Sekaraia 14
14
Yawe Nug wan atu oh dilag okkai daakku
1Yawenu deɗ naɗi aakku uɗitte. Deɗ amuppa kekeɗ ag uɗippeg, Israel ag neegna daappeg, kekeɗ ag keeke ahilkad akkan gokkulag. 2Amu Yawe Nug atte. “Deɗ amuppa da wanppan wan ohnu danab ag Jerusalem banelag uɗiglagnu qagmaadkkul. Anam amu, kekeɗ ag uɗin, aab okkai amu eɗadkkulag. Ag laulkadppan keeke akkan gonana, ag ah am eheɗ hattaglag. Kekeɗ ag amu henan, ag aab amuppan danab ah ameg laa diin gona heppeg, ag wan laappa diia ukka laih me dayak danab ah daaglag. Ameg laa ag aab nauhom, amuppa daaglag,” awa atte 3Kekeɗ ag amu hekkulag, amge Yawe Nug aha ukkeb, nug wan amu, ahilkad daup ele ban hekkulag; Nug bannu deɗppa banppa dayaya, ban hette, Nug anam bia ag ele ban hekkulag. 4Deɗ amuppa nug na, Olipnu Qauko, qauko amu Jerusalemnu kaɗag uɗitteppanu daatte, Nug appa hibaitta dayebeb, qauko amu oppata, laih laih daakku. Qauko oppateb, gamagppa oolnu noak naɗi laa daakku; oolnu noak amuam kaɗag uɗitteppanu digmeeb ukka, qaban uɗitteppanu gokku. Amu bekkunu diig am, qauko laih am ukka, yawalti uɗitteppanu ukkebeb, laih am ukka, yau uɗitteppanu gokku. 5Oolnu noak amuam ukka, Asal batakku amunu, ag Juda danab ah ⌊diia ii ukkak ele,⌋ ag oolnu noak amuppa oolna gokkulag; anukka ag Juda dilag king Usianu haenppa mim ne oolppig, amubia ag oolna gokkulag. Amu dimppa amu Yawe, dahil Kayak, Nug uɗikku; Nug nuhikkud, ag nuhignu tituanak daatteb amu, Nug ag oh ele uɗiglag. 6Deɗ amuam inam daakku. Aam, kalam, hoɗoppai ele ag ii amahalmana. 7Deɗ amuam deɗ diig laa daakku; amahlaknab, gatatunab ele ii daama. Yawe Nugib keeke amu heeb bekkunu dootte. Am anam dayeb ukkeb, tuebnab meeb, amahlak daakku. 8Aria, deɗ amuppa amu le laa, le amu he, danab bau daatteb ele, le amuam Jerusalemnu nan gokku. Le amu laih am Mauhak Leppa ukkebeb, laih am Mediterenia yuppa gokku. Aam haenppa, oug haenppa ele le amu am anam ukkakib gokku. 9Amu Yawe Nug wan atu oh dilag king daakku. Haen amuppa amu, Yawe Nugib danab ah oh dilag dabmakppa Kayak daakku. Danab ah oh ag Nug noobppa dup nona binag mekkulag.
10Juda wanppa yawalti uɗitteppanu Geba daatteppa ukka, Jerusalem daatteppanu yau uɗitteppanu Rimon daatteppa amu, aab aɗit amu gamalahppa wan amu oh am eɗua, wannu laih onig Araba daatte, am amubia, ⌊honap⌋ daakku. Wan amuam wannu laih onig Araba daatte, am amubia, ⌊honap⌋ daakku, amge Jerusalem am nuhig abenppa, attan daakku. Jerusalemnu tom am aɗnu od laa onig Benyaminnu Od, amuppa digma ukka, od laa onig Alagnu Odppa ukka, aria, appanu tom am od laa onig Daugppan Od, amuppa ukka, amuppanu am lag attan ta ukkak menppa hak onig Hananelnu Lag, amuppa ta ukka, appanu kingnu grep meu tappa leppu awaknu abenppa batakku. 11Danab ah ag Jerusalem daaglag. Kekeɗ ag baula heppeg ii nauhmana. Jerusalem baɗak iittappa daaglag.
12Amu wanppanu wan attennu daup ag Jerusalem banelag uɗiglag amu, Yawe Nug heeb, oɗe nau danab kuɗum aqe mauhtteb ele ag aqadkku. Amuam ag hippaidna daappeg, ag teppulag beɗakku. Ag hippaidna daappeg, ag amelag ikkilagppa dayaya, beɗakku. Ag hippaidna daappeg, ag lemaɗulag ag oɗelagppa dayaya, beɗakku. 13Ag anam ban hekkulagnu uɗippeg, Yawe Nug heeb, ag eheɗnab baɗaglag. Yawe Nug heeb, ag eheɗ baɗappeg, ahilag dabmak eɗatteb, ag kaaka oinna, ag akka akka nug qak hekkulag. 14Ag anam heppeg, Jerusalem danabib iitta, Juda danab ag ele Jerusalem ena daakkunu ban hekkulag. Ag anam hena, ag kekeɗ eɗadna, ag wan oh Juda talilidna daatteb ele, ahilkad daup, ag banelag uɗippig, ag amu dilag en aoglag. En amuam gol, silwa, lamen ele. En amuam en okkainab daakku. 15Oɗe nau danab kuɗum aqe mauhtteb ele amu, oɗe amuam hos, miul, kamel, donki, doɗ laala ele, kekeɗ diin uɗin, haen tutu dayak aab kaladna daaeg, doɗ amu ele oh appa daatteb ele amu, oɗe amuam doɗ amu oh ele aqadkku.
16Aria, anam ba ukkeb, wanppan wan laala dilag kekeɗ, ag Jerusalem banelag uɗippig, amu laa ag oɗe amuppa ii mauhkkulag amu, ag eɗun, maɗ anen anen Yawe Nukka Ɠagattag Oh Ele, Nug am king, ag Nug noobppa dup nona binag mekkulagnu, ag Pehppa Dayaknu Hobul gamag ahak ele hekkulagnu Jerusalem tekkulag. 17Aria, wan atten laanu danab ah ag Yawe Nukka Ɠagattag Oh Ele, Nug am king, ag Nug noobppa dup nona binag mekkulagnu Jerusalem tekkulagnu uuglag amu, gu ahilag wanppa ii nema. 18Isip danab ah ag Pehppa Dayaknu Hobul gamag ahak ele hekkulagnu uun ii gokkulag dayeb amu, Yawe Nug wanppan wan laala danab ah ag Peh Dayaknu Hobul gamag ahak ele hekkulagnu uun, Jerusalem ii teppeg, ag bu madakku amu, Nug bu amuib, ⌊am gu appa ii nema,⌋ nug bu amu Isip ele madakku. 19Isip danab ah, am wanppan wan laalanu danab ah aun aɗi ag Pehppa Dayaknu Hobul gamag ahak ele hekkulagnu Jerusalem ii tekkulag dayeb amu, ag bu anam aoglag.
20Am haen amuppa danab ag aen ɗo naunau hos baalagppa aihadtteb ele, ag amu qaɗeppa, “Keeke imuam Yawenu, am nuhignu tituanak daatte,” yaaglag. Amu Yawe laugppa tappiɗ brasppa hak, mana mettak danab ag doɗ tiig amuppa aon gona, qaɗab tauɗ qedatteb, tappiɗ amuam Yawenu tituanak daatteb amu, Yawe laugppan ee haknu waa ag ele anamib Yawenu tituanak daaglag. 21Amge amuib iitta. Waa oh, Jerusalem appa, Juda wan ohppa ele, waa amu oh am Yawe Nukka Ɠagattag Oh Ele, nuhig daaglag; ag Yawenu tituanak daaglag. Amu aun nug Jerusalem appa mana mettak hekkunu Jerusalem tekku amu, nug waa amu laa awa, amuppa doɗ laa mana, Yawe medakkunu teppu laih nug battia lakkunu daatte amu, nug waa amuppa badikku. Aria, haen amuppa laa nug genab tutukku hak danab iitta, nug Yawe Nukka Ɠagattag Oh Ele laugppa ii wama.
Currently Selected:
Sekaraia 14: NB
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
