SAN LUCAS 3

Juan oporombobautisa vae iñemoñee

(Mt 3.1-12; Mc 1.1-8; Jn 1.19-28)

1-2Tiberio César quince año ma oiko mburuvicha guasurä yave, Tumpa omomiari Juan. Juan jae ko Zacarías taɨ, jare oiko ñuu pe. Jókuae ara reta pe Poncio Pilato oiko Judea pegua reta juvicha guasurä, jare Herodes oiko Galilea pegua reta juvicha guasurä, jare Herodes tɨvɨ Felipe oiko ɨvɨ Iturea pegua reta jare ɨvɨ Traconite pegua reta juvicha guasurä, jare Lisanias oiko ɨvɨ Abilinia pegua reta juvicha guasurä. Jare sacerdote tenondegua eterä yogüɨreko Anás jare Caifás. 3Jayave Juan ojo opaete ɨ̈aka Jordán iyɨ́vɨri rupi. Jare omombeu opaete vae pe oeya vaerä iyemongeta ikavimbae vae ipɨa pe güɨnoi vae jare oyembobautisauka vaerä, Tumpa iñɨ̈ro vaerä chupe reta iyoa reta re. 4Ñeemombeúa Isaías jembikuatía pe jei rami. Echa jei:

“Jae iñeeäta reve jeita ñuu rupi:

‘Peyapo kavi yandeYa japerä.

Pembosɨmbi japerä.

5Opaete ɨvɨtɨ päu reta oñemotɨnɨeta ɨvɨ pe.

Jare opaete ɨvɨtɨ guasu jare opaete ɨvɨtɨ reta oyembosɨmbi.

Jare tape ñape vae reta oyembosɨmbiukata.

Jare tape ikavimbae vae reta ipe kavita.

6Jare opaete vae oechata Tumpa iporomboasa.’ ”#Is 40.3-5.

7Jare Juan jei jeta vae yogüeru oyembobautisauka vaerä chupe vae reta pe: “Pe reta ko jae mboi reta rami.#Mt 12.34; 23.33. ¿Kia pa omombeu peve peyerova vaerä Tumpa kotɨ agüɨye vaerä jae oiporarauka peve? 8Peyapo ikavi vae, jökorai pemboyekuaa añetete peeya ko peyemongeta ikavimbae vae pepɨa pe penoi vae. Agüɨye pere peyeupe: ‘Ñaneñemuñagüe ko jae Abraham.’#Jn 8.33. Echa che jae peve kuae: Tumpa ipuere ko oyapo kuae ita reta güi Abraham iñemuña retarä. 9Jáeramo temitɨ oyeasɨa vaerä ma ko oï japo reve, echa opaete temitɨ ikavimbae vae iya oyasɨa ko oapɨ vaerä.”#Mt 7.19.

10Jayave joko pe ñogüɨnoi vae reta oparandu Juan pe:

—Jayave ¿Mbae pa royapota?

11Jare Juan jei chupe reta:

—Oime yave kia mókoi temimonde güɨnoi, tomee metei mbaetɨ güɨnoi vae pe. Jare oime yave kia jeta tembíu güɨnoi, tomee mbaetɨ güɨnoi vae pe.

12Yogüeru vi Juan oïa pe mburuvicha peguarä okovara vae reta#Lc 7.29. oyembobautisauka vaerä. Jae reta oparandu Juan pe:

—Oporomboe vae, ¿mbae pa royapota?

13Jayave Juan jei chupe reta:

—Agüɨye pemboasa ete pekovara mburuvicha reta peokuai vae güi.

14Sundaro reta vi oparandu Juan pe:

—Ore reta ¿Mbae pa royapota?

Jayave Juan jei chupe reta:

—Agüɨye pepɨ̈roiño mbae jare agüɨye pemboekoiño kia. Pepɨakatu jókuae pemonganagüe re.

15Opaete vae oäro ñogüɨnoi Cristo ou vaerä, jare ipɨa pe oyemongeta reta Juan re güɨramoi jae ko Cristo. 16Jáeramo Juan jei chupe reta: “Añete che pombobautisa ɨ pe. Ërei oime ou imbaepuere yae chegüi vae. Mbaetɨ jupi che ipɨapaa iïcha ayora vaerä ave. Jae pembobautisata Espíritu Santo pe jare tata pe. 17Jae güeru ipo pe imbaembovevea, omboveve vaerä trigo; oñovatuta trigo jɨru pe. Ërei oapɨta ɨtɨ tata ogüembaea pe.”

18Körai, jare jeta ïru yemboarakuaa rupi omoërakua chupe reta ñee ikavi vae. 19Jökorai vi Juan omboeta mburuvicha guasu Herodes pe Herodías jeko pegua. Echa Herodes güɨreko tɨvɨ Felipe jembireko Herodías jee vae. Jare jeta ïru mbaembae ikavimbae oyapogüe re. 20Ërei Herodes omoïru ye oyapo ikavimbae, jae ko oñoñauka Juan tembipɨɨrɨru pe.#Mt 14.3-4; Mc 6.17-18.

Jesús oyembobautisa

(Mt 3.13-17; Mc 1.9-11)

21Metei ara Juan ombobautisa opaete vae güɨnoi yave, ombobautisa vi Jesús. Jare Jesús oyerure ramboeve, ara oyepea. 22Jare oyekuaa Espíritu Santo ogüeyɨ Jesús re pɨkasu rami. Jayave oyeendu ñee ara güi, jei: #Gn 2.2; Sal 2.7; Is 42.1; Mt 3.17; Mc 1.11; Lc 9.35.

—Nde ko jae cheRaɨ roaɨu yae vae. Chemboyerovia yae vae.

Jesús iñemuñagüe reta

(Mt 1.1-17)

23Jesús güɨnoi treinta año omboɨpɨ iparavɨkɨ yave. Ïru vae reta ipɨa pe oyemongeta jae ko José taɨ ete. José ko jae Elí taɨ. 24Elí jae Matat taɨ; Matat jae Leví taɨ; Leví jae Melqui taɨ; Melqui jae Jana taɨ; Jana jae José taɨ. 25José jae Matatías taɨ; Matatías jae Amós taɨ; Amós jae Nahum taɨ; Nahum jae Esli taɨ; Esli jae Nagai taɨ. 26Nagai jae Maat taɨ; Maat jae Matatías taɨ; Matatías jae Semei taɨ; Semei jae José taɨ; José jae Judá taɨ. 27Judá jae Joana taɨ; Joana jae Resa taɨ; Resa jae Zorobabel taɨ; Zorobabel jae Salatiel taɨ; Salatiel jae Neri taɨ. 28Neri jae Melqui taɨ; Melqui jae Adi taɨ; Adi jae Cosam taɨ; Cosam jae Elmodam taɨ; Elmodam ko jae Er taɨ. 29Er jae Josué taɨ; Josué jae Eliezer taɨ; Eliezer jae Jorim taɨ; Jorim ko jae Matat taɨ. 30Matat jae Leví taɨ; Leví jae Simeón taɨ; Simeón jae Judá taɨ; Judá jae José taɨ; José jae Jonán taɨ; Jonán jae Eliaquim taɨ. 31Eliaquim jae Melea taɨ; Melea jae Mainán taɨ; Mainán jae Matata taɨ; Matata ko jae Natán taɨ. 32Natán jae David taɨ; David jae Isaí taɨ; Isaí jae Obed taɨ; Obed jae Booz taɨ; Booz jae Salmón taɨ; Salmón ko jae Naasón taɨ. 33Naasón jae Aminadab taɨ; Aminadab jae Aram taɨ; Aram jae Esrom taɨ; Esrom jae Fares taɨ; Fares jae Judá taɨ. 34Judá jae Jacob taɨ; Jacob jae Isaac taɨ; Isaac jae Abraham taɨ; Abraham jae Taré taɨ; Taré ko jae Nacor taɨ. 35Nacor jae Serug taɨ; Serug jae Ragau taɨ; Ragau jae Peleg taɨ; Peleg jae Heber taɨ; Heber jae Sala taɨ. 36Sala jae Cainán taɨ; Cainán jae Arfaxad taɨ; Arfaxad jae Sem taɨ; Sem jae Noé taɨ; Noé ko jae Lamec taɨ. 37Lamec jae Matusalén taɨ; Matusalén jae Enoc taɨ; Enoc jae Jared taɨ; Jared jae Mahalaleel taɨ; Mahalaleel jae Cainán taɨ. 38Cainán jae Enós taɨ; Enós jae Set taɨ; Set jae Adán taɨ. Adán ko jae Tumpa taɨ.

Currently Selected:

SAN LUCAS 3: GUABD

Highlight

Copy