HECHOS 16

Timoteo ojo Pablo jare Silas jupíe

1Javoi ojo oväe Derbe pe, jare joko güi Listra pe. Jare joko pe oiko metei oporogüɨrovia vae Timoteo jee vae. Ichɨ ko jae metei Israel-ɨgua oporogüɨrovia vae, tu ko griego. 2Oporogüɨrovia vae Listra jare Iconio pe ñogüɨnoi vae reta imiari kavi Timoteo re. 3Pablo ikɨ̈reɨ güɨraja jupíe Timoteo. Jáeramo ombocircuncidauka, jokoropi judío ñogüɨnoi vae reta jeko pegua. Echa opaete vae oikuaa jae tu griego ko. 4Jare yogüɨraja ramboeve tëta guasu reta rupi, omoërakua oporogüɨrovia vae reta pe, temimondo reta jare oporogüɨrovia vae reta itenondegua Jerusalén pe ñogüɨnoi vae reta oikuatía chupe reta vae, jae reta oyapo vaerä. 5Jayave oporogüɨrovia vae reta itupao ñavo rupi oñemoäta ngatu iporogüɨrovia pe Tumpa re, jare ara ñavo jeiete oñemoïru oporogüɨrovia vae reta.

Pablo oecha kuimbae Macedoniaɨgua vae regua

6Pablo jare jae ndive ñogüɨnoi vae reta oasa ɨvɨ Frigia jare Galacia rupi yave, Espíritu Santo oyopia reta, agüɨye vaerä omoërakua Tumpa iñee Asia pe. 7Jare ɨvɨ Misia pe yogüɨraja oväe yave, oipota tëi yogüɨraja ɨvɨ Bitinia pe. Ërei Espíritu Santo omaeñoä yogüɨraja vaerä. 8Jayave oasa reta köiño Misia güi, yogüɨraja oväe tëta guasu Troas pe. 9Jare pɨ̈tu yave Pablo oecha ike pe metei kuimbae Macedoniaɨgua oyemboɨ oï vae, jare omoñera jei reve: “Easa Macedonia pe oremborɨ.”

10Jare kuae oecha güire, jupiveiño roipota rojo Macedonia kotɨ. Echa roikuaa ma Tumpa orereenɨi romoërakua vaerä joko pegua reta pe ñee ikavi vae.

Tembipɨɨrɨru pe Filipos pe

11Jayave Troas güi rojo barco pe ɨvɨ Samotracia pe. Jare pɨareve pe rojo roväe tëta guasu Neápolis pe. 12Jare joko güi rojo tëta guasu Filipos pe jae ko Romaɨgua reta yogüɨreko pɨpe vae. Kuae tëta guasu tenonde ete oï ɨvɨ Macedonia pe vae. Kuae tëta guasu pe ropɨta mbovɨ ara. 13Jare metei ara mbutuu pe rojo tëta guasu jöke güi ikatu pe, ɨ̈aka jembeɨ pe, metei yerure renda pe. Jare joko pe roguapɨ oremiari kuña yatɨ vae reta pe. 14Jayave metei kuña Lidia jee vae temimonde pɨ̈taü vae imeea tëta guasu Tiatira pegua omboete Tumpa vae oyeapɨsaka oï. YandeYa oparavɨkɨ ipɨa pe, oyeapɨsaka kavi vaerä Pablo jeigüe re. 15Jare oyembobautisauka opaete jo pegua reta ndive güire, jei oreve:

—Perovia ko che arovia ete kavi yandeYa re yave, peyu pepɨta chero pe.

Jare oremoñera ropɨta vaerä joko pe.

16Jare metei ara rojo ye yave yerurea pe, orerövaiti metei kuñatai aña imbaepuere rupi mbae maratuta vae re oikuaa vae. Kuae kuñatai iya reta omongana jeta korepoti jese. 17Kuae kuñatai ou oreraɨkue, jare osapúkai reve jei:

—¡Kuae kuimbae reta Tumpa Tuichagüe yae vae jembiokuai reta ko. Jae reta omoërakua peve yemboasa regua!

18Jare mbovɨ ara rupi jökorai oyapo kuñatai. Kuae jae kaviä Pablo pe, jare jae oyerova jei aña pe:

—Jesucristo jee re royókuai: ¡Esɨrɨ chugüi!

Jare jupiveiño aña osɨrɨ chugüi.

19Jare kuñatai iya reta oikuaa mbaetɨ ma omongana jese yave, oipɨɨ reta Pablo jare Silas, jare güɨraja reta mburuvicha reta jóvai. 20Jare oñono reta mburuvicha reta jóvai, jei reve:

—Kuae kuimbae judío reta, omoambeko ñanerëta guasu pegua reta. 21Jae reta güeru mboromboe jaekaviä yande Romaɨgua reta yayapo vaerä vae.

22Jayave yatɨ vae reta metei rami oporepeña jese reta. Jare mburuvicha oporojäa vae reta omondoro Pablo jare Silas jemimonde reta, jare oinupauka ɨvɨra pe. 23Jare jeta oinupauka reta güire, oñoñauka reta tembipɨɨrɨru pe. Jare oyókuai reta tembipɨɨrɨru iyangarekoa omoëguambae etei vaerä. 24Jáeramo tembipɨɨrɨru iyangarekoa oñoña reta tembipɨɨrɨru japɨpe kotɨgua ete pe, jare oñono ipɨ ɨvɨrakua pe.

25Ërei pɨare mbɨte rupi Pablo jare Silas oyerure jare otairari ñogüɨnoi Tumpa pe. Jare ïru tembipɨɨ reta oyeapɨsaka ñogüɨnoi jese reta. 26Jare güɨramoiño ɨvɨkana tätagüe, jare okana tembipɨɨrɨru iguapɨka. Jupiveiño oyepea opaete öke reta, jare opa oso opaete karena tembipɨɨ reta oñeapɨti pɨpe vae. 27Jayave tembipɨɨrɨru iyangarekoa osareko jare oecha oyepea oï tembipɨɨrɨru jöke reta. Jayave oekɨ ikɨsepuku oyeyuka vaerä, echa jae oyemongeta tembipɨɨ reta opa ma ko otekuarai. 28Ërei Pablo osapúkai reve jei:

—¡Agüɨye eyeyuka. Ko opareveño roï kuae pe!

29Jayave tembipɨɨrɨru iyangarekoa oenɨi kia güeru vaerä chupe tembipe. Jayave osɨi tembipɨɨrɨru japɨpe kotɨ, jare oyetavatɨka orɨrɨi reve Pablo jare Silas jóvai. 30Jayave güɨnoe reta oka pe jare jei chupe reta:

—¿Mbae pa ayapota ayemboasauka vaerä?

31Jayave jae reta jei chupe:

—Erovia yandeYa Jesucristo re, jare reyemboasaukata nde jare ndero pegua reta.

32Jayave jae reta omombeu Tumpa iñee chupe jare opaete jo pegua reta pe. 33Jare jókuae ora voi tembipɨɨrɨru iyangarekoa oyoe Pablo jare Silas ipere reta. Jayave jae jare opaete jo pegua reta oyembobautisauka. 34Jayave tembipɨɨrɨru iyangarekoa güɨraja jëta pe omongaru Pablo jare Silas. Jare jae jare opaete jo pegua reta oyerovia yae güɨrovia reta ramo Tumpa re.

35Jare köe ma yave, mburuvicha oporojäa vae reta ombou sacerdote tenondegua jembiokuai reta jei vaerä: “Eyora jókuae kuimbae reta.”

36Jare tembipɨɨrɨru iyangarekoa omombeu kuae ñee Pablo pe. Jei chupe:

—Mburuvicha oporojäa vae reta ombou cheokuai poyora vaerä. Jáeramo añave pepuere peë jare peo pɨagüive.

37Ërei Pablo jei sundaro reta pe:

—Ore Romaɨgua reve, mburuvicha reta orenupauka opaete vae jovake orerekombae reve, jare oreñoñauka tembipɨɨrɨru pe, jare añave oipota oreyorauka vɨari. ¡Ngaraa jökorai! Toyogüeru jae reta etei oreyora vaerä.

38Jayave sacerdote tenondegua jembiokuai reta yogüɨraja omombeu kuae ñee jókuae mburuvicha oporojäa vae reta pe. Jayave jae reta okɨɨye, oikuaa yave Romaɨgua reta ko vae. 39Jayave yogüeru tembipɨɨrɨru pe omoñera vaerä Pablo jare Silas. Jayave güɨnoe ikatu pe, jare omoñera yogüɨraja vaerä tëta guasu güi. 40Jayave Pablo jare Silas oë reta güire tembipɨɨrɨru güi yogüɨraja Lidia jëta pe. Jare oecha güire oporogüɨrovia vae reta, omoäta ngatu jare opa yogüɨraja joko güi.

Currently Selected:

HECHOS 16: GUABD

Highlight

Copy