GÉNESIS 35

Tumpa iporerekua Jacob re Bet-el pe

1Tumpa jei Jacob pe: “Epüa jare ekua eiko Bet-el pe. Jare joko pe eyapo mɨmba oyeyuka oyeapɨ jese vae Tumpa peguarä nderɨkeɨ Esaú güi resɨi yave oyekuaa ndeve vae.”#Gn 28.11-17. 2Jayave Jacob jei opaete jo pegua reta pe, jare opaete jae ndive ñogüɨnoi vae reta pe:

—Peekɨ opaete tumpa ambuae oï pepɨte rupi vae, jare peyetɨo jare peipoepɨ peremimonde. 3Ñapüa jare yaja Bet-el kotɨ; jare joko pe amopüata mɨmba oyeyuka oyeapɨ jese vae Tumpa chemborɨ chepɨatɨtɨ aï yave vae peguarä jare oiko che ndive opaete kerupi ajaa rupi vae.

4Jökorai tumpa ambuae reta güɨreko vae jare inamicharä güɨnoi vae opa omee reta Jacob ipo pe; jare Jacob opa oñotɨ ɨvɨra encina jee vae igüɨ pe, Siquem güi köiño oï vae pe. 5Jare oë reta ma yave joko güi, Tumpa omee okɨɨye yae vaerä opaete tëta iyɨvɨrigua reta, jare mbaetɨ oaɨkuemoña reta Jacob taɨ reta.

6Jacob jare opaete yogüɨraja jae ndive vae reta yogüeru oväe tëta Luz jee vae pe jae ko Bet-el ɨvɨ Canaán pe. 7Jare omopüa joko pe mɨmba oyeyuka oyeapɨ jese vae, ombojee El-bet-el,#35.7 El-bet-el, oipota jei: Bet-el pegua Tumpa. echa joko pe Tumpa oyekuaa chupe tɨkeɨ güi osɨi oiko yave. 8Joko pe omano Débora, Rebeca iyangarekoa jare oñotɨ reta metei ɨvɨra encina jee vae igüɨ pe, kuae ombojee Alón-bacut.#35.8 Alón-bacut, oipota jei: Ɨvɨra encina yaeoa.

9Jacob oyerova ye yave Padan-aram güi, Tumpa jekuae oyekuaa ye chupe jare iporerekua jese. 10Jare Tumpa jei chupe:

“Nde nderee Jacob.

Ngaraa ye ma nderee Jacob,

Israel#Gn 32.28. ndereeta añave.”

Jare ombojee Israel.

11Tumpa jei vi chupe:

“Che jae ko Tumpa imbaepuere yae vae;

ekuakuaa jare eñemuña jeta.

Ndegüi jeta oëta tëtaguasu reta jare tëta reta,

jare neñemuña reta güi oëta mburuvicha guasu reta.

12Ɨvɨ amee Abraham pe jare Isaac pe vae,

amee vi ndeve, jare nderaɨkue rupi ameeta neñemuña reta pe.”#Gn 17.4-8.

13Jare Tumpa ojo jókuae imiari jae ndivea güi. 14Jare Jacob oipɨɨ ita omboyemboɨ omokañɨmaa vaerä, jare opɨyere jese vino jare olivo iasaite. 15Jare Jacob ombojee jókuae Tumpa imiari jae ndivea, Bet-el.#Gn 28.18-19.

Raquel imano

16Jaɨkue rupi yogüɨraja Bet-el güi; jare oata vɨteri yogüɨraja oväe vaerä Efrata pe yave Raquel oyekuaku, ërei oa raiviä imembɨ. 17Jare yavai yae iyekuaku pɨte pe, oporomboyekuaku vae jei chupe: “Agüɨye ekɨɨye, echa oata ko kuae nemembɨ.” 18Jare oa imembɨ rupive omano. Ërei ndei omano mbove ombojee Benoni,#35.18 Benoni, oipota jei: Michia chepɨatɨtɨ pegua. ërei tu ombojee Benjamín.#35.18 Benjamín, oipota jei: Michia cheakatu pegua.

19Jökorai omano Raquel tape Efrata kotɨ ojo vae rupi, jae ko Belén, jare joko pe oñotɨ reta. 20Jare Jacob omopüa ovapetea tɨvɨa re; jae ko Raquel jɨvɨa imokañɨmaa añave rupi vae. 21Israel oë jare omopüa jo guakapi pegua Migdal-edar kutɨ. 22Jare Israel oiko ramboeve jókuae ɨvɨ pe, Rubén ojo güɨroke tu jembireko güɨrekoiño vae, Bilha jee vae; jare Israel ou oikuaa jókuae regua.

Jacob taɨ reta

(1 Cr 2.1-2)

Jayave opaete reve doce ko Israel taɨ reta. 23Lea imembɨ reta ko: Rubén, jae ko Israel taɨrɨpɨ; jare vi Simeón, Leví, Judá, Isacar jare Zabulón. 24Raquel imembɨ reta ko: José jare Benjamín. 25Bilha ko jae Raquel jembiokuai kuña, jare Bilha imembɨ reta jae ko: Dan jare Neftalí; 26jare Zilpa ko jae Lea jembiokuai kuña, jare Zilpa imembɨ reta jae ko Gad jare Aser. Opaete kuae reta jae ko Jacob taɨ reta, ɨvɨ Padan-aram pe oa chupe vae.

Isaac imano

27Jacob ojo tu Isaac pɨri Mamre pe, tëta Arba pe, jae ko Hebrón, Abraham jare Isaac yogüɨrekosea pe.#Gn 13.18. 28Jare opaete ara Isaac oikove oiko ciento ochenta año. 29Oë chugüi jekove jare omano jare oñeotɨ iñemuñagüe reta oñeotɨa pe; omano indechi ae pe, jare Esaú tɨvɨ Jacob ndive oñotɨ reta tu.

Currently Selected:

GÉNESIS 35: GUABD

Highlight

Copy