ibbaib63

Highlight

Copy