Malakai 2
2
Mana mettak danab ag nau aomnanu nai laa iikku
1Yawe Nukka Ɠagattag Oh Ele Nug atte. “Haknunab nai imu amu, am ag mana mettak danab, ahilagnu! 2Ag dahil nai imu doon, ag oolagppanab meig! Nai ag dooglagnunab attem am, ag da onilnu am binag ele doyeg! Ag haknunab nai dahil ii doon, ii dim lamidkkulag dayeb amu, da ag eheɗ laa awaknu anak waappa daaglagnu, uug naunab ele laa ahilagppa bekkunu akkul.
Ag dahil haknunab nai ii dim lamidkkulag dayeb amu, ag itittak ena laa ag aoppig amu, da heppi, eheɗ laa awaknu anak waappa dayak bia daakku.
Ge! Ag da binal mekkulagnu oolagppanab ii dootteb amunu, da nakok matu bia itittak ena ahilag laa aoppig amu, da hei, itittak ena amuam eɗua, ag eheɗ laa awaknu anak waappa daatteb.
3Ag eheɗ henan oitteb amunu, da ahilag hak nau amu dabmein, da diig amunu ag buɗulkad daulag batakkul. Da ag mana mettak danab, ag qagmak gamag ahak ele haenppa doɗ main, da meɗatteb ele, da doɗ amunu biig awen, ag iɗulagppa meppi, laa ag ahilagnu kinipan, dubuttid nau ele bia dooglag. 4Da amu hein malappi, nug tituana nai qakkak da hei, da Lewi ele i hemuɗ amu, nai qakkak amu iitta ii memanu da haknunab nai imu ami, ag da nai amu ami dooglag.” Yawe Nukka Ɠagattag Oh Ele Nug anam atte.
5Amu Yawe Nukka Ɠagattag Oh Ele Nug atte. “Da hei, da Lewi ele i nug tituana nai qakkak hemuɗnu diig am, nug nai amu dim lamidkku dayeb, nug bau, maɗoɗ ele daakku. Anam amu, ⌊nug dim lamittom amunu,⌋ da keeke aɗit amu nug mettami. Nug tituana nai qakkak amuam, Lewi nug dahilnu ebehi oh bodoetta le mekkunu dayom, amu Lewi anam heum. Nug da onilnu ebehi oh bodoetta le meum. 6Tatam haen, haen amuppa Lewi nug Israel danab ah amelagppa nai doyak diig genabibppanu, da nug anam ippunadkkunu ami ele, nug nai amu ag amelagppa mattiom. Nug hambuppuak nai laa ii mattiom. Nug da ele maɗoɗ ele oiɗa, nug genab tutukku hak kobol ele dim lamittom. Nug he, danab ah kuɗum ag hipunin ii heppig.
7Nug amu heumnu diig am: Mana mettak danab nug doyak tutukkuib madikkunu daatte.
Ao, danab ah ag mana mettak danab dilagppanu ippunittak aoglagnu daatte.
Diig laa am, mana mettak danab anen anen ag am Yawe Nukka Ɠagattag Oh Elenu nai awa ukkak danab daatteb. 8Anam, amge ag gemu mana mettak danab daatteb, ag anambia ii hetteb! Ag dahil ib uun malappig. Ag danab ah ippu ii ippuanatteg, ag oolagppa kuɗum ag hipunin hetteb. Ag nug tituana nai qakkak nai, da hei, da Lewi ele hemuɗ amu, ag nai qakkak amu uun, ii dim lamidtteb.” Yawe Nukka Ɠagattag Oh Ele, Nug anam awa atte. 9Yawe Nukka Ɠagattag Oh Ele, Nug inam ele atte. “Ag mana mettak danab ag amu heegeg, da hei, danab ah laa ag ahilagnu ena iinab doon, uɗa nak ele madatteb. Aɗinu? Ag mana mettak danab ag dahil ib ii dim lamidna, ag hettoɗiakppa diignab iittappa ag laanu ena doya, laanu diignab iittappa eheɗ doyak kobol dim lamidna hetteb,” awa atte.
Nug tituana nai qakkak loppaɗaknu nai
10Ig oh mamenig laippu iittate? Kayak laippu Nug ig oh iite heikkom?
Ao, ig oh mamenig laippu, Nug ig oh heikkom
Anam amunu, aɗinu ig lainkad amelagppa ig keeke laa hekkunignu nai qagattem, amge ig ii hettem?
Aɗinu ig mamenkad aɗi ag Kayak ele nug tituanna nai qagappig amu, ig nai qakkak amunu am keeke hamu bia doot tippalttem?
11Juda danab ah ag Kayaknu oolagppa genab doyak ahilag uuppig oitteb.
Ao, Israel danab, Jerusalem danab ele ag kobol laa, Kayak Nug kobol amunu ooppa uuaknab dootte, ag kobol amu heppig oitteb.
Aɗinu? Yawe, Nug nuhig mettid lagnu oo mauhtte, amu Juda danab ag laihnu ah, kayak hambuppuak noolagppa dup nona binalag metteb ele, ag amu ag waalkad daaglagnu diin oitteb, amuppa ag heeg, Kayaknu neekkakppa nug laug am dubuttid tak ele daatte. 12Da Yawe Nug Israel oolagppan danab ag amu hetteb, amge dimppa ag Yawe Nukka Ɠagattag Oh Ele laugppa tena, doɗ laa main Yawe medatteb amu, Nug ag otaɗatteb, ag baula Israel danab ah oolagppa ii daamnanu ool daatte.
13Imuam keeke laa ag danab ah Judanu, ag hetteb. Yawe Nug ahilag mana mettaknu ii dabmette, Nug amunu ena doya ag eppelagppanu ii aotte amunu, ag gaanna, mahinna, ag Yawenu qaɗab amelag lebppa haut-tteb. 14Ag gaanna atteb. “Kayak Nug diig aɗinu ihinig mana mettaknu dab-ii-mette?” atteb. Amu Yawe Nug diig imunu ag ii dabmadatte. Ag danab bau daanna, ag anen anen ag ah diinna, ah amu ag waalkad daaglagnu ag ag ele nug tituanna nai qagappig, amge ag nai amu loppaɗna, ii dim lamidtteb. Ag ag waalkad uuadna, ah laa diippig. Ag waalkad ag nid bau daan diippig am ahilkadnab. Ag anen anen ag hanhan ag waalkad amu anamib daaglagnu ag Kayak noobppa nug tituanna, nai qakkanna, ag heppig bia ii hemananu appig, amge ag appig bia ii heppig.
15Haen na ah aome amu, Yawe Nug he, na waat ele laippu iite daapiɗ? Gaɗalahppa, ouɗilahppa ele aa nuhig daattep. Kayak Nug diig aɗinu kobol amu daakkunu meum? Nug aa nid ag genab tutukku hak kobolib dim lamidkkulagnu menuadkkulahnu oo hette. Anam amunu na nakka dabmettan autna awe! Na bau daanna, na nai nahip loppaɗmananu, na waatnu dabmenan oiye!
16Yawe, Israel dilag Kayak, Nug atte. “Da ewau pakkuak kobolnu amu, da nau ninig ele doottem! Ge, danab nug lamen aɗuitteb nokkunu uug ii dootte, amubia laa nug laa guittak nau mauhnoak mettaknu uug laa ii doya, nug wau lamidtte amu, da kobol amunu nau ninig ele doottem amunu, na nakka dabmettan autna awe! Na bau daanna, na nai nahip loppaɗmananu, na waatnu dabmenan oiye!” Yawe Nukka Ɠagattag Oh Ele Nug anam atte.
Epeɗiak naɗinu deɗ
17Ag nai laa maditteb, amuppa ag heeg, Yawe Nug bahi yom. Ag anam hetteb, amge ag oɗ metteb. “Ig attem heut, Yawe Nug bahi yom?” oɗ mettan atteb. Eheɗ anak ahilag am inam. “Yawe Nug nuhig neekkakppa, laa ag eheɗ hetteb, ag am danab ah ena daatteb; Nug ahilagnu ena dootte,” aon atteb. Ag amu atteb, o ag imu atteb. “Kayak Nug nai doya mala hettoɗia epeɗia elele mettak kobol ii dim lamidtte,” aon atteb. ⌊Ag hambuppuak amu oh mattiegeg, Yawe Nug ahilag anak amunu bahi yaatte.⌋
Currently Selected:
Malakai 2: NB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.