HECHOS 17

Tekorai Tesalónica pe

1Pablo jare Silas oasa yave tëta guasu Anfípolis jare Apolonia rupi, yogüɨraja oväe tëta guasu Tesalónica pe. Joko pe oï metei judío reta itupao. 2Jare Pablo ojo jókuae tupao pe. Echa jökorai oyapo opaete tëta guasu reta rupi. Jare ara mbutuu ñavo oyoaka judío reta ndive, mboapɨ ara mbutuu rupi, 3oechauka jare oikuaauka kavi reve Tumpa Iñee rupi, kërai Cristo oiporara ñotai ko jare oikove ye ñotai ko omanogüe reta ipɨte güi vae. Jei:

—Kuae Jesús, che amoërakua peve vae ko jae Cristo.

4Jayave amogüe güɨrovia, jare oñemoïru Pablo jare Silas ndive. Güɨrovia vi jeta griego Tumpa omboete vae reta, jare jeta kuña imboetea yae vae reta vi. 5Ërei judío oporogüɨroviambae reta iyakatúä Pablo jare Silas re ramo, omboatɨ jeta kuimbae jembiapombae jare jeko pochɨ vae reta, oyapo tekorai tëta guasu pe. Javoi oporepeña reta Jasón jo re oeka tëi Pablo jare Silas, güɨraja vaerä tëta guasu pegua reta jóvai. 6Ërei mbaetɨ oväe reta ramo oipɨɨ reta Jasón jare amogüe oporogüɨrovia vae reta güɨraja mburuvicha tëta guasu pegua reta pe, jare iñeeäta reve jei reta:

—Kuae kuimbae reta güɨrokomegua opaete ɨvɨ pegua reta iyemongeta vae yogüeru vi kuae pe. 7Jare añave Jasón omboresive jo pe. Jare opaete kuae reta oyovaicho César iporookuai kotɨ. Jei reta oime ïru mburuvicha guasu Jesús jee vae.

8Tëta guasu pegua reta jare juvicha reta kuae oendu yave, ombopɨaä yae. 9Jare Jasón jare ïru vae reta omboepɨ chupe reta yave, opa oyora reta.

Pablo jare Silas Berea pe

10Jare jupiveiño oporogüɨrovia vae reta omondo pɨ̈tu yave Pablo jare Silas tëta guasu Berea kotɨ. Jae reta yogüɨraja oväe joko pe yave, yogüɨraja oike reta judío reta itupao pe. 11Jare joko pegua judío reta iyarakuaa yae Tesalónica pegua reta güi. Ikɨ̈reɨ ngatu reve oyeapɨsaka Tumpa iñee re, jare ara ñavo omongeta kavi Tumpaa Iñee, oikuaa vaerä añete ra Pablo jei vae. 12Jare jeta joko pegua reta güɨrovia. Güɨrovia vi jeta griego imboetea vae kuña reta jare kuimbae reta. 13Ërei judío Tesalónica pegua reta oikuaa Pablo omoërakua vi Berea pegua reta pe Tumpa iñee yave, yogüɨraja joko pe oyapouka tekorai joko pegua reta pe. 14Ërei jupivei oporogüɨrovia vae reta omondouka Pablo ɨguasu kotɨ. Ërei Silas jare Timoteo opɨtaño joko pe. 15Jare Pablo güɨraja vae reta güɨraja tëta guasu Atenas pe. Pablo oyókuai jae reta omombeu vaerä Silas jare Timoteo pe yogüeru vaerä ikotɨ ɨmambaeño. Jayave jae reta yogüeru ye Berea kotɨ.

Pablo Atenas pe

16Pablo oäro oï Silas jare Timoteo Atenas pe ramboeve, oecha jókuae tëta guasu pegua reta itumpa-raanga pota yae yave, iyarasɨ. 17Jayave oyoaka judío reta itupao pe judío reta jare ïru omboete Tumpa vae reta ndive. Oyoaka vi ara ñavo oka guasu pe yatɨ vae reta ndive. 18Jare amogüe arakuaa regua reta oyoaka Pablo ndive. Jae reta ko yemboe epicúreo jare estoico pegua reta. Amogüe jei:

—¿Mbae ra oipota jei kuae imiari mbatee vae?

Ïru vae reta jei:

—Ïru tumpa yaikuaambae vae re omoërakua vae ndipo.

Echa Pablo omoërakua chupe reta ñee ikavi vae Jesús regua jare kërai oikove ye omanogüe reta ipɨte güi vae. 19Jare güɨraja reta Pablo Areópago#17.19 Areópago, kuae ko jae metei ɨvɨtɨ raɨ, jare morojäa renda. jee vae pe. Jare jei reta chupe:

—Emombeu oreve mbae nunga mboromboe ipɨau vae ra kuae nemiari jese vae. 20Echa kuae remoërakua oreve vae roikuaambae ko. Jáeramo roipota roikuaa mbae ra oipota jei vae.

21Echa opaete Atenaɨgua reta jare ketɨgua joko pe yogüɨreko vae reta, jaeño oyemoambeko imiari jare oyeapɨsaka mbae ipɨau vae re.

22Jayave Pablo oyemboɨ Areópago pe jeta vae reta ipɨte pe, jare jei chupe reta: “Kuimbae Atenaɨgua reta, aecha opaete pe reta pemboete yae tumpa reta. 23Echa aguata ramboeve pembaemboete renda reta rupi, aecha metei mɨmba oñemee jese vae re oyekuatía oï körai: ‘TUMPA YAIKUAAMBAE PEGUARÄ.’ Jókuae Tumpa pemboete peikuaambae reve vae re ko che amoërakua peve.

24Jae ko Tumpa oyapo ɨvɨ jare opaete mbaembae oï pɨpe vae. Jae ko ara jare ɨvɨ iYa, ërei mbaetɨ oiko tupao reta yande yayapogüe reta pe. 25Jae mbaetɨ etei oeka ɨvɨ pegua reta omee vaerä mbae chupe. Echa jae ko omee yandeve tekove jare ñanepɨ̈túe, jare opaete mbaembae.#1 R 8.27; Is 42.5.

26Jae oyapo metei kuimbae güi opaete vae reta yogüɨreko vaerä ɨvɨ iárambo. Tumpa etei ko omee ɨvɨ pegua reta pe kërai yave jare kia pe yogüɨreko vaerä. 27Ipuere vaerä oeka reta Tumpa jare güɨramoi oväe vaerä iyeupe reta. Echa añetete jae mbaetɨ ko mombɨrɨ oï yandegüi. 28Echa jese ko yaikove yaiko jare ñamɨi. Jare jökorai vi amogüe pepɨte pe ñeepöra iyapoa reta jei: ‘Tumpa iñemuña reta ko yande.’ 29Tumpa iñemuña ko yande yave, mbaetɨ ko ikavi yae vaerä Tumpa ko jae mbae iä oro pegua, korepoti pegua ani ita pegua, kuimbae reta ipoki rupi oyapo vaeño ko. 30Ërei Tumpa ɨma rupi mbaetɨ oiporarauka oikuaambae vae reta pe. Ërei añave jae oyókuai opaete ɨvɨ pegua reta oeya vaerä iyemongeta ikavimbae vae ipɨa pe güɨnoi vae. 31Echa jae oiparavo ma metei ara ojäauka vaerä jupi#Sal 9.8. rupi ɨvɨ pegua reta, jókuae kuimbae jae oiparavo vae rupi. Jare jókuae oechauka opaete ɨvɨ pegua reta pe, jae omoingove ye yave omanogüe reta ipɨte güi.”

32Jare oendu reta oikove ye omanogüe reta ipɨte güi vae regua yave, amogüe vae oyóyai. Ërei ïru vae reta jei Pablo pe:

—Ïru ara royeapɨsaka yeta nderé kuae re.

33Jayave Pablo ojo chugüi reta. 34Ërei amogüe vae güɨrovia Tumpa iñee, jare oñemoïru Pablo ndive. Kuae reta ipɨte pe ñogüɨnoi metei Areópago pegua Dionisio jee vae, metei kuña Dámaris jee vae, jare ïru vae reta.

Currently Selected:

HECHOS 17: GUABD

Highlight

Copy