GÉNESIS 32

Jacob oñoväe Esaú ndive

1Jacob jekuae oguata jare oë chupe Tumpa iaraɨgua reta. 2Jare Jacob oecha yave jei: “Tumpa jeyupa ko kuae” jare ombojee jókuae ɨvɨ Mahanaim.#32.2 Mahanaim, oipota jei: Mókoi teyupa.

3Jare Jacob oïa güi omondo ñee jerajaa reta tɨkeɨ Esaú pe, ɨvɨ Seir pe Edom pegua pe, 4jei chupe reta reve: “Körai pere cheya Esaú pe: ‘Labán jëta pe aiko, ípɨri ko apɨta; 5anoi jeta guaka, mburika, vecha, tembiokuai kuimbae jare tembiokuai kuña. Kuae amondo jae ndeve cheya remae kavi vaerä cheré.’ ”

6Jare ñee jerajaa reta oyerova ye Jacob pe, jei reve:

—Rojo roväe nderɨkeɨ Esaú pɨri, jare jae etei oime ou nerövaiti vaerä, jare cuatrociento kuimbae reta yogüeru jupíe.

7Jacob oendu kuae yave okɨɨye, jare ipɨatɨtɨ. Jayave omboyao jae ndive yogüɨreko vae reta jare vecha reta guaka reta, jare camello reta, mókoi teyupa pe, 8echa oyemongeta: “Esaú oporepeña metei teyupa re yave, ïru teyupa ipuere oasayepe.” 9Jare Jacob oyerure jei: “CheYa, cheramɨi Abraham iTumpa, cheru Isaac iTumpa, nde rere cheve: ‘Ekua ye ndeɨvɨ pe jare nerëtara reta pɨri, che ayapota ndeve ikavi vae.’ 10Che mbaetɨ ko jupi aiko vaerä ndeporoparareko rupi ani ndeporoangareko rupi; tenonde yave kuae ɨ̈aka Jordán aasa ko chepopoka ndiveño etei, ërei añave aï mókoi teyupa ndive. 11¡Añave, chereepɨ cherɨkeɨ Esaú güi!, echa akɨɨye chugüi ou vaerä cheve jare oyuka kuña reta imembɨ reta ndive. 12Nde rere cheve: ‘Che ayapota ndeve ikavi vae jare neñemuña reta ɨguasu jembeɨ rupi ɨvɨkuitï ramita, yaipapa rapembae.’ ”#Gn 22.17.

13Jókuae pɨ̈tu oke joko pe, jare jɨmba reta güi oiparavo ombopota vaerä tɨkeɨ Esaú: 14Dosciento kavara, jare veinte kavara kuimbae, dosciento vecha, jare veinte vecha kuimbae, 15treinta camello imembɨ reve reve, cuarenta guaka jare payandepo ndoviyo, veinte mburika kuña jare payandepo mburika kuimbae. 16Jare omee jembiokuai reta ipo pe, omboyao yao reve kavi, jare jei:

—Peguata tenonde, jare yemboyao ñavo toï oyougüi mombɨrɨ katu.

17Tenonde omondo vae oyókuai, jei reve chupe:

—Cherɨkeɨ Esaú nerövaiti yave, jare oparandu yave ndeve, kia ra jae ndeya vae, jare ketɨ ra reo, jare kia imbae ra reraja vae, 18nde rereta chupe: “Jae ko nderembiokuai Jacob ombou mbota ndeveguarä vae, cheya Esaú, jare jae oime ou oreraɨkue.”

19Jökoraiño vi oyókuai taɨkuegua, jare mboapɨa, jare opaete oyemboyao yao vae jaɨkue yogüɨraja vae reta pe jei:

—Köraita pemiari perövaiti yave Esaú, 20jare pere vi chupe: “Mase, ko nderembiokuai Jacob ou oreraɨkue.”

Echa jei: “Tamoɨ̈ro iyarasɨ güi mbota amondo cherenonde chupe vae rupi, jare jaɨkue rupi oyoova pe royoechata, güɨramoi jökorai cherövaiti kavita.” 21Jökorai omondo jenonde opaete mbota reta; jare jae opɨta oke jókuae pɨ̈tu teyupa pe.

Jacob oñoïraro araɨgua ndive

22Jókuae pɨ̈tu Jacob opüa omboyupavo mókoi reve jembireko reta, mókoi jembiokuai kuña reta jare once reve taɨ reta, jare güɨroasa ɨ̈aka Jaboc jee vae. 23Oipɨɨ jare opa güɨroasauka ɨ̈aka opaete imbaembae ndive. 24Jökorai Jacob opɨta jaeño; jare metei kuimbae iköembipe oñoïraro jae ndive. 25Ërei kuae kuimbae oikuaa mbaetɨta ma ipuere jese yave, okua iuɨpɨ re, jare Jacob iuɨpɨ opuru oñoïraro ramboeve jae ndive. 26Jare jei:

—Emaeño mo cheré, köeta ma.

Ërei Jacob jei chupe:

—Ngaraa amaeño nderé, mbaetɨ ndeporerekua cheré yave.

27Jare jókuae kuimbae jei chupe:

—¿Mbae pa nderee?

Jae jei:

—Jacob.

28Jare jókuae kuimbae jei chupe:

—Ngaraa ye ma nderee Jacob. Ndembojee retata Israel;#32.28 Israel, oipota jei: Tumpa ndive oñoïraro vae. echa reñoïraro ko Tumpa ndive jare kuimbae reta ndive, jare reporomoamɨri.#Gn 35.10.

29Jayave Jacob oparandu chupe, jei:

—Añave nde emombeu cheve nderee.

Jare jókuae kuimbae jei:

—¿Maera pa reparandu cheve cheree re?

Jare iporerekua jese joko pe. 30Jare Jacob ombojee jókuae oñoïraroa, Peniel;#32.30 Peniel, oipota jei: Tumpa jova. echa jei: “Tumpa jova etei aecha, ërei aikoveño, oasayepe cherekove.”

31Jare Peniel güi oasa ma yave oë chupe kuaraɨ; jare jumbɨrasɨ güi iköcho ojo oiko. 32Jáeramo Israel iñemuña reta añave rupi mbaetɨ jou mbae iuɨpɨgüe, echa Jacob iuɨpɨ re araɨgua okua.

Currently Selected:

GÉNESIS 32: GUABD

Highlight

Copy