SAN LUCAS 1
1
Lucas oikuatía Teófilo pe
1Jeta vae omombeu ma oikuatía vae rupi, opaete mbaembae añete ete yandepɨte pe oyeapo vae regua. 2Jókuae iyɨpɨ güive jae reta etei oecha vae reta jökorai omombeu yandeve, jókuae Tumpa iñee omombeu ïru reta pe vae reta. 3Jáeramo jaekavi cheve, che vi aikuatía vaerä ndeve, mburuvicha Teófilo,#Hch 1.1. amombeu vaerä ndeve kërai opaete oyeapo. Echa che aikuaa kavi opaete iyɨpɨ güive oasa vae. 4Aikuatía ndeve, reikuaa kavi vaerä añetete ko jókuae mbaembae ndemboe reta jese vae.
Juan oata vae re oñemoërakua vae regua
5Herodes oiko yave ɨvɨ Judea pe mburuvicha guasurä, oiko vi metei sacerdote Zacarías jee vae. Jae ko metei atɨ Abías#1 Cr 24.10. jee vae pegua. Zacarías jembireko jee Elisabet; jae ko Aarón iñemuña reta pegua. 6Kuae reta jupi rupi yogüɨreko Tumpa jóvai. Echa jekuaeño omboyerovia reta Tumpa, oyapo reta yandeYa iporookuai reta vae rupi. 7Ërei mbaetɨ imichia reta. Echa Elisabet imembɨmbae vae ko. Jare Zacarías jare Elisabet okuakuaa yae reta ma.
8Metei ara metei atɨ Abías jee vae pegua sacerdote reta oparavɨkɨ ñogüɨnoi tupao pe yave, Zacarías oyapo oï iparavɨkɨ joko pe. 9Jare jae etei oï yandeYa jo japɨpe pe oapɨ vaerä ikäti kavi incienso, oyapoñoi reta rami. 10Jare jeta Israel pegua reta yatɨ oyerure ñogüɨnoi tupao joka pe, Zacarías oapɨ oï ramboeve ikäti kavi vae incienso. 11Jayave oyekuaa chupe metei yandeYa iaraɨgua, oyemboɨ oï ikäti kavi vae incienso oyeapɨ jese vae iyakatu kotɨ. 12Jare Zacarías oecha yave araɨgua, ipɨakañɨ jare okɨɨye vi. 13Ërei araɨgua jei chupe:
—Agüɨye ekɨɨye, Zacarías. Tumpa oendu ma ndeyerure, jare nderembireko Elisabet imembɨta ndeve metei kuimbae raɨ. Jare rembojeeta Juan. 14Jare nde reyerovia yaeta ko. Jare jeta oyeroviata vi jae oa vae re. 15Echa tuichagüe yaeta ko Tumpa jóvai. Jae ngaraa etei jou vino ani mbae oporombosavaɨpo vae.#Nm 6.3. Jare tɨnɨeta Espíritu Santo pe ichɨ jɨe peve. 16Jae omboyerovata jeta Israel pegua reta iYa Tumpa kotɨ. 17Ojota yandeYa jenonde Elías mbaepuere güɨnoi rami, oaɨuuka vaerä tu reta pe imichia reta#Mal 4.5-6. jare Tumpa kotɨ oyembopɨapochɨ vae reta yogüɨreko vaerä jupi vae reta rami. Jökorai Israel pegua reta oäro vaerä yandeYa.
18Jayave Zacarías jei araɨgua pe:
—¿Këraita pa aikuaa añetete ra kuae nde rere cheve vae? Echa che chendechi ma jare cherembireko itɨ̈aro ma vi.
19Jayave araɨgua jei ye Zacarías pe:
—Che ko jae Gabriel.#Dn 8.16; 9.21. Che jae Tumpa jembiokuai etei. Jae chembou chemiari vaerä ndeve jare amombeu vaerä ndeve kuae ñee ikavi vae. 20Mase, ndeupata repɨta, mbaetɨta nemiari kuae amombeu ndeve vae oyeapo regua. Echa mbaetɨ rerovia che jae ndeve vae. Ërei che jae ndeve vae oyembopota ko iara oväe yave.
21Jare Israel pegua reta oäro ñogüɨnoi Zacarías oë vaerä tupao güi; ombopɨaä yae reta Zacarías oë raiviä vae. 22Jare Zacarías oë yave, mbaetɨ ipuere omoë iñee chupe reta. Jáeramo jae reta oikuaa Zacarías oecha ko mbae tupao pe oï ramboeve. Echa jae omomiari reta ipo peño. Jare mbaetɨ ipuere iñee omoë.
23Jare opa ma yave Zacarías iparavɨkɨ tupao pe, ojo ye jo pe. 24Jare mbovɨ ara rupi Zacarías jembireko Elisabet ipurúa. Jayave Elisabet mbaetɨ oë jo güi pandepo yasɨ. Echa jae jei: 25“Körai yandeYa oyapo cheve. Cherenoe ñemomarai rupi aiko vae güi.”
Jesús oata vae re oñemoërakua vae regua
26Elisabet ova yasɨ ma ipurúa yave, Tumpa ombou araɨgua Gabriel tëta guasu Nazaret ɨvɨ Galilea pegua pe, 27María pɨri. Jae ko kuñatai ndei etei oasa kuimbae ndive vae. Ërei jae omenda vaerä oï José ndive. José ko jae metei David#Mt 1.18. iñemuña pegua. 28Jare araɨgua oike María oïa pe jare jei chupe:
—Kërai pa reï. YandeYa ipɨakavi yae ndeve. Jae oï nde ndive, jare iporerekua yae nderé ïru kuña reta güi.
29María kuae oendu yave, ipɨakañɨ. Echa mbaetɨ oikuaa mbae ra oipota jei araɨgua jei vae. 30Jayave araɨgua jei chupe:
—Agüɨye ekɨɨye María. Echa Tumpa ko ipɨakatu nderé. 31Mase, añave ndepuruata jare nemembɨta metei kuimbae raɨ. Jare rembojeeta JESÚS.#Mt 1.21. 32Jae tuichagüe yaeta, jare jeeta ko Tumpa Tuichagüe yae vae Taɨ. Jare yandeYa Tumpa omeeta chupe iñemuñagüe David iporookuaía; 33jare jae oikota Jacob iñemuña reta juvicha guasurä jekuae avei pegua.#2 S 7.12,13,16; Is 9.7. Jare iporookuaía ngaraai iyapɨ.
34Jayave María jei araɨgua pe:
—¿Këraita pa oyeapo kuae? Echa mbaetɨ areko kuimbae.
35Jayave araɨgua jei María pe:
—Espíritu Santo outa nderé. Tuichagüe yae vae imbaepuere pe neovata. Jáeramo jókuae Iyoambae vae oata vae, jeeta ko Tumpa Taɨ. 36Mase, nerëtara Elisabet ipurúa vi, yepe tëi itɨ̈aro ma. Ova yasɨ ma ipurúa oï; yepe tëi ïru vae reta jei chupe imembɨmbae vae. 37Tumpa pe mbaetɨ etei ko mbae yavai vae.#Gn 18.14; Jer 32.16,27.
38Jayave María jei araɨgua pe:
—Mase, yandeYa jembiokuai ko che. Toyeapo cheve nde rere cheve rami.
Jayave araɨgua ojo ye María oïa güi.
María opou Elisabet pɨri
39Jókuae ara rupi María jaema voi ojo Judea pe ɨvɨtɨ re metei tëta guasu oï vae pe. 40Jare ojo oväe Zacarías jëta pe, jare oyapo maraetei Elisabet pe. 41Elisabet oendu yave María iñee, Elisabet imembɨ raɨ omɨi jɨe pe. Jare Elisabet tɨnɨe Espíritu Santo pe. 42Jayave Elisabet iñeeäta reve jei:
—Tumpa iporerekua yae nderé ïru kuña reta güi. Jare mborerekua toï nemembɨ re. 43Jare ¿kia pa che, cheYa ichɨ ou vaerä chépɨri? 44Mase, nde reyapo maraetei cheve rupive, chemembɨ omɨi cherɨe pe oyerovia ramo. 45¡Eyerovia! Nde rerovia yandeYa ombopota ko jae jei ndeve vae. Jáeramo jae iporerekua ma nderé.
46Jayave María jei:
“Amboete yandeYa.#1 S 2.1-10; Sal 113.5-9.
47Ayerovia Tumpa
chemboasa vae re.#Is 61.10.
48Yepe tëi che cheparavete, ërei jae
cheparareko.
Mase, añave güive opaete vae jeita Tumpa
iporerekua jese vae.
49Echa oyapo mbae tuichagüe cheve
Imbaepuere yae vae.
Jae ko jee Ikɨambae.
50Jare Tumpa güɨnoi avei mboroparareko oipoɨu chugüi vae reta re.
51Imbaepuere rupi oyapo mbae tuichagüe.
Opa omoai ipɨayemboete vae reta.
52Jae oekɨ mburuvicha reta jenda mborookuaía pegua güi,
jare ombotuicha oñemomichi vae reta.
53Omoangapɨɨ iyɨmbɨaɨ vae reta mbaembae pe.
Ërei oikokatu vae reta omondo ipogüɨrai.
54Omborɨ jembiokuai Israel,
echa imaendúa kërai jei oipararekota ko.
55Echa jökorai jei ñaneñemuñagüe reta pe
jae ko Abraham#Gn 17.7. jare iñemuña reta pe jekuae avei pegua.”
56Jare María opɨta Elisabet pɨri mboapɨ yasɨ rupi. Jayave ramo ojo ye jëta pe.
Juan oporombobautisa vae oa vae regua
57Jare oväe ara Elisabet oyekuaku vaerä yave, oa imembɨ kuimbae raɨ. 58Jare Elisabet jëtaɨgua reta jare jëtara reta pe jërakua, kërai yandeYa oiparareko vae yave, jae reta oyerovia yae Elisabet ndive.
59Jare michia#Lv 12.3. juri ara ma güɨnoi yave, jëtara reta yogüeru ombocircuncidauka vaerä. Jare jae reta oipota ombojee tu Zacarías jee pe yave, 60michia raɨ ichɨ jei chupe reta:
—Mbaetɨ ko jökorai. Yambojeeta ko Juan.
61Ërei jae reta jei chupe:
—¿Maera yera? Mbaetɨ etei ko nerëtara jökorai jee vae.
62Jayave jae reta omomiari ipo pe Zacarías këraita ra ombojee taɨ vae. 63Jayave Zacarías oiporu chupe reta ɨvɨrape raɨ jare oikuatía jese: “Juan ko jee”, jare opaete joko pe ñogüɨnoi vae reta ipɨakañɨ. 64Jare jupiveiño Zacarías ipuere omoë ye iñee. Jare imiari chupe reta omboete reve Tumpa. 65Jare opaete Zacarías jëtaɨgua reta okɨɨye jare ipɨakañɨ kuae re. Jare opaete kuae oyeapo vae jërakua opaete ɨvɨtɨ Judea pegua rupi. 66Jare opaete oendu vae reta ipɨa pe jei iyeupe: “¿Mbae nunga michia ra ko kuae?” Jare yandeYa imbaepuere oï jae ndive.
Zacarías omoërakua maratuta vae regua
67Jayave Zacarías jae ko Juan tu tɨnɨe Espíritu Santo pe jare omoërakua maratuta vae regua jei reve:
68“Toyemboeteuka yandeYa Israel iTumpa,
echa jae ou omborɨ jare oepɨ tëta imbae.
69Jae ombou yandeve jembiokuai David iñemuña
pegua metei Oporogüɨroasayepe vae imbaepuere yae vae.
70Tumpa jei iyɨpɨ güive
iñeemombeúa reta oñeñono tee vae rupi rami.
71Yandereroasayepe yanderovaicho reta güi,
jare opaete ñanemotareɨ vae reta ipo güi;
72oiparareko vaerä ñaneñemuñagüe reta,
imaendúa morogüɨrökuavee päve ikɨambae oyapogüe re;
73ñaneñemuñagüe Abraham ndive
oyapo morogüɨrökuavee päve vae,
74kërai yandereepɨ güire yanderovaicho reta güi
yayeokuai vaerä chupe yakɨɨyembae reve,
75ñañeñono tee reve jare jupi rupi,
jae jóvai opaete ara yaikove yaiko ramboeve.
76Jare nde michia raɨ
Tuichagüe yae vae iñeemombeúa, jeita ndeve vae.
Echa reota yandeYa jenonde
reyapo kavi vaerä japerä.#Mal 3.1.
77Reikuaauka vaerä yemboasa imbae reta pe,
Tumpa iñɨ̈ro vaerä chupe reta iyoa re.
78Körai Tumpa oyapo, yandeparareko ramo,
ombou yandeve ɨvate güi ara ipɨau vae;
79omoembɨpe vaerä pɨtumimbi#Is 9.2. rupi jare ñamano rape katu vae rupi yogüɨreko vae reta pe,
Jae yandemborɨ vaerä yaguata tape mbɨakatu pegua rupi.”
80Jókuae michia okuakuaa ojo oiko, jare ipɨ̈rata Tumpa jóvai. Jare oiko ñuu rupi oyekuaauka Israel pegua reta pe regua.
Currently Selected:
SAN LUCAS 1: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
