HECHOS 15

Oporogüɨrovia vae reta itenondegua reta oyemboatɨ Jerusalén pe

1Jare jókuae ara rupi amogüe kuimbae reta yogüeru Judea güi Antioquía pe vae omboe oporogüɨrovia vae reta, jei reta: “Mbaetɨ yave peyembocircuncida Moisés#Lv 12.2. iporookuai pe jei rami, ngaraa pepuere peyemboasauka.”

2Pablo jare Bernabé täta oyoaka jae reta ndive. Jayave oporogüɨrovia vae reta oiparavo Pablo jare Bernabé jare ïru vae reta jae reta ipɨte güi, yogüɨraja vaerä Jerusalén pe imiari kuae re temimondo reta jare oporogüɨrovia vae reta itenondegua reta ndive.

3Jayave oporogüɨrovia vae reta omondo ma yave, jae reta oasa Fenicia jare Samaria rupi omoërakua reve joko pegua reta pe kërai judiombae vae reta oyerova Tumpa kotɨ. Jare omboyerovia yae oporogüɨrovia vae reta.

4Jare yogüɨraja oväe yave Jerusalén pe, temimondo reta jare opaete oporogüɨrovia vae reta itenondegua reta ndive omboresive kavi reta. Jare Pablo jare Bernabé imiari chupe reta opaete Tumpa oyapo mbaembae jae reta ndive vae. 5Ërei amogüe fariseo oporogüɨrovia vae reta opüa jare jei:

—Toyembocircuncida judiombae oporogüɨrovia vae reta, jare toyapo reta Moisés iporookuai.

6Jayave temimondo reta jare oporogüɨrovia vae reta itenondegua reta oyomboatɨ imiari reta vaerä kuae re. 7Jare jeta ma oyoaka yave, Pedro opüa jare jei chupe reta:

—Tëtara reta, peikuaa katu ko kërai ɨma ma ko Tumpa cheparavo amoërakua vaerä judiombae vae reta pe ñee ikavi vae, jare jae reta güɨrovia vaerä.#Hch 10.1-43. 8Tumpa ko oikuaa opaete vae ipɨa vae, jae oechauka jae reta güɨrovia ko. Echa omee chupe reta Espíritu Santo,#Hch 10.44. yandeve omee#Hch 2.4. rami. 9Jare Tumpa mbaetɨ etei yandemboyoavɨ jae reta güi. Echa iporogüɨrovia reta rupi oitɨo ma ipɨa. 10Jayave ¿maera pa peipota pemboavai Tumpa? Echa peñono oporogüɨrovia vae reta pe mbae yavaigüe, yande reta ani ñaneñemuñagüe reta ave mbaetɨ ipuere oyapo vae. 11Yande yarovia yayemboasauka ma ko yandeYa Jesús ipɨakavi rupi, jae reta rami.

12Jayave opaete yatɨ vae reta kïrii, jare oyeapɨsaka Bernabé jare Pablo jei vae re. Jae reta imiari chupe reta opaete mɨakañɨ reta tuichagüe Tumpa oyapo jae reta rupi judiombae vae reta ipɨte rupi vae. 13Jare jae reta opa imiari yave, Jacobo jei:

—Tëtara reta, peyeapɨsaka cheré. 14Simón omombeu ma yandeve kërai Tumpa jaeramo etei ou judiombae vae reta pɨri, oiparavo vaerä chugüi reta amogüe tëta jae imbaerä. 15Kuae re ko jei ñeemombeúa reta, jembikuatía pe oï rami:

16“Kuae jaɨkue rupi ayu yeta,

jare amopüa pɨau yeta David jo opa osururu oïgüe.

Amopüa yeta osururugüe, jare ambopɨauta,

17opaete ɨvɨ pegua reta chereeka vaerä,

jare opaete judiombae vae reta cheree omboete vae.

18Che peYa aikuaauka kuae arakae güive#Am 9.11-12. vae, jae körai.”

19Jáeramo che jae agüɨye vaerä yamoambeko jókuae judiombae vae reta oyerova Tumpa kotɨ vae. 20Ërei toyekuatía chupe reta, agüɨye vaerä oyemongɨa tumpa-raanga reta pe mbae oñererökuavee#Ex 34.15-17. vae rupi, aguasa#Lv 18.6-23. pe jare mɨmba oyeyuvɨgüe isoo, jare mbaerugüɨ,#Lv 17.10. jare agüɨye vaerä oyapo aguasa. 21Echa arakae güive yogüɨreko tëta guasu ñavo rupi Moisés iporookuai omombeu vae reta judío reta itupao reta rupi. Ara mbutuu ñavo jae reta omongeta joko pe.

22Jayave temimondo reta jare opaete oporogüɨrovia vae reta jare itenondegua reta ndive jei ikavi ko oyeparavo vaerä amogüe kuimbae reta jae reta ipɨte güi, omondo vaerä Antioquía pe Pablo jare Bernabé ndive. Jayave oiparavo reta Judas oyeero Barsabás pe vae jare Silas. Jae reta ko oporogüɨrovia vae reta itenondegua reta. 23Jare jae reta oikuatía omondo jae reta ndive. Kuae tupapire pe jei körai:

“Ore temimondo reta, jare opaete oporogüɨrovia vae reta jare itenondegua reta, romondo tamaraeme opaete pe reta judiombae pe oporogüɨrovia Antioquía, Siria jare Cilicia pe peï vae pe. 24Jërakua oreve kërai amogüe orepɨte güi yogüɨraja pemoambeko, ore mbaetɨ royókuai reve. Jae reta pembojopa, echa peokuai peyembocircuncidauka vaerä jare peyapo vaerä Moisés iporookuai pe jei vae. 25Jáeramo royemongeta ma metei rami roiparavo vaerä orepɨte güi amogüe romondo pekotɨ; yaaɨu vae Bernabé jare Pablo ndive. 26Jae reta omoëgua jekove okɨɨyembae reve yandeYa Jesucristo pe oyeokuai vaerä. 27Jáeramo romondo pépɨri Judas jare Silas. Jae reta etei omombeuta vi peve kuae. 28Jaekavi Espíritu Santo pe jare oreve vi agüɨye vaerä roñono peve mbaemboavai, jaeño kuae mbovɨ mbaembae: 29Agüɨye peu soo tumpa-raanga reta pe oñererökuaveegüe, jare mɨmba oyeyuvɨgüe isoo jare mbaerugüɨ. Agüɨye peyapo aguasa. Kuae roe peve vae peyapo yave, jaekavi ko. Tumpa ndiveño.”

30Jayave jókuae oyemondouka vae reta yogüɨraja oväe Antioquía pe. Jare omboatɨ yave oporogüɨrovia vae reta, omee chupe reta jókuae tupapire. 31Jare opa omongeta yave, oyerovia reta jókuae ñee yembopɨakatu pegua re. 32Judas jare Silas ñeemombeúa reta ramo, ombopɨakatu jare omomɨ̈rata jeta imiari oporogüɨrovia vae reta pe. 33Jare joko pe ɨma ngatu ma yogüɨreko güire, oporogüɨrovia vae reta ombou kavi ye imboúa reta kotɨ. 34Ërei Silas pe ikavi opɨtaño vaerä joko pe. 35Pablo jare Bernabé opɨta Antioquía pe oporomboe Tumpa iñee re, jare omoërakua reta ñee ikavi vae jeta ïru vae reta ndive.

Pablo oyembosɨrɨ Bernabé güi jare omboɨpɨ mokoía ma ojo omoërakua ñee ikavi vae

36Metei ara Pablo jei Bernabé pe:

—Yaja ye oporogüɨrovia vae reta pɨri, opaete tëta guasu ñamoërakua ma yandeYa iñee vae rupi, yaecha vaerä kërai ra ñogüɨnoi.

37Jare Bernabé oipota tëi güɨraja jae reta jupíe Juan, Marcos pe oyeero vae. 38Ërei Pablo pe mbaetɨ jaekavi güɨraja vaerä jae reta jupíe. Echa jae ou ye Panfilia#Hch 13.13. güi chugüi reta, jare ojoä jae reta ndive Tumpa iparavɨkɨ oyapo vaerä. 39Oyoaka reta tätagüe oyoupii kuae re. Jáeramo oyemboyao reta oyougüi. Bernabé güɨraja jupíe Marcos jare ojo reta barco pe Chipre kotɨ. 40Ërei Pablo oiparavo Silas, jare oporogüɨrovia vae reta oyerure güire yandeYa ipɨakavi re chupe, ojo joko güi. 41Jare oasa reta ɨvɨ Siria jare Cilicia rupi omoäta ngatu reve oporogüɨrovia vae reta tupao ñavo rupi.

Currently Selected:

HECHOS 15: GUABD

Highlight

Copy