Ifyakutaŋga 17
17
1Popele apo, ili yakumene imyaka yakwe Ablama amakumi asanu naane nemyaka isa nu muli isanu naine, lomba ŵaYawe ŵalibwenekele kuli Ablama, nekulaŵila kuli ye ati: Neŵo eneŵaLesa ŵamakosa onse, ulukwenda pamenso anji, nekulukuwaminine. 2Popele nakulayana naweŵo, nekukufusyo'kwakuti. 3Popele Ablama waliwile pansi ubwifuneme: naŵo ŵaLesa ŵalukwambala nakwe ati: 4Naneŵo, ŵona, ukulayana kwanji kuli naweŵo; popele ukalukuli niwewisiwo ifikoto fyaŵantu ifinji. 5Kaŵili ukufuma pano isina lyoŵe talikalukwilikwa ati niweAblama, sombi isina lyoŵe likalukuli niweAblaamu; pakuti nakwalula uli fikoto fyaŵantu ifinji. 6Nakaŵili ŋkakwalula ukalukufyalisyo'kwakuti; ŋkaleŋgela muli weŵo icikoto caŵantu; nemfumu nasyo sikafuma muli weŵo. 7Ŋkekalika ukulayana kwanji pali neŵo naweŵo neŵana ŵoŵe panuma poŵe pafitentekwa fyaŵo fyonse koti kulayana ukwamuyayaya, mukulukwikele ndi ŵaLesa ŵoŵe neŵaŵana ŵoŵe panuma poŵe. 8Nakaŵili ŋkakupela weŵo neŵana ŵoŵe panuma poŵe icalo ico ici walukwikala-mo, icalo caKanani conse, cenu insiku syonse isyamuyayaya; kaŵili ŋkalukuli niŵaLesa ŵaŵo.
9Popele ŵaLesa ŵalilaŵile kuli Ablaamu ati: Naweŵo, ukalukulamo'kulayana kwanji, weŵo, neŵana ŵoŵe panuma poŵe pafitentekwa fyaŵo fyonse. 10Ukulayana kwanji, uku mukalama, ukwa pali neŵo namweŵo neŵana ŵoŵe panuma poŵe, nikuku: Pali mwewo aŵalalume ŵonse ŵakalukukopolwe'cisilamu. 11Kaŵili mukalukukopolwa mumunefu wamusuti wenu, nako kukalukuli kesiŵilo kakulayana ukwapali neŵo namweŵo. 12Popele uyo ulele-po insiku sisanu nasitatu eukasilimuka pakati pali mweŵo, aŵalalume ŵonse pafitentekwa fyenu fyonse, nawoyo uwakufyalwa muŋanda, neli wakuulwa indalama kumwensu umbi, utaali paŵana ŵoŵe. 13Uyo uwakufyalwa muŋanda yoŵe, nawoyo naye uwaku ulwa indalama syoŵe, ŵonse ŵaŋgakopolwe'cisilamu: popele ukulayana kwanji kukalukuli mumunefu wenu koti kulayana ukwamuyayaya. 14Kaŵili umwalalume uwakuŵulo'kukopolwe'cisilamu, utaakopwelwe mumunefu wamusuti wakwe, umuti mo' yo eukalekaniwa kuŵakwaŵo; apulaisya ukulayana kwanji.
15Popele ŵaLesa ŵalilaŵile kuli Ablaamu ati: NaSalai umukasi woŵe naye, tesi umwilike isina lyakwe ati niSalai, koku, sombi isina lyakwe lyakulukuli niSala. 16Popele nakulukumusyucisya, nakaŵili ŋkakupelo'mwana umwalalume kuli ye: icine ŋkalukumusyucisya, naye akalukuli ninyinaŵo imikoka yaŵantu; imfumu syaŵantu sikafuma muli ye. 17Popele Ablaamu waliwile pansi ubwifuneme, nekulukuseka, nekulaŵila mumutima wakwe ati: Kansi umwana kaafyalwa kuli woyo ukumene imyaka umwanda? NaSala naye ukumene imyaka amakumi asa nu naane kaafyala? 18Popele Ablaamu walilaŵile kuli ŵaLesa ati: Isimeli ŋgaakalukwikele nemweo pamenso enu! 19Sombi ŵaLesa ati: Koku, sombi Sala, umukasi woŵe, eukakufyalilo'mwana umwalalume; popele ukamwilike isina lyakwe ati nilsaci: popele ŋkekaliko' kulayana kwanji nakwe koti kulayana ukwamuyayaya ukwakuŵana ŵakwe panuma pakwe. 20Kaŵili ifyakwe Isimeli, nakumfwa weŵo: ŵona, namusyucisya, popele ŋkamwalula akafyalisya, ŋkamufusyo' kwakuti; akafyale'mfumu ikumi nasiŵili, popele ŋkamwalula cikoto cawantu icikulu. 21Sombi ukulayana kwanji ŋkakwikalika nalsaci, uyu akakufyalila Sala, pampindi ino iyansicilwe mwakeso. 22Popele ŵalicilekele ukwambala nakwe, naŵo ŵaLesa ŵaliimine ukufuma kuli Ablaamu.
23Popele Ablaamu waliŵulile Isimeli, umwana wakwe, naŵaŵo ŵonse aŵafyelwe muŋanda yakwe, naŵaŵo ŵonse aŵaulilwe indalama syakwe, aŵalalume ŵonse aŵapaŵantu awamuŋanda yakwe Ablaamu, nekukopole'minefu yamisuti yaŵo, akasuŵa ako kopele koti nifyefyo ifi ŵamuŵulile ŵaLesa. 24Lomba Ablaamu imyaka yakwe yalikumene amakumi asanu naane nemyaka isanu muli isanu naine, ili akopwelwe mumunefu wamusuti wakwe. 25Kaŵili Isimeli umwana wakwe imyaka yakwe yalikumene ikumi naitatu ili akopwelwe mumunefu wamusuti wakwe. 26Pakasuwa kantu kamo Ablaamu walikopwelwe pamo naIsimeli umwanawakwe. 27Nakaŵili aŵalalume ŵonse aŵamuŋanda yakwe, aŵo aŵafyelwe muŋanda, naŵaŵo aŵaulilwe indalama kuŵensu, ŵonse ŵalikopwelwe pamo nakwe.
Currently Selected:
Ifyakutaŋga 17: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
