1 Ba-Korinto 14

Businsimi ncintu cibotu kwiinda kwaamba myaambo, nkaambo bulayaka

1 # 1 Kor 12:10,31 Amutobele luyandisyo, alimwi amupangike myoyo yanu kuzipego zya-Muuya, pele kwiinda zyoonse kubusinsimi. 2Nkaambo sikwaamba myaambo, teensi bantu mbaambila pe, ulaambila Leza luzutu, nkaambo taakwe muntu uumvwa, ulaamba makani aasisidwe aa-Muuya. 3Pele oyo uusinsima ulaambila bantu majwi aayaka aakusenengezya akusoozya, 4Oyo uuamba myaambo ulaliyaka mwini buyo, pele oyo uusinsima ulayaka basimbunganonyina, 5#My 11:29Lino ndayanda kuti nyoonse buyo mwaambye myaambo, pele cintu ncinjanda cakwiinda ncakuti musinsime. Nkaambo oyo uusinsima ulainda sikwaamba myaambo, cita apandulule, kuti babe abuyake abalo basimbungano.

6Lino kuciindi ecino, nubakwesu, kuti ndeza kulindinywe kuza bwaamba myaambo, nkamugwasye buti, cita ndamwaambila ciyubunuzyo nanka luzibo nanka lusinsimo nanka lwiiyo? 7Azyalo zintu zilila, mbuli nyeele nanka kantimbwa, kuti tazipambukanyi kabotu indilo zyazyo, ino kulazibwa buti kuti ncinzi eco cisibwa nanka cuumwa. 8Mweembo wanoolila cakutamvwisigwa nguni uunga ulalibambila inkondo? 9Mbukubede kulindinywe anywebo. Indimi zyanu zyatanooamba majwi aaswiililika, ino kulazibwa buti kuti makaninzi aambwa? Mulaba anga mwaambila muuwo buyo. 10Mbubonya obo nkwiili myaambo yamisyobo misyobo ansi ano, nkabela taakwe uutaswiililiki, 11pele kuti nsimvwisyi mwaambo mbuubede, elyo mumeso aasikwaamba ndaba mbuli ubwelebweza buyo, alakwe sikwaamba ulaba ubwelebweza buyo kulindime, 12Lino anywebo, mbuli mbumusungwaala kunjilwa myuuya, amupangike myoyo yanu kuti mukainde kuya kana abasimbunganonyokwe. 13Aboobo, oyo uuamba myaambo myaambo uleelede kukomba kuti apegwe bupanduluzi.

14Nkaambo kuti ndakomba mumwaambo umbi, lino muuya wangu ulakomba ncobeni, pele miyeeyo yangu tiigwasigwi pe. 15#Ef 5:19Lino nkutyeni? Nookomba kumuuya, pele nookomba kumiyeeyo yangu ayalo. Nooimba kumuuya, pele nooimba kumiyeeyo yangu ayalo. 16Kwataba boobo, kuti kolumba Leza kumuuya, ino oyo uutaiyide ulakonzya buti kuzuminina kulumba kwako kuti Ameni? Nkaambo tezi mboamba. 17Webo ulalumba kabotu, nekubaboobo walo tayakwi. 18Ndalumba Leza kuti ndamwiinda nyoonse kukwaamba myaambo, 19pele mumbungano cilandibotela kuti nkaambe majwi naba osanwe amiyeeyo yangu, kuti nkaiisye beenzuma, kwiinda kwaamba majwi aali zyuulu zili ikumi mumwaambo umbi.

20 # Ef 4:14; Flp 3:12,15 Nubakwesu, mutabi mbuli bana kumakani aabusongo. Kumakani aabubi amube bacece buyo, pele kumakani aabusongo amube bazonokede. 21#Is 28:11-12; Dt 28:49Kulilembedwe mubbuku lya-Mulao kuti, Bantu aba nzoobaambila amyaambo imbi amilomo imbi, nekubaboobo tabakoozoondiswiilila pe. Mbuboobo mbwaamba Jehova. 22Aboobo, eyi myaambo imbi tiili citondezyo kulibaabo bazumina pe, pele kulibaabo batazumini. Anukuti businsimi tabweensi bwabaabo batazumini pe, mbubwabaabo bazumina, 23#Inc 2:13Lino kuti imbungano yanu yoonse yabungana antoomwe, nkabela boonse buyo balaamba myaambo imbi, elyo kulanjila bamwi bataiyide nanka bamwi batazumini, sa tabakonzyi kwaamba kuti mwasondoka na? 24#Inc 4:13Pele kuti boonse balasinsima, elyo kulanjila umwi uutaiyide nanka umwi uutazumini, ncobeni oyo muntu ulayaswa mumoyo kuliboonse, ulalingulwa kuliboonse. 25#Joh 4:19; 16:8; Is 45:14; Dan 2:47; Zek 8:23Makani aasisidwe aamumoyo wakwe alaboneka, elyo ulawida kumeso aakwe akukomba Leza, ulazumina kuti ncobeni Leza mpali akati kanu.

Milimo yoonse yakukomba mumbungano ileelede kubambwa kabotu akucililana

26 # 1 Kor 11:18; 12:8; Ef 4:12 Lino nkutyeni, bakwesu? Ciindi ncimubungana, umwi aumwi ulijisi lwiimbo nanka lwiiyo nanka luyubununo nanka mwaambo nanka lupanduluzyo, Ncibotu, pele oonse abe aakuyasya, 27Kwanooli baambya myaambo imbi, abo baamba babe bobile nanka kutainda batatu, alimwi baambe omwe omwe, nkabela akube umwi uupandulula, 28Pele kuti taakwe sikupandulula, elyo sikwaamba myaambo uleelede kuumuna buyo mumbungano, alyaambile mwini mumoyo akwaambila Leza. 29#1 Tes 5:21; Inc 17:11Abalo basinsimi baambe bobile na botatwe, nkabela bamwi babuzyanye makani aambwa. 30Umwi uukede aakuyubunwidwa makani, elyo oyo uuli mukwaamba aumune. 31Nkaambo mulakonzya kusinsima nyoonse omwe omwe, kuti boonse baiye akuyumizigwa mumoyo. 32Myuuya yabasinsimi ilakonzya kweendelezegwa kubasinsimi beni, 33ikuti Leza tali Leza walupilingano pe, ngwaluumuno. Mbukubede mumbungano zyoonse zyabasalali.

34 # 1 Kor 11:3; Tit 2:5; 1 Tim 2:12; Ef 5:22; Matl 3:16 Banakazi baumune mumbungano, nkaambo balo tabazumizigwi kwaamba, Balibombye buyo, mbuli mbuwaamba Mulao. 35Kuti balayanda kwiiya makani, babuzye baalumi babo beni kuŋanda, nkaambo masampu kuti banakazi baamba mumbungano.

36Ma! Sa kulindinywe nkukwakazwa Makani aa-Leza? Na sa kulindinywe kulike nkwaakasikila?

37 # 1 Joh 4:6 Aakuli muntu uliyeeya kuti ndi musinsimi, nanka kuti ndi simuuya, azibe kuti aya makani ngindamulembela milazyo ya-Mwami. 38Kufumbwa muntu uukaka, alakwe mwini uyookakwa.

39Mbubo, bakwesu, amukasukamine businsimi, nkabela kwaamba myaambo imbi akwalo mutakukasyi, 40#Kol 2:5pele zintu zyoonse buyo zicitwe kabotu akucililana.

Currently Selected:

1 Ba-Korinto 14: Ibbaib63

Highlight

Copy