GÉNESIS 34
34
Dina regua
1Dina, jae ko Lea imembɨkuña Jacob tayɨ; jae ojo opou tëta pegua kuñatai reta pɨri; 2ërei Siquem, Hamor heveo iñemuña taɨ mburuvicha jókuae tëta pegua, oecha, jare oipɨɨ kuñatai ipɨa rupiä jare oasa jae ndive. 3Ërei ngatu, iporopota yae jese, oeka kërai güɨreko vaerä. 4Jayave Siquem imiari tu Hamor ndive, jare jei chupe:
—Ekua eiporu cherembirekorä kuae kuñatai. Aipota amenda jae ndive.
5Jacob oikuaa Siquem oasa tayɨ Dina ndive vae, ërei taɨ reta jɨmba omongaru ñogüɨnoi ñuu pe ramo, mbaetɨ mbae jei yogüeru oväe regua. 6Jökorai ramboeve Hamor, Siquem tu, ojo Jacob pɨri imiari vaerä jae ndive.
7Jacob taɨ reta yogüeru oväe yave ñuu güi, oikuaa reta mbae oasa oï vae, jare iyarasɨ reta, echa ikavimbae yae ko tëta Israel pe Siquem oyapakua Jacob tayɨ ndive vae. ¡Kuae ko mbaetɨta tëi oyeapo vae! 8Ërei Hamor imiari jae reta ndive jare jei chupe reta:
—Cheraɨ Siquem iporopota yae pereindɨ re. Peyapo ikavi vae, pemaeño tomenda jae ndive 9jare peyeapo orerëtara eterä; jökorai ore toromenda perayɨ reta ndive, jare pe pemenda orerayɨ reta ndive. 10Pepɨta peiko ore ndive. Pepo pe oï ɨvɨ; peiko pɨpe, peparavɨkɨ pɨpe, pereko peɨvɨ aerä.
11Siquem jei vi Dina tu pe, jare ikɨvɨ reta pe:
—Pepɨakatuño chekotɨ. Tamee peve peiporu rupi. 12Peiporu menda pegua mbota güi iárambo ye cheve yave, tamee peve peiporu rupi; jare pemee cheve kuñatai cherembirekorä.
13Jare Jacob taɨ reta jei Siquem pe jare tu Hamor pe ombotavɨ reve, echa Siquem oyuvanga ko Dina re. 14Jei reta chupe reta:
—Mbaetɨ orepuere romee orereindɨ kuimbae oyembocircuncidambae pe, echa kuae pɨ̈chɨi yae ko oreve. 15Jaeño orekɨ̈reɨta peyeapo yave ore rami: Peyembocircuncida yave opaete kuimbae reta pepɨte pe ñogüɨnoi vae ore rami. 16Jayave ramo pepuereta pemenda orerayɨ reta ndive; jare ore romendata perayɨ reta ndive; jare yayeapota metei tëta rami. 17Ërei ngatu pe reta mbaetɨ yave peipota peyembocircuncida, ore rogüɨrajata kuae güi orereindɨ.
18Kuae ñee ikavi Hamor jare taɨ Siquem pe. 19Jare oärombae reve jókuae taɨrusu vae oyapo iyeupe jókuae circuncisión, echa Jacob tayɨ re iporopota yae, jare jae ko imboetea yae tu jo pe vae, 20yogüɨraja, jae jare tu Hamor ndive tëta guasu jöke pe jare imiari kuimbae reta pe, jei reve:
21—Kuae kuimbae reta ipɨakavi yae yande ndive, yogüɨrekota kuae ɨvɨ pe, jare oparavɨkɨ retata; yande yandepuereta yamenda tayɨ reta ndive, jare jae reta omendata yanderayɨ reta ndive. 22Ërei yayeapo vaerä metei tëta ramiño, jae reta oipota opaete kuimbae reta yayembocircuncida jae reta oyembocircuncida rami. 23Opaete imbaembae jare jɨmba reta yandembaerä; jaeño yamombeuta ñanekɨ̈reɨ ko vae jare jae reta yogüɨrekota yande ndive.
24Jare ikɨ̈reɨ reta Hamor jare taɨ Siquem pe opaete tëta guasu jöke rupi oë vae reta jare oyembocircuncidauka reta. 25Ërei mboapɨa ara pe Simeón jare Leví, Jacob taɨ reta, Dina ikɨvɨ reta, yogüɨraja tëta pe kuimbae reta pe jasɨ yae oyembocircuncidagüe yave, ikɨsepuku ndive, jare oyuka reta opaete kuimbae, echa mbaetɨ ipuere oyeepɨ reta. 26Jare kɨsepuku pe oyuka reta Hamor jare taɨ Siquem; oipɨɨ reta jeindɨ Dina, Siquem jëta güi jare yogüɨraja. 27Yogüeru vi ïru Jacob taɨ reta tëta pe omanogüe reta oïa pe jare opa opɨ̈ro reta mbaembae oyepɨ vaerä jeindɨ re oyuvangaiño ramo. 28Oipɨɨ ivecha reta, guaka reta, imburika reta, jare opaete tëta pe oïgüe jare kó pegua, 29jare opaete mbaeyekou jo pegua; güɨraja reta vi tembipɨɨrä opaete michia reta jare kuña reta. 30Jayave Jacob jei Simeón jare Leví pe:
—Pe reta cheñono ikavimbae pe. Añave kuae tëta pegua Cam iñemuña reta jare ferezeo reta chemotareɨta. Oyomboatɨta jare opüata cheré, echa mbovɨ yae kuimbae reta anoi vae jeko pegua cheyukata jare opaete chero pegua reta.
31Ërei jae reta jei:
—¿Opokota yera orereindɨ re iyaguasa pota vae re rami?
Currently Selected:
GÉNESIS 34: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
