SAN LUCAS 2

Jesús oa vae regua

(Mt 1.18-25)

1Jókuae ara rupi, mburuvicha guasu Augusto César jee vae omee mborookuai opaete vae oyepapauka vaerä. 2Kuae tenondegua yepapa oyepo Cirenio oiko ɨvɨ Siria pe mburuvicharä yave. 3Jare opaete vae yogüɨraja jëta jëta ae pe oyepapauka vaerä.

4Jare José vi ojo Nazaret Galilea pegua güi tëta Belén Judea pegua pe. Echa jae ko David iñemuña reta pegua, echa David jëta ko jae Belén. 5Jáeramo José ojo Belén pe oyepapauka vaerä, jare güɨraja vi María, jae ko imenda ïrurä vae; María ipurúa oï. 6Jare Belén pe ñogüɨnoi ramboeve, ara ou oväe María oyekuaku vaerä. 7Jare María imembɨrɨpɨ kuimbae oa. María oñoma metei ñomaa pe jare omboyapakua metei mbaemɨmba ikaruarɨru pe. Echa mbaetɨ chupegua retarä o.

Araɨgua reta jare vecha iyangarekoa reta

8Jare jókuae pɨ̈tu amogüe vecha iyangarekoa reta oyangareko ñogüɨnoi ivecha reta re köiño jókuae tëta güi. 9Jare oyekuaa chupe reta metei yandeYa iaraɨgua, jare yandeYa iyemboetea omoembipe jae reta ñogüɨnoia re. Jare okɨɨye yae reta. 10Ërei araɨgua jei chupe reta: “Agüɨye pekɨɨye. Mase, amombeu peve ñee ikavi vae oporomboyerovia yaeta vae, kuae ñee opaete vae peguarä ko. 11Echa kuae pɨ̈tu oa oporomboasa vae David jëta pe. Jae ko yandeYa Cristo. 12Jare köraita peikuaa: Peväeta michia oñeoma oï metei ñomaa pe jare oyapakua oï metei mɨmba ikaruarɨru pe.”

13Jare jupivei oyekuaa jókuae araɨgua ndive jeta yae araɨgua reta. Opaete vae omboete Tumpa, jei reve:

14“¡Toyemboeteuka Tumpa ara pe,

jare ɨvɨ pegua reta tipɨakatu,

Tumpa ipɨakavi chupe vae reta!”

15Jare araɨgua reta yogüɨraja ye yave chugüi reta ara kotɨ, vecha iyangarekoa reta jei oyoupe:

—Yaja Belén pe yaecha vaerä kuae oyeapo vae, kuae yandeYa oikuaauka yandeve vae.

16Jupiveiño yogüɨraja reta jare oväe María jare José jare michia oyapakua oï mɨmba ikaruarɨru pe. 17Jare oecha reta yave, omombeu reta araɨgua jei chupe reta michia regua vae. 18Jare opaete oendu vae reta ipɨakañɨ vecha iyangarekoa reta omombeu chupe reta vae re. 19Ërei María oñovatu ipɨa pe opaete kuae kuae, jare oyemongeta kavi jese. 20Jare vecha iyangarekoa reta yogüɨraja ye tëta Belén güi omboete reve Tumpa, opaete oendu jare oecha vae re; araɨgua jei chupe reta vae.

Güɨraja reta Jesús tupao pe

21Jare michia#Lv 12.3. juri ara ma güɨnoi yave, tu jare ichɨ ombocircuncidauka jare ombojee Jesús. Echa araɨgua omombeu María#Lc 1.31. pe jökorai ombojee vaerä ndei ipurúa mbove.

22Jare ara ou oväe María ojo vaerä yandeYa jo pe, oyetɨouka vaerä ikɨa Tumpa jóvai vae güi, Moisés iporookuai pe jei rami. Jayave tu jare ichɨ güɨraja Jesús tëta guasu Jerusalén pe yandeYa jo pe oñono teeuka vaerä Tumpa peguarä. 23Echa yandeYa iporookuai pe oyekuatía oï körai: “Kuña imembɨrɨpɨ kuimbae oa yave, michia oñeñono teeta#Ex 13.2,12. yandeYa peguarä.” 24Jare omee vaerä yandeYa pe mókoi pɨkasui ani mókoi pɨkasutï taɨrusu vae.#Lv 12.6-8. Echa jökorai jei oyapo vaerä mborookuai yandeYa omee chupe reta vae pe.

25Jare jókuae ara oiko Jerusalén pe metei kuimbae Simeón jee vae; jókuae kuimbae jupi vae oäro oiko Israel pegua reta iyeyora. Jare Espíritu Santo oï jese. 26Jare Espíritu Santo oikuaauka ma yepe chupe kërai ngaraa omano ndei oecha mbove yandeYa Jembiparavo. 27Jare jókuae ara Espíritu Santo güeru Simeón tupao pe. Jare Jesús tu jare ichɨ güeru tupao pe, oyapo vaerä mborookuai jei vae rami yave, 28Simeón ovoɨ Jesús jare omboete Tumpa, jei reve:

29“CheYa, añave emaeño tamano mbɨakatu pe,

nde rere vae rami.

30Echa aecha ma ndeporomboasa.

31Nde remboyupavo opaete vae reta jovake.

32Jae ko tembipe ramita judiombae#Is 42.6; 49.6; 52.10. vae reta pe.

Jare ndembae vae Israel pegua reta iyemboetearä.”

33Jare José jare Jesús ichɨ ipɨakañɨ opaete Simeón jei Jesús re vae re. 34Jare Simeón jei ñee kavi jese reta. Jayave jei ichɨ María pe:

—Mase, kuae nemembɨ oïta jeta Israel pegua reta ogüɨapi vaerä jare opüa vaerä. Jare jeta vae reta güɨröɨrota. 35Echa oyekuaata opaete vae ipɨa pe oï vae. Jare nde etei ndepɨatɨtɨ yaeta jese.

36Jare oï vi joko pe ñeemombeúa kuña Ana jee vae, Fanuel tayɨ. Fanuel jae ko ñemuña Aser pegua. Ana itɨ̈aro yae ma. Omenda güire jaeño chiu año oiko ime ndive. 37Jare ochenta y cuatro año rupi ma opɨta imemano. Mbaetɨ osɨrɨ tupao güi oyeokuai avei Tumpa pe, oyekuaku tembíu güi jare oyerure Tumpa pe ara rupi jare pɨ̈tu rupi. 38Jae ou José jare María jare Jesús ñogüɨnoia pe. Jayave jae vi omee yasoropai Tumpa pe, jare imiari Jesús re opaete yeyora oäro ñogüɨnoi Jerusalén pe vae reta pe.

Oyerova ye Nazaret kotɨ vae regua

39José jare María opa oyapo güire opaete yandeYa iporookuai pe jei vae yave, oyerova reta ye jëta Nazaret Galilea pegua pe.#Mt 2.23. 40Jare michia okuakuaa ojo oiko, ipɨ̈rata jare yarakuaa katu yae. Jare Tumpa ipɨakavi oï jese.

Michia Jesús tupao pe

41Jare año ñavo tu reta yogüɨraja Jerusalén pe, arete Pascua#Ex 12.1-27; Dt 16.1-8. pe. 42Jare Jesús doce año güɨnoi yave, ojo jae reta ndive arete Pascua peguarä, jae reta oyapoñoi rami. 43Jare oasa ma arete Pascua yave, José jare Jesús ichɨ oyerova ye jëta kotɨ yave Jesús opɨta Jerusalén pe jae reta oikuaambae reve. 44Jae reta oyemongeta tëi oime ko ou ïru reta ipɨte pe. Ërei kaaru ma yave, oeka reta tëi jëtara reta jare ïru oikuaa vae reta ipɨte rupi. 45Ërei mbaetɨ oväe reta chupe ramo, oyerova reta ye Jerusalén kotɨ oeka vaerä. 46Jare mboapɨ ara ma oeka reta yave, oväe reta chupe tupao pe. Jesús oguapɨ oï mborookuai re oporomboe vae reta ipɨte pe. Oyeapɨsaka oï jese reta jare oparandu chupe reta mbaembae re. 47Jare opaete oyeapɨsaka jese vae reta, ipɨakañɨ iyarakuaa katu re jare mbarandu omombeu vae re. 48José jare Jesús ichɨ oecha yave, omopɨakañɨ yae reta, jare jei chupe:

—Chemembɨ, ¿maera pa körai oreapo? Mase, che jare nderu roeka tëi opaete kerupi orepɨatɨtɨ yae reve.

49Jayave Jesús jei chupe reta:

—¿Maera pa chereeka? ¿Mbaetɨ pa peikuaa ikavi ko ayapo vaerä cheRu iparavɨkɨ?

50Ërei jae reta mbaetɨ oikuaa mbae oipota jei jókuae Jesús jei chupe reta vae. 51Jayave Jesús ojo ye Nazaret pe jae reta jupíe, jare oiko jae reta jeia re. Jare Jesús ichɨ oñovatu ipɨa pe opaete kuae kuae. 52Jare Jesús okuakuaa ojo oiko, jökorai vi arakuaa pe, Tumpa jare ïru vae reta ipɨa kavi oï jese.#1 S 2.26; Pr 3.4.

Currently Selected:

SAN LUCAS 2: GUABD

Highlight

Copy