GÉNESIS 33

Jacob jare Esaú iñɨ̈ro oyoupe

1Jacob omopüa iñäka yave oecha ou Esaú, jare yogüeru jupíe cuatrociento kuimbae, jayave jae opa omboyao michia reta, Lea ndive, Raquel jare jókuae mókoi jembiokuai kuña reta ndive. 2Oñono tenonde tembiokuai kuña reta michia reta ndive, jaɨkue Lea jare imembɨ reta, jare Raquel, José ndive taɨkue ete. 3Jare jae oasa tenonde chugüi reta, oyetavatɨka itindɨasɨ ɨvɨ re chiu ye, ojo regua oväe tɨkeɨ pe. 4Ërei Esaú osɨi oövaiti jare oiküava iyayu rupi oovapɨte, jare oyaeo reta. 5Jaɨkue rupi Esaú omopüa iñäka, omae, oecha kuña reta jare michia reta, yave oparandu:

—¿Kia pa kuae reta?

Jacob jei chupe:

—Jae ko michia reta Tumpa omee che nderembiokuai pe vae.

6Jayave tembiokuai kuña imembɨ reta ndive oya katu jare itindɨasɨ reta. 7Jaɨkue rupi oya katu Lea imembɨ reta ndive, itindɨasɨ reta reve; jaɨkue rupi ou oväe José jare Raquel jaeramiño vi itindɨasɨ reta. 8Jare Esaú oparandu:

—¿Mbae pa reyemongeta reyapo opaete kuae mbovɨ äpɨta aövaiti ayu aiko vae rupi?

Jacob jei chupe:

—Cheya ipɨakavi omae cheré vaerä.

9Esaú jei:

—Maera pa cherɨvɨ, jeta ko che anoi mbae. Ndeveguaräño topɨta opaete ndembaembae.

10Jacob jei:

—Agüɨye jökorai, romoñera ndepɨakavi ko remae cheré yave eipɨɨ mbota ndeveguarä vae, echa aecha nderova Tumpa jova etei aecha rami, echa mboroparareko ndive cherövaiti. 11Romoñera reipɨɨ vaerä mbota aru ndeve vae, echa Tumpa chemboikokatu jare opaete mbaembae anoi vae chembae ko.

Jacob jeta omoñera, Esaú oipɨɨ, 12jare jei:

—Yaja jayave; che taja nderenonde.

13Jare Jacob jei:

—Cheya reecha ko michia reta ndei yae, jare anoi vecha imembɨ oa ramo vae reta; ambokangɨ yae yave opata ko omano metei ara pe. 14Ekua tenonde che nderembiokuai güi, jare che mbegüe pe kavi taraja mɨmba reta jare michia reta iguata re, aja regua aväe ndépɨri Seir pe.

15Esaú jei:

—Ërei, jayave taeya ndeve mbovɨ kuimbae reta yogüeru che ndive vae.

Jacob jei:

—¡Maera pa cheya! Ndepɨakavi ma ko chekotɨ.

16Jökorai Esaú jókuae ara oyerova ye ojo Seir kotɨ. 17Jare Jacob ojo Sucot pe, jare joko pe omopüa jorä jare oyapo jɨmba jokairä; jáeramo ombojee Sucot.#33.17 Sucot, oipota jei: Küaraɨa.

18Jacob ou ye Padan-aram güi yave, ou kavi oväe tëta Siquem pe, ɨvɨ Canaán pe oï vae. Jare oyembojeyupa tëta Siquem jóvai. 19Joko pe ogua ɨvɨ#Jos 24.32; Jn 4.5. cien reare pe Hamor taɨ reta güi, jae ko Siquem tu, jare joko pe oñono jeyupa. 20Jaɨkue rupi omopüa mɨmba oyeyuka oyeapɨ jese vae, jare ombojee El-Elohe-Israel.#33.20 El-Elohe-Israel, oipota jei: Tumpa ko jae Tumpa Israel pegua.

Currently Selected:

GÉNESIS 33: GUABD

Highlight

Copy