Ifyakutaŋga 18
18
1Popele ŵaYawe ŵalibwenekele kuli ye pamyeloni yakwe Mamile: lomba Ablaamu aliikele kumulyaŋgo wesema lyakwe, ili kakaŵile akasuŵa; 2popele aliinucile nekuceŵa, lomba kuŵona nikuŵantu ŵatatu ŵaliimakene pali ye: popele, ili aŵabwene, aliŵutucile ukufuma kumulyaŋgo wesema, mukuŵacinsya, nekwinamisya pansi, nekulaŵila ati: 3MweŵaSikulu ŵanji, kani ŵukumo naŵono'luse pamenso enu, ndukumukombeteleni ati mwifuma-ko kumupyunjisi wenu. 4Ndukumukombeteleni, ŋgawalete utwenda, mukasambe kumakasa, mukatusye mumuti. 5Popele nakuleta kasiŋkwa; mwikalike imitima yenu; popele apo lomba mwakupita; pakuti ifyo muliisile kumupyunjisi wenu. Naŵo ati: Kocita koti nifyopele'fyo ifi walaŵila.
6Popele Ablaamu waliinjile uluŵilo mwisema kuli Sala, nekulaŵila ati: Aŋgufya, ulete ifyakwesya fitatu ifyawuŋga uŵupelekele, ufikande, woce ifimpwampwa pesiko. 7Popele Ablaamu waliŵutucile kwitaŋga, nekuleto' mombe unacile nekupelo'musaŋkwa, naye umusaŋkwa aliaŋgufisye ukumwipika. 8Kaŵili aliŵulile batala nemandili, nemombe uyo uwaipicile, nekuŵatekela; popele aliimakene pali ŵo mumuti, naŵo ŵalilile.
9Popele apo ŵalilaŵile kuli ye ati: Sala umukasi woŵe ali kulipi? 10Naye ati: Ŵoneni, ali mwisema. Popele ŵalilaŵile ati: Icine ŋkabwela kuli weŵo koti nimpindi yamweo; popele ŵona, Sala umukasi woŵe akaŵa nemwana umwalalume. Popele Sala waliumfwile' fyo kumulyaŋgo wesema kunuma yakwe Ablaamu. 11Lomba Ablaamu naSala ŵalikulile nekucekulo'kwakuti; kaŵili kale amulekele Sala amekalilo aŵanakasi. 12Pakuti pali fyefyo Sala walilisekele ati: Ili ncekwile, kani nakupoka ukutemwa, kaŵili sikulu wanji naye alicekwile? 13Popele ŵaYawe walilaŵile kuli Ablaamu ati: Sala, mbanindo asekela ati, Kani cine ŋkafyalo'mwana, nencekwile? 14Ifintu fyonse kani pali icakuwakaŋga ŵaYawe? Pampindi iyo ilailwe ŋkabwelela kuli weŵo, koti nimpindi yamweo, popele Sala akaŵa nemwana umwalalume. 15Popele apo Sala alikene ati nsisekele; pakuti walitinine. Sombi naŵo ati: Koku, sombi cine waseka.
16Popele apo aŵantu aŵo ŵaliimine apo, nekutontomeka kuSodoma: naye Ablaamu waliile naŵo mukuŵasindicisya. 17Popele ŵaYawe ati: Kani nakumufisila Ablaamu icintu ico ici ndukucita? 18pakuti icine Ablaamu akaŵa cikoto caŵantu icikulu icamakosa, kaŵili imikoka yaŵantu ŵapansi yonse ikalukusyucila muli ye. 19Pakuti ndimwisi, nekwisiŵa ati akafunda aŵana ŵakwe newamuŋanda yakwe panuma pakwe, naŵo ŵakalukulonda insila yaŵaYawe, ukulukucite'filuŋgeme nekwesyo'kuluŋgeme; ati ŵaYawe ŵakamuletele Ablaamu ifyo ifi ŵalaŵile ifyakuli ye.
20Popele ŵaYawe ŵalilaŵile ati: Pakuti impupo isiŵipile isyaSodoma naGomola sikulu, napakuti ukuŵifya kwaŵo kulilemene makosa, 21nakuseluka ŵukumo, mukuŵona kani ŵalukucite' cine koti nimpupo syakuko, isyaisa kuli neŵo; popele kani ifyo tefyo nakwisiŵa. 22Popele aŵantu ŵalifutatile-ko'ko, nekulukuya kuSodoma: sombi Ablaamu aciimakene pamenso aŵaYawe.
23Popele Ablaamu alipalamine-ko, nekulaŵila ati: Kanimwakuŵonawila kumo newaluŋgeme neŵakuŵifya? 24Kani cipale mumusi muli awaluŋgeme amakumi asanu, mwakuwonala nekuŵulo'kuuleko'musi pakuti pawaluŋgeme aŵo amakumi asanu aŵali-mo? 25Ukucite'fyakuŵe'fyo, ukwipaila limo neŵaluŋgeme neŵakuŵifya, kuŵe apatali napali mweŵo: kaŵili ukwesya awaluŋgeme pamo neŵakuŵifya kuŵe apatali napali mweŵo: Aŵakusololoa nefyapansi fyonse kansi tawakacite'filuŋgeme? 26Popele ŵaYawe ati: Kani nakuŵona muSodoma mumusi awaluŋgeme amakumi asanu, eli nakuleko'musi wonse pakuti pali ŵo. 27Popele Ablaamu waliasucile ati: Ŵoneni lomba, nalipelo'mulandu uwakulaŵila naŵaSikulu, neŵo nefukutu netoi: 28kani cipale pakacepa ŵasanu pawaluŋgeme aŵo amakumi asanu: mwakonalo'musi wonse pakuti pakucepa ŵasanu? Naŵo ati: Kani nakuŵona-mo mulya amakumi ane naŵasanu, tesi ŋgonale! 29Naye walilaŵile kuli ŵo naliŵili ati: Kani cipale pakuŵoneka apo amakumi ane. Naŵo ati: Tesi ncicite pakuti pamakumi ane. 30Nakaŵili Ablaamu ati: ŴaSikulu ŵefitwa, ndaŵile: kani cipale pakuŵoneka apo amakumi atatu. Kumfwa ati: Tesi ncicite, kani nakuŵona apo amakumi ata tu. 31Kaŵili na ye walilaŵile ati: Ŵoneni lomba, nalipelo'mulandu uwakulaŵila naŵaSikulu: kani cipale pakuŵoneka apo amakumi aŵili. Kumfwa ati: Tesi ŋgonale pakuti pamakumi aŵili. 32Popele ye ati: ŴaSikulu ŵefitwa, nakulaŵila impindi iyi imo yeŋka: kani cipale pakuŵoneka apo ikumi limo lyeŋka. Naŵo ati: Tesi ŋgonale pakuti pekumi limo.
33Popele ŵaYawe ŵaliile, ili ŵalekele ukwambala nakwe Ablaamu: naye Ablaamu walibwelele kwakwe.
Currently Selected:
Ifyakutaŋga 18: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
