Popular Bible Verses from 1 Ba-Korinto 15

Share

Mbubo, bakwesu bayandika, amukakatile, mutazungaani, Amupangike myoyo yanu lyoonse kumilimo ya-Mwami, nkaambo mulizi kuti milimo yanu yamu-Mwami tiikonzyi kuba yabuyo pe.

Pele tulalumba Leza ikuti ulatupa luzundo kunguzu zya-Mwami wesu Jesu Kristo.

Mutalyeeni. Mweenda abamineme, anywebo mulaminama.

Pele luzyalo lwa-Leza ndulwakandicita mbumbede, alimwi luzyalo lwakwe lwakulindime teelwakaba lwabuyo pe, pele ndakabeleka milimo kwiinda boonse, nekubaboobo teensi ndime pe, nduzyalo lwa-Leza lundikalide.

We, lufu! luli kuli luzundo lwako? We, lufu! luli kuli lumoola lwako? Lumoola lwalufu nzibi, alimwi inguzu zyalufu ngumulao.

Amubone, ndamwaambila makani aasisidwe. Ngaaya, Tatukooyoofwa toonse pe, pele toonse buyo tuyoosanduka, Tuyoosanduka mukaindi kaniini loko, mbuli mululabo lomwe lwaliso, nuuyoolila mweembo musyaalizi. Nkaambo mweembo uyoolila, elyo bafu bayoobuka mbuli batafwiki, aswebo nituyoosanduka.

Nkaambo mbubonya mbuli lufu mbulwakabeda ijanza lyamuntu, ndijanza lyamuntu ndibwakabeda abwalo bubuke bwabafu, Nkaambo mbuli mbubafwa boonse muli-Adamu, mbubonya obo mbubayooponezegwa boonse muli-Kristo

Nkaambo eci ciboleka cileelede kusamikwa butaboli, acalo eci cifwika cileelede kusamikwa butafwiki.

Nkaambo uleelede kweendelezya mane do nanooyoobikide basinkondonyina boonse kunsi lyamaulu aakwe. Sinkondonyina musyaalizi uuyoolobesegwa ndufu.