Malakai 1
1
Yawenu oo mauhak Israel dilag doyom
1Nai meunab ele imu, am Israel dilagnu. Yawe Nug propet Malakai mette, nug ag mattom.
2Yawe Nug Israel amelagppa atte. “Da ahilagnu oo mauhak doye, gemu ele doottem,” awa atte. Yawe Nug anam aakku atte, amge ag, Israel danab ah, ag Nug amegppa atteb. “Na ib adekkuppa genab ihinignu oot mauhom, gemu ele oot mauhtte ippunigkkutnu od medattem?” aon atteb. Ag anam atteb amu, Yawe Nug inam iikku amelagppa atte. “Esau am Jakop awag, me da ag alalag Jakopnu ool mauhom. 3Da nuhignu ool mauhom, amge da Esau geɗidmi.
Da Esau geɗitten hei, kekeɗ ag nuhig wan heeg, wan amuam wan meu waknu nakokib elele beum daatte.
Ao, da hei, ahilag wan, am ag aulag aakku, wan amuam doɗ jakal, am amu dilag beum daatte,” awa atte.
4Esau buɗub, ag Edom wanppa daatteb, ag inam akkulagtai, “Kayak Nug ihinig wan he nauhom, amge ig nauhom am baula buugnig.” Ag anam akkulagtai, amge Yawe Nukka Ɠagattag Oh Ele Nug inam atte. “Ag ahilag wan heppeg ena daakkunu hekkulagtai, amge da eɗue loppaɗppi nekku! Da anam heppi, laa ag ahilag wan, ag amunu, nau hak danab ah dilag wan, anana, ag Esau buɗub dilagnu ele, danab ah Yawe Nug ahilagnu hanhan oppoɗi bak dootte, akkulag,” awa atte. 5Israel danab ah ag, ag keeke he nauhak amu ag amelagppa anadna, ag akkulag. “Aakku genab! Yawe Nug ig wanenigppa ɠagattag daatte, amu Nug ihinig tom ele eɗitta ukkak, Nug appa ele ɠagattag daatte,” aon akkulag.
Mana Mettak meu iitta
6Yawe Nukka Ɠagattag Oh Ele Nug mana mettak danab amelagppa atte. “Nid danab nug mameg binag mette; maɗi nid laa nug okkai nuhig noobppa bodoettak daatte.
Da am ag mamelag, amge ag da binal ii metteb.
Ao, da am ahilag okkai, amge ag dahilnu ena elele ii dootteb.
Ag mana mettak danab ag da onilnu, keeke hamununab, dootteb. Ag anam dootteb, amge ag da amelppa atteb. ‘Ig ib adekkuppa na oninnu, keeke hamunab doottem?’ aon atteb. 7Ag inam iikku da onilnu, keeke hamunab, dootteb. Ag ee dubuttid tak ele akkan, dahil qaɗabppa dona, aguppa mena maitteb. Ag anam hena, ag oɗ meɗatteb. ‘Ig attem heut, na oo ettak doottem?’ aon atteb. Am inam. Ag da, Yawe, ag dahil qaɗabnu, am keeke hamunab, ig pehettak dabmekkunignu keeke iitta, aon atteb, amuppa ag hetteb. 8Haen ag doɗ amelag gaɗuak ele manadna, da meɗatteb amu, amuppa ag nau iite hetteb? Haen ag doɗ ag ebehi kaliak ele, o laa oɗe mak ele akkan dona, manan meɗatteb amu, amuppa ele ag nau iite hetteb? Ag keeke anam ahilag gawana mettan antteg!
Nug keeke amunu oo ena dookkute?
Nug ag ena heppig doya ehanadkkute?” Yawe Nukka Ɠagattag Oh Ele Nug anam atte.
9Amu Yawe Nukka Ɠagattag Oh ele Nug atte. “Ag Kayak, ag Nug oo bodoette enanag maɗoɗ ele hak kobol ihinignu dim lamidkkunu ii daye daye oɗ metteg! Ag anam hekkulag, amge ag mana mettak anam aon wappeg amu, Nug ag iinab ehanadma,” awa atte.
10Yawe Nukka Ɠagattag Oh Ele Nug atte. “Da laa nug ag mana mettak danab oolagppanu, nug ag mana mettak ena iitta amu ii manadmananu, nug dahil mettid lag, nuhig tomppan keeke oh elenu od manadkkunu ool okkai daatte! Da ahilagnu ena ii doottem. Da ahilag mana mettak amu, da ii aopa. 11Aɗinu? ⌊Da ahilag mana mettak ii aopanu uug laa ii doottem.⌋ Aam bedeppan ukka aam nodeppa da onil am binag ele daakku. Da onil am binag ele daakku amunu, danab ah ag kalu danab ile muttuɗig enanag bette, amu doɗ tutukku ele manan, da meɗaglag,” Yawe Nukka Ɠagattag Oh Ele Nug anam atte.
12Amu Yawe Nukka Ɠagattag Oh Ele Nug atte. “Anam amge ag da Yawe, ag dahil qaɗabnu, ‘Am dubuttid tak ele,’ anana, ag ee amuppa manan, da meɗaglagnu, ag ee amunu, ‘Am keeke hamunab, ig pehettak dabmekkunignu keeke iitta,’ anana, ag kobol amuppa ag da Yawe, ag dahil qaɗab am keeke hamu bia doon, laa amu ippunadtteb. 13Ag amu henana, ag kobol da Yawe, da ag hekkulagnu mattami, ag kobol amunu, ‘Ig kobol amu oh hekkunignu am uug okkainab,’ aon atteb. Ag kobol amunu, am keeke hamunab doon, kobol amunu ena iitta dootteb.” Yawe Nukka Ɠagattag Oh Ele Nug anam awa atte.
Amu Yawe Nug inam atte. “Ag doɗ yab heppig elete, o ebehi kaliak elete, o oɗe meum elete, ag amu aon main meɗatteb amu, da amu aokkul am ena dabmettebte? Iitta! 14Aun laa nug sipsip dawai enanag mana meɗakkunu nai anan qakkom dayebeb, nug nau laa awa, mana meɗakku am enate? Iitta! nug eheɗ laa awaknu anak waappa daakku! Aɗinu? Da am king okkai; wanppan wan ohnu danab ah ag dahilnu ebehilag oh bodoetta le mekkunu daatteb!” Yawe Nukka Ɠagattag Oh Ele Nug anam atte.
Currently Selected:
Malakai 1: NB
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
